Rommi 16 - Sümi Tiqhelimi Bible

Lüthü lau Petha

¹ I no nongu lau ningu chepu Phoebe kilethi tsü ani. Li ye Cenchreae kukuho lo deacon lakhi shi ani.

² Nongu pelo Alhou’w timi sasü chekeu toi Ampeu je lono li sasü tsü penike I no nongu lau qhüiniju ani. Eno li no nongu lau no kiu akukuphu avehupu shini keno kuphutsü penike qhüiniju ani, kughengu li ye I likhi kumo no timi kutomo kuphu püani ke.

³ Khristo Jisü lono I gholo mülà küqha chekeu Priscilla ngò Aquila pama vilo iw petha tsülo.

⁴ Pama ye I ghenguno pama küxü pesü akithipu-a lo qhike. I likhi kumo no Jewkumomi kukuhouqo kümtsü no pama shikimthi ani.

⁵ Pama ki lo kuho chekemiqo vilo ghí petha tsülo. I no kimiye chekeu I küsàu Epenetus petha tsülo. Asia bocho lo pa paghi no Khristo pülüluve ke.

⁶ Petha Mary tsülo. Li ye nongu ghenguno ichhe-ime mülà cheke.

⁷ Andronicus ngò Junia pama lau petha tsülo. Pama ye I küsàmi Jewmi eno I gholo kümtsa akughu lo acheke. Pama ye apostolmiqo dolo akiqheu shi ikhilu chekemi, eno pama ye I züu no Khristo pülüluve ke.

⁸ Ampeu lono I no kimiye chekeu aküsàu Ampliatus petha tsülo.

⁹ Khristo lono mülà küqha akeu Urbanus eno I no kimiye chekeu aküsàu Stachys petha tsülo.

¹⁰ Apelles, khuu Khristo pülü akeu lo theqhikulu shi puthugholu keno, petha tsülo. Aristobulus kibolomiqo lau petha tsülo.

¹¹ I küsàmi Jewmi Herodion lau petha tsülo. Narcissus kibolomi khunoqo Ampeu’w timi keno petha tsülo.

¹² Tryphena ngò Tryphosa, khuu totimi dolo Ampeu kümlà lo ichhe-ime mülà acheni keno petha tsülo. I no kimiye chekeu aküsàu Persis, totimi kütami khuu Ampeu ghenguno ichhe-ime mülà ache keno petha tsülo.

¹³ Rufus, Ampeu no kishelu keu, eno pazá, khuu I zá toi keno, pama petha tsülo.

¹⁴ Asyncritus, Phlegon, Hermes, Patrobas, Hermas, ngò athiküzümi eno achelimi panongu gholo akemiqo petha tsülo.

¹⁵ Philologus, Julia, Nereus eno pa chepu, ngò Olympas eno panongu gholo Ampeu’w timi akeqo kümtsü lau petha tsülo.

¹⁶ Khristo vechewo lakhi no lakhi petha tsülo. Khristo kukuhou kümtsü no nongu lau petha tsüpuwu ani.

¹⁷ Athiküzümi eno achelimiqo, timi khunoqo no kijetha keu süghi cheni eno nongu pelo axiné lo ilove peniye shi cheni keno tipaqo jukuto penike I no nongu qhüiniju ani. Panongu ye nongu no akükütsü ithiluve keu lono bidelau kütsü cheni ke. Panoqo lau no putosü alo.

¹⁸ Kughengu timi hitoi keqo ye ningu Mpeu Khristo qe anike kumoe, ikemu panongu ye pano likhi panow kuchu-kusho ghengu likhi kümsü cheni. Panongu ye atsa kümtsha eno akumou lono akishé tsü keu vechewo kumu mtha kemiqo kükümsü pishiqhive acheni.

¹⁹ Nongu no Alhou ghokulu shiluve keu ghili timi kümtsü no chiluvae eno hi ghenguno ni ye alovishe ani; ikemu ni ye nongu pelo kiu no akivi keno tipau lo alokütsü shi eno kiu no küsakügha keno tipau lo kumu mtha kemi shipe nishi ani.

²⁰ Alokughuno tsü chekeu Lhou no kighithe Satan nedaqhive no nongu pukhu qholo qhivetsü nani. Ampeu Jisü’w küpükini nongu gholo apeniu.

²¹ I gholo mülà küqha chekeu Timothy no paw petha nongu tsüpuwu ani eno titoi I küsàmi Jewmi Lucius, Jason eno Sosipater ghí panonguw petha tsüpuwu ani.

²² Ni Tertius, khuu Paul ghenguno yèsü hipau yè keno, Ampeu lono petha nongu tsü ani.

²³ Hilau, ni eno akukuhomi kümtsü lopiqitsü ghi sasǘ tsü akeu Gaius no paw petha nongu tsüpuwu ani. Erastus, khuu mishighüna lo mìshí kümlamìqow mijekütsüu keno, eno ningu thiküzüu Quartus pama no petha nongu tsü ani.

²⁴ Nongu kümtsü gholo Ampeu Jisü Khristo’w küpükini apeniu. Amen.

²⁵ Itehi ye I no pikülha chekeu tsakiviu lono piche keu toi, Alhou khuu no nongu pelo tolu pe keno ajuküvü kümtsü pe pa tsülo. Jisü Khristo ghili kükütsü sütsa hipau no nongu Jewkumomiqo ghenguno Alhou’w tuqhou küsüpüa chekeu pephe-piye anike, hiye tiqheli kushuwa kutólo küsüpe püa chekeu lakhi ke.

²⁶ Ikemu itehi ye tungkuptsa lo yèpüa keqo eno lhokta Lhou no azah tsüve keu kiqi lono, akükütsü sütsa hipau ye Jewkumomi aqha kümtsü lo akemiqo lau pephe-piyevae, tishi keu vechewo panongu ghí pülülu eno aghokulu shilu peniye ke.

²⁷ Jisü Khristo vechewo Alhou khuu likhi no alokütsüu keno pülhapuju lo ajuküvü pesü pa tsülo! Amen.