Rommi 11 - Sümi Tiqhelimi Bible

Israel Ghükulu

¹ Tipathiu I no ishi iniju: Alhou ye paw timiqo milive keshea? Khilemu tishimoe! Ni ampi ghí Israelmi lakhi ke. Ni ye Abraham tikughukomi eno Benjamin lagha lono ighi kemi ke.

² Alhou ye azüu no paw timi ithi pe ache kemiqo milivemoe. Kuchoyesü lo Elijah ghili kiu pipüani keno nongu ye mtha keshea. Pa ye Alhou lau Israelmi ghenguno muchho ghi ishi pike:

³ “Ampeu, panongu no ow tungkupumiqo pìthíve tsüa eno O kümlá-khacheqo xaleqhikhave tsüae; I likhi qhivae, eno panongu ye I pìthíve niye pükapütsa anie.”

⁴ Ikelo Alhou ye kiu pa khochile kea? Alhou no hitoi pike, “Ni ye I ghenguno Baal lhou lau qhoqhünhe pe mülámo kemi pano 7,000 ghüpe qhipüanie.”

⁵ Tihutoi, itodolo ghí Alhou no küpükini vechewo ghüluve no kisheluve kemi anie.

⁶ Ike Alhou no küpükini vechewo kishe cheghi aye, tiye akümlà vechewo no kumoe. Kughengu akümlà vechewo kishe cheghi aye, küpükini ye kuchou no küpükini kumovae.

⁷ Tishiaye kíshive kea? Israelmiqo ye panongu no kiu pulopiniyi shi phuche keno tipau ithumlave. Panongu dolo kisheluve kemiqo ye ithuluve ke, ikemu kütamiqo mlo ye shikümka pe qhive ke,

⁸ kughengu Kuchoyesü lo ishi yèpüani: “Alhou no ishí tsalà kutólo izüvülai keu ghungu, ithumla kepu nhethi, eno chimla kepu kìní pe panongu tsüke.”

⁹ Titoi David ghí ishi pi: “Panongu ghulhu lipa pelo alichhe ngò aküsǘ lakhi shive peniu, tino panongu ghenguno lakükha eno aghimekütsü shive peniu.

¹⁰ Panongu nhethi pelo zümoive pe no ithumlave peniu eno panongu ghütsü ye alhokupuju ghenguno ikove peniu.”

Shokime Küqhaluve keu Lokaqo pesü Kimghi keu

¹¹ Itaghi I no iniju: Israelmiqo ye athoputho müla kepu shi veqhive keshea? Khilemu tishimoe! Ikemu panonguw hekibide ghenguno Israel pelo anheshu peniye xakulu ye Jewkumomiqo lau ighivae.

¹² Ikemu tsalá panonguw hekibide no ayeghiqha ghenguno kinikülü shi aghí aye eno panongu pühave keu no Jewkumomiqo ghenguno kinikülü shi aghí aye, panongu kihisüluve keu vechewo kinikülü khijehi süghilu nani kea!

^13-14 I no nongu Jewkumomiqo vilo piani. I no Jewkumomiqo lau apostol shi akeu toi ni ye I likhi iw timiqo pelo nongu ju pesü anheshu keu vechewo hakutholu no panongu hami likhimu xalu pe nikeu lajupu qhi no I kümlà lo agijivilei acheni.

¹⁵ Kughengu panongu milive keu no ayeghiqha lo külakishi süghilu aye, panongu ikhiluve keu ye akithí lono aküxü shiluve nani keshea?

¹⁶ Tsalá asho kukunu amsüu pesü akümlagho shitsü keu no akimthe shi aghí aye asho kukunu kupuju akimthe ke; eno tsalá asübo kuhu no akimthe shi aghí aye alokaqo ghí akimthe ke.

¹⁷ Pighi achekeu olive sübo lo aloka khami no icheiqive kelo aghalow olive loka süwo tipau gholo kimepe qhive keu toi, nongu Jewkumomiqo ye aghasa lo olive sübo müzü toi kemu itehi ye lojiputhuve keu olive kuhu lo küsajelu ake toi Jewmi küxü lo kinikülü küsajelu anie.

