Rommi 15 - Sümi Tiqhelimi Bible

¹ Ningu khunoqo no aküpülü lo muto ani keno miqemilei kemi no ikiqive kelo xaqhetsü moayesa ke thono nilikhi nipulou shi akepu kumoe.

² Ningu kümtsü no ningu kisüghümiqo kivipu eno panoqo shiqhepuku nikeu ghenguno panongu pulou shitsü moayesa ke.

³ Khristo ghí pa likhi pa pulou shimo ke, kughengu Kuchoyesü lo ishi yèpüani: “Timi no nongu thaigha keqo ye I shou ikughivae.”

⁴ Thime hitoi keqo no ningu shika niye püzüu no Kuchoyesü lo yèpe qhivae. Eno Alhou’w pikiqhi shikupu niye ningu no kutuukulu shi khe akelo Kuchoyesü no lajupu ningu tsü eno shikumto cheni.

^5-6 Nongu pelo amlo lakhi eno asütsa lakhi lono Alhou eno ningu Mpeu Jisü Khristo Papù juküvü shilu penike ghenguno kutuukulu eno shikumto tsü chekeu Lhou pelo Khristo Jisü toi nongu dolo akükümsü lakhi lono xülu penike kuphutsü peniu.

⁷ Tishiaye Alhou juküvüpu shipe nike ghenguno Khristo no nongu ikhilu ketoi nongu ghí lakhi no lakhi ikhilulo.

⁸ Alhou no Apù-asüqo lau piqhipüa keu ye kuchou kepi pìye nike ghenguno Khristo ye Jewmiqo lau aqemi lakhi toi ighi kepi kümsülulo.

⁹ Tilikhi kumo no Khristo ye Jewkumomiqo pelo Alhou’w kimiyekini ghenguno Alhou juküvü shipe niye ighike. Kughengu Kuchoyesü lo ishi yèpüani: “Tighenguno Jewkumomiqo gholo no I no O sheni; I no O je sheqhe ale pheni.”

¹⁰ Itaghi ishi pipüani, “Nongu Jewkumomiqo, paw timiqo gholo alovishelo.”

¹¹ Eno itaghi, “Nongu Jewkumomi kümtsü Ampeu sheqhelo; shiaye jeli kümtsü pelo pa sheqhe pelo.”

¹² Eno itaghi Isaiah no pi, “Jesse kughuko lo lakhi ipeghi nani, pa ye shiyeqo shou ayè penike ipeghi nani; Jewkumomiqo no pa shou lajupu qhi nani.”

¹³ Nongu no pa shou pükhübe ake toi, lajupu tsü chekeu Lhou pelo alokiqi eno alokughuno chhitoi nongu shepichhi tsü peniu, tishi keu lono nongu pelo Aghungu Kimthe küká vechewo lajupu qochililu apeniu.

Paul no Jewkumomiqo lau Mülà keu

¹⁴ Athiküzümi eno achelimiqo, I no mütsüqhei ithi akeu no nongu ye akivipu no chhitoi ani, akighithi kutomo ani eno shitsa shi lakhi no lakhi shikalu nanie.

¹⁵ Tishiaghi namu ni ye ighono akumto shi thime hami püzüu nongu lau yève keqo hu itaghi pikithe niye ani, kughengu Alhou no küpükini I tsü keu vechewo

¹⁶ ni ye Jewkumomiqo lau Khristo Jisü qeu lakhi ke. Pa no Alhou tsakiviu pe asheshu pe nikeu chine kümlà I pichhe tsüke, tishianguno Jewkumomiqo pelo Aghungu Kimthe no shikimtheve no Alhou no ikhikulupu kümlagho shilu peniye ke.

¹⁷ Tighenguno ni ye Alhou kümlà lo Khristo Jisü lono agijivilei acheni.

¹⁸ I no pi eno müla keu vechewo Khristo no Jewkumomiqo pelo Alhou ghokulu lo saighilu pe nikeu lo tokulu shilu keu nguno alau kütau kiumu pimoe.

¹⁹ Panongu ye amichipu ngo akümzapu küká eno Alhou Ghungu küká vechewo pütsaqhilu ke. Ike Jerusalem lono homüxa süsü Illyricum kutólo ni ye Khristo tsakiviu kümtsü pe asheshuvae.

²⁰ Ni ye a-a khilehi no Khristo je chimla aphi keno tilehi atsakiviu pe kütsü nikeu no pülhapuju I kimiji shi acheni. Ni ye kütami khuala no aboqha qhave aghí keu shou shipukuni shichemo ke.

²¹ Kuchoyesü lo ishi pipüani: “Khunoqo vilo pa ghili pi mphi keno tipaqo no pa ithulu nani, eno khunoqo no pa ghili chilu mphi keno tipaqo no vethalu nani.”

²² I no nongu lau ighi nikeu kumunuve akeu ye atsakiviu pesü hipaqo lau asheshu akeu ghenguno ke.

Paul no Rome Xuju nike Kughu

²³ Ikemu itehi ye hipa qhalo I ghenguno mülà kepu-a kühavae, eno ni ye ampe kushuwa lono nongu xuju nishiqhiyi ighivea kehu

²⁴ ni ye Spain lo wuche kikije nongu xuju niye kughu ani. Ni ye kathasü wu kikije lono nongu sasü kusholu no atüqhüdo kitila nongu gholo aloinoluve kethiu nongu pelo I kuphu tsüpe no I ghüzüla lo wuni ke lakuju shi anie.

²⁵ Ikemu itehi ye, ni ye Ampeu’w timiqo kümlapù ghenguno Jerusalem lo wuchea.

²⁶ Kughengu Macedonia eno Achaia lo küpülümiqo ye Jerusalem lo Ampeu’w timiqo gholo kumlhomiqo kuphu nike amlokiqi shi akümlagho qhakütsü ke.

²⁷ Panongu ye tishini keu lo amlokiqi shike, eno kuchou lo ye panongu ye kumlhomiqo kuphu moayesa kepu shi ake. Kughengu Jewmiqo no aghungu lo kükümgha pesü Jewkumomiqo lau küsaje aghí aye, Jewkumomiqo ghí panonguw ashi lo kükümghaqo pesü Jewmiqo lau küsaje keu ye àküzǘ ke.

²⁸ Ike I no akümlà hipau shiqhive püzü Jerusalem lo kumlhomiqo no akukuphu ithuluve keu mütsümisheive kethiu no Spain lo wu nani eno I no tilau wu kikije nongu xuju nani.

²⁹ Kughou I no nongu lau ighini keno, ni ye Khristo lau no ighi keu kükümgha kinikulu shi pesü ighino nongu sasü küsaje nani kepi mütsümishei ani.

³⁰ Athiküzümi eno achelimiqo, ningu Mpeu Jisü Khristo eno Aghunguw kikimiye vechewo I no nongu lau hi qhüiniju ani: I gholo kutubo ghi Alhou vilo I ghenguno tamo no inikhu tsü alo.

³¹ Judea lo pülümo kemiqo lau no I süsho tsü penike inikhu tsülo. Eno akukuphu pesü Jerusalem lo wuche keu lo tilehi Ampeu’w timiqo pelo no puloniqhiyi shi akümlagho ikhilu penike ghenguno inikhu tsülo.

³² Tipathiu no Alhou pulou shi aghí no ni ye alokivishi nongu lau ighino nongu gholo ngolu keu vechewo aghüthipüxülu kepu shi nani.

³³ Alokughuno tsü chekeu Lhou no nongu kümtsü gholo apeniu. Amen.