Rommi 13 - Sümi Tiqhelimi Bible

Ayekipe Kükagha lau Aghokulu shini keu

¹ Yepeka kükagha qholo timi kümtsü no aghokulu shi moayesa, kughengu Alhou no huthuphe tsü keu kumo aye ayekipe kütau ye küha ke. Itodolo ayè pe akeu yepeka ye Alhou no huthuphe tsüke.

² Tighenguno, timi khuu no yepeka hebideni keno tiye Alhou no süküsü shipüa keu hebide anike, eno khuno no tishini keno pano likhi pano shou küghakütha süghi nani.

³ Kughengu achipi shi chekemi ye ayekipemiqo msà akepu kühae, ikemu khuno no achipi shichemo keno panongu ye msà kepu ani. No ye ayekipe lo akemi msàmo no xü nishi cheni keshea? Tishiaye kiu no achipi keno tipau shilo eno no ye akishé ithulu nani.

⁴ Kughengu ayekipe lo akemi ye Alhou qemi ke eno O kivipu ghenguno anike. Ikemu nono achipikumo shi aye msà alo, kughengu ayekipemiqo ye aghime O tsülu kepu küká anike. Panongu ye Alhou qemiqo ke, eno achipi shimo kemiqo shou Alhou loghukighide süghi peniye puwu püani ke.

⁵ Tighenguno, aghime ithulu nosa keu kümsà ghengu likhi no kumo püzü alikhi alolo kighithi vechewo ghi ayekipe qholo aghokulu shi moayesa ke.

⁶ Hipau ghenguno nongu ye zame tsü cheni ke, kughengu ayekipemiqo ye Alhou qemiqo ke, eno panongu ye ado kümtsü pesü ayekipe ghenguno tsü cheni ke.

⁷ Nono api pù akemi kümtsü lau kiu tsü kepu ani keno tsülo: Zame tsü kepu shi aghí aye, zame tsülo; yepeka lau asüqha jeli tsü moayesa kepu shi aghí aye, tsülo; qhoqhü moayesa kepu shi aghí aye, qhoqhü lo; gihu moayesa kepu aghí aye, agigihu tsülo.

Kikimiye no Ayeza Shikupu Tsü Cheni

⁸ Lakhi no lakhi kimiyekilé nikeu piashe nguno alau ye api-ashe lakhimu qhi kevilo. Kughengu timi khuu no kütami kimiye cheni keno pa ye ayeza shikupuluvae.

⁹ Azakütsü ye hipaqo, “No ye shupu kevilo,” “No ye ghiqhi kevilo,” “No ye püka kevilo,” “No ye jumine kevilo,” eno azakütsü kütau khijehi aghimu ti kümtsü ayeza hipau lo süküqhavae: “O likhi O toi O kisüghümi kimiye lo.”

¹⁰ Khuno no kimiye cheni keno akisüghümi lau alhoküsa kümlà shichemoe. Tighenguno kikimiye ye ayeza shikupulu cheni.

Atsala Hu ye Kupunúvae

¹¹ Ningu no itodolo xü akeu tüqhüdo ithi no hi shilo: Nongu ye zü akeu lono idaithughi kepu do hu ighivae, kughengu ninguw xakulu ye püzüu ningu no atüghi lo pülüluve keu nguno alau kupunukhoi kithevae.

¹² Putho wokhaveni chea; atsala ye ipechea. Tighenguno ningu àküzǘ lo kümlàqo qhikhave no aküvü ghünanu puluveni nolo.

¹³ Atsala küvü lo akemi toi ningu ghushoghili lo kithikiyi shini nolo. Ningu itho-igho eno shomzümoni, kipito xüküpsa eno ghüpoghüzü shimoni, kichighimo eno anhekushu shimoni nolo.

¹⁴ Tishini ke züqhulo, Ampeu Jisü Khristo pesü nongu ghünanu shi pepuluvelo, eno kíshi no ashi-aji ghapiqi tsüní keno tipaqo ghili kümsü akevilo.