¹⁸ Tighenguno nongu ye aloka icheiqive keu nguno shoqau kepi kümsü kevilo. Tsalá nongu no tishi kümsü aye, hi ithilu lo: Aloka no akuhu kuphu chemoe, ikemu akuhu no aloka kuphu cheni. Nongu ye aloka toi ke.

¹⁹ Tishiaye nongu no ishi piluvi, “I pelo shokime küqhaluve penike ghenguno alokaqo ye icheiqive ke.”

²⁰ Tiye kuchou ke. Ikemu panongu ye pülü müla keu ghenguno icheiqive ke, eno nongu ye aküpülü vechewo puthugho anie. Akuchhoma shi kevilo, ikemu msà khokhoshi alo.

²¹ Kughengu Alhou no hi alho lono acheghi keu loka Israel thotsü ghümove aye, pa ye nongu ghí qhimove nani.

²² Tighenguno Alhou ye kiutoi küpüqhiyi eno ayiküsa keno kümsülulo: pa ye veqhive kemi lau ayiküsa shi cheni, ikemu nongu no paw küpüqhiyi keu lo cheche aye nongu lau küpüqhiyi keu anani. Tishimo aye, nongu ghí miché peve nani.

²³ Eno icheiqive kemiqo pinamu panongu no panoqo pülükümla pheve aye panongu ghí shokimeve nani, kughengu Alhou ye itaghi panongu shokimeluve kulupu anike.

²⁴ Kughengu nongu Jewkumomiqo ye alho lono aghasa lo olive sübo lakhi kemu miché pewo alho lo lhoaye hexave ghi pighi achekeu olive sübo lo shokimepuku püakeu toi ke. Israel ye alho lono pighi achekeu olive sübo toi ke, eno Alhou ghengu ye hi pighi achekeu olive sübo lo icheiqive keu loka pesü pa likhi pa bò lo kimekitheve nikeu no mülalei ke.

Israelmi Kümtsü Xaluve nani

²⁵ Athiküzümi eno achelimiqo, ni ye nongu pelo Alhou’w tuqhou hipau ghili ithi penishi anie, tishianguno nongu pelo nongu likhi nongu pülüpivi apemo niye ke: tiye hike, Israelmi shou amlo hekike keu ikughi akeu ye Jewkumomiqo khije Alhou lau ighi kepu shi ani keno tipaqo ighikupu mphi kutólo likhi ke,

²⁶ eno ishi keu vechewo Israelmi kümtsü xaluve nani. Kughengu Kuchoyesü lo ishi yèpüani: “Xakuluu ye Zion lono ighi nani; pa no Jacob lau no küsakügha jeli kümtsü hapeve tsü nani.

²⁷ Eno panongu lau iw puloshoqhi ye hike I no panongu xinéqo ikhipeve tsüní.”

²⁸ Jewmi kutomo no nongu jeku lono atsakiviu ghümi shivae, ike tipau kiqi lo nongu Jewkumomi no alá shivae. Tishiaghimu Alhou no panongu pù-asüqo kishelu keu ghenguno panongu kimiye acheni.

²⁹ Kughengu Alhou’w kümsá ghò eno pa no kulùve keu ye khilemu xachileve müla ke.

³⁰ Ado lakhi lo nongu Jewkumomiqo ye Alhou gholumo no ache kemu itehi ye Jewmi ghokulu kumo ghenguno nongu no Alhou’w kimiyekini ithulu ketoi,

³¹ panongu ghí Alhou’w kimiyekini nongu lau akeu vechewo kimiyekini ithulu nike ghenguno itehi ye aghokulukumo shivae.

³² Kughengu Alhou ye kümtsü shou kimiyekini anike ghenguno aghokulukumo pe panongu kümtsü tsüghave ke.

Alhou Shekiqhe

³³ Alhou lokütsü eno kighithi kiní ye kiutoi kuthoküzü kea! Paw küghakütha ye phukulupu kumoe, eno pa laghi ye apashe kulupu kumoe!

³⁴ “Khuu no Ampeu kükümsü ithi kea? momu khuu no paw lapiyeu shilu kea?”

³⁵ “Khuu no lochile kulupu qhemi ghò pesü Alhou tsüju kea?”

³⁶ Kughengu pa lau no eno pa vechewo eno pa ghenguno thowkha kümtsü anike. Alhou lau pülhapuju ajuküvü apelo! Amen.