Rommi 10 - Sümi Tiqhelimi Bible

¹ Athiküzümi eno achelimiqo, I no I mlo lo minemighei chekeu eno Alhou lau inikhu chekeu ye Israelmiqo pelo xaluve pe nikeu ke.

² Kughengu panongu no Alhou lau minemighei akeu I no thopi shi tsülu nani, ikemu panongu no minemighei akeu ye kuhou kighithi boqha küha ke.

³ Panongu no Alhou chipiumikucho mtha no pano likhi pano ghola lono achipiu shini keu phu ke ghenguno panongu ye Alhou chipiumikucho lau ikhiphe pesü tsümo ke.

⁴ Küpülümi kümtsü pelo achipikalu penike ghenguno Khristo no ayeza kishekhave tsüke.

⁵ Moses no ayeza vechewo achipiumikucho shilu chekeu ghili hipau yè ke: “Timi khuu no ayeza lo akeu papeluni keno tipau vechewo xülu nani.”

⁶ Ikemu aküpülü vechewo achipiumikucho shilu chekeu lo ishi yèpüani: “O mlo lo ishi pi kevilo, ‘Khuu no atsütsǘ lo ikuluni kea?’ ” (tiye Khristo aqhou saikighi kepu shi)

⁷ “ikeo ‘Khuu no aqokutho lo iqiluni kea?’ ” (tiye akithí lono Khristo saikughi kepu shi.)

⁸ Ikemu Kuchoyesü ye kiu piani kea? “Atsa hu ye O phivilo anie; tiye O kichí eno O mlo lo anie.” Atsa ye ningu no aküpülü ghili kükütsü sütsa shuphe chekeu ke:

⁹ Nono O kichí lono, “Jisü ye Ampeu,” ipi shupheve eno Alhou no akithí lono pa xüputhuve kepi O mlo lono pülüluve aye, no ye xaluve nani.

¹⁰ Kughengu O mlo lono pülüluve keu hu no Alhou lau achipikalu pe cheni, eno O kichí lono O küpülü shupheve keu hu no xaluve cheni pe ke.

¹¹ Kughengu Kuchoyesü no ishi pipüani, “Timi khukhumu pa pülü chekemi ye khilemu kujove pemo nani.”

¹² Kughengu Jewmi ngò Jewkumomi dolo kiumu kütüqü keu kühae. Ampeu hipau ye kümtsü Mpeu ke eno pa ku kemi kümtsü kupukuno shi kümgha tsü cheni,

¹³ kughengu, “Ampeu jeku kemi kümtsü xaluve nani.”

¹⁴ Tishiaye panongu ye pa pülümo kelo kíshi no pa kuni kea? Eno panongu ye pa ghili chilumo kelo kíshi no pülüluni kea? Eno khiuala no panongu lau akükütsü sütsa pikülhamo kelo panongu ye kíshi no chiluni kea?

¹⁵ Eno khukhumu puwumo kelo ye kíshi no akükütsü sütsa pikülhani kea? Kuchoyesü lo ishi yèpüa keu toi: “Atsakiviu pesü ighi chekemi pukhu ye kiutoi akümzapushi jukivi kela!”

¹⁶ Ikemu Israelmiqo kümtsü no atsakiviu ikhilu ke kumoe. Kughengu Isaiah no pi, “Ampeu, khuu no ningu kükütsü sütsa pülü tsü kea?”

¹⁷ Tighenguno, aküpülü ye akükütsü sütsa chilu keu lono ighi cheni, eno akükütsü sütsa ye Khristo ghili pikülha keu vechewo chilu cheni.

¹⁸ Ikemu I no hi iniju ani: Israelmiqo ye kuchou no akükütsü sütsa chilumo keshea? Panongu ye chilu thono: “Panongu sütsa ye ayeghiqha kümtsü lo wuvae, panongu tsaqo ye ayeghi shekha kutólo wuvae.”

¹⁹ Itaghi I no hi iniju ani: Israelmiqo ye kuchou no vethamlave keshea? Vethalu thono, kughengu Moses ghuloki lo Alhou no ishi pi, “Khunoqo no shiye kuchou kumo keno I no nongu pelo tipaqo ju pesü anheshu pe nani; I no vethakulu küha keu shiye lakhi pelo nongu mlo shikighide tsüpe nani.”

²⁰ Eno tipathiu Isaiah no Alhou ghenguno amlo kumto shi pi, “I phumo kemi no I phulu, I kumo kemi lau I no I likhi I pephe-piye ke.”

²¹ Ikemu Israelmiqo vehu lo Alhou no ishi pi, “Ni ye atsala kupuju I u sükho pe aghokulu kumomi eno hekibidemi kheju acheni.”