Rommi 12 - Sümi Tiqhelimi Bible

Aküxü Kümlagho

¹ Tighenguno athiküzümi eno achelimiqo, Alhou’w kimiyekini vechewo I no nongu qhüiniju ani: nongu phimpi pesü aküxü no mülá keu kümlagho shi akimthe eno Alhou pulou lono ikhiphe pe tsülo. Alhou mülá nikeu lo hino kuchou eno achipiu ke.

² Hipau yeghilomi ghola ha kevilo, ikemu nongu kükümsü shikithelu keu vechewo nongu lolo pekililu lo. Tishilu aye Alhou pulou ye kiu keno nongu no tipaqo kimchilu eno ithikütüta shilu nani. Alhou pulou ye akivipu, ikhilu küzüpu eno kupukülai ke.

Khristo Phimpi lo Aqhokighe Kümlà

³ Küpükini I tsüpüa keu vechewo I no nongu kümtsü vilo hi piani: Nongu ye nongu likhi nongu pesü ighono qhemghai kümsü kepu kumoe, ikemu nongu ye Alhou no aküpülü nongu kümtsü tsüpüa keu vechewo aghibiu xakütha lono nongu likhi nongu ghili kümsüju moayesa.

⁴ Kughengu ningu phimpi lo aphi-au kutomo ake toi, eno aphi-au kümtsü aphiphi lono peitha chemo ketoi,

⁵ ningu kutomo shi aghí namu Khristo lono kimepe aphimpi lakhi lo ani, eno aphi-au no aphimpi lo kimepe akeu toi ningu kümtsü lakhi no lakhi sasü kimepe ani.

⁶ Alhou no ningu kümtsü lau küpükini tsüpüa keu kiqi lono ningu kümtsü aghò kütüta anie. Tsalá aghò O tsüpüa keu no tungkupu tsa pi kepu shi aghí aye, O küpülü aghí keu qhemi lono tungkupu tsa pi moayesa;

⁷ tsalá kütami qe kepu shi aghí aye, qe moayesa; tsalá kütsü kepu shi aghí aye, kütsü moayesa;

⁸ tsalá shikumto nikeu shi aghí aye, shikumto moayesa; tsalá kütami kuphu kepu shi aghí aye, kupukuno shitsü moayesa; tsalá kütami saphe kepu shi aghí aye, tsaqütsalei saphe moayesa; tsalá kimiyekini pephe kepu shi aghí aye, amloqiqhiyi pephe moayesae.

Akümlà lono Kikimiye

⁹ Kikimiye ye amikucho shi moayesa. Kiu no küsakügha keno mithi lo; kiu no akivi keno mutotoi tsüqüluve lo.

¹⁰ Athiküzümi kimiyekilé ketoi nongu lakhi no lakhi kimiyekilé lo. O nguno akiqheu shi lakhi no lakhi gihu kilé lo.

¹¹ Azükini shini keu lo khilemu kughuchove kevilo, ikemu aghungu lono minemighei ghi Ampeu qe lo.

¹² Lajupu akeu lo alovilo, aghime lo kutuu lo, akighini lo amlotsüqhiyi shilo.

¹³ Nongu no aghí keu pesü Ampeu’w timi khunoqo no avehupu shi ani keno panongu sasü küsaje lo. Inami sasükinimi shilo.

¹⁴ Nongu pishi-puju chekemiqo kümgha tsülo; panongu kümgha tsü penike inikhuni thono ghusho kevilo.

¹⁵ Alovishe akemi gholo alovi küqhalo; qamlo aghí kemi gholo qamlo lo.

¹⁶ Lakhi no lakhi sasü kuloniküghüvüi shi xülo. Aqheküza shi kevilo, ikemu chuninei xüche kemiqo sasü kuloji nikeu lo puloniqhiyi shilo. Khilemu nono thowkha ithi akeu shi kevilo.

¹⁷ Timi khuu laumu küsakügha pesü küsakügha lochile kevilo. Timi kümtsü nhekithe lo achipiu shini keu pükapütsalo.

¹⁸ Eno tolu ke thaqhülo O shelo timi kümtsü sasü külashi ghi xülo.

¹⁹ I no kimiye chekemi aküsàmiqo, amkhü lukevilo, ikemu Alhou loghukighide shou picheve tsülo, kughengu Kuchoyesü lo ishi yèpüani: “Amkhü ye I no lunani; I no lochile nani,” ipi Ampeu no pie.

²⁰ Ike amkhü luni ke züqhulo: “Tsalá O ghümi no müzüthi aghí aye, pa lojí lo; tsalá pa no tüghüthi aghí aye, ye kepu kiula pesü pa tsülo. Hipau shikeu vechewo no ye ami kuchughei hipesü pa kütsü shou lepuku tsü anike.”

²¹ Küsakügha pelo O theqhive pe kevilo, ikemu akivi pesü küsakügha theqhilulo.