Rommi 1 - Sümi Tiqhelimi Bible

¹ Paul, Khristo Jisü qeu lakhi, apostol lakhi shipe niye kulùve keu eno Alhou tsakiviu ghenguno pakütashi qhive keu.

² Atsakiviu ye Alhou no azüu no paw tungkupumiqo vechewo Akimthe Kuchoyesü lo piqhipüa keu ke.

³ Atsakiviu ye pa Nu ghili ke. Ayeghi lo pa ye Akükau David tikughukomi lakhi shi punú,

⁴ eno Alhou nu kepi pephe-piye nike ghenguno pa ye Aghungu Kimthe küká vechewo akithí lono xülethuve ke: tiye ningu Mpeu Jisü Khristo ke.

⁵ Khristo züqhu shi aküpülü vechewo Jewkumomiqo kümtsü ku sasü aghokulu shilu penike ghenguno ningu ye Khristo vechewo küpükini ithulu eno apostolmi shilu pe ke.

⁶ Eno Jisü Khristo laumi shipe nike Jewkumomi kulùve kemiqo gholo nongu ghí lakhi ke.

⁷ I no Rome lo Alhou no kimiye chekemiqo eno paw akimthe timi shipe nike kulùve kemiqo kümtsü lau yèlu ani: Ningu Papù Alhou eno Ampeu Jisü Khristo lau no ighi keu küpükini eno aloino keu nongu gholo apeniu.

Paul no Rome Xuju Nishi Keu

⁸ Atüghishi I no nongu kümtsü ghenguno Jisü Khristo vechewo I Lhou shikimthi ani, kughengu ayeghiqha kuchopu lo nongu küpülü ghili kügha ani.

⁹ Alhou khuu I mlo tsüqhiyi I no qe acheni eno pa Nu tsakiviu kütsü acheni keno, pa no I no kíshi tamo no alhokuthu I kighini lo nongu kümsü acheni keno tipauw thopi ke;

¹⁰ eno itehi ye Alhou pulou shi aghí aye I pelo no nongu lau ighilu kepu shi I ghenguno alaghi khaqhi tsü penike I kighini lo alhokuthu inikhu ani.

¹¹ Ni ye nongu ithulu nishi ani, tishianguno nongu pelo akumto shilu pe nikeu ghungu ghò hami nongu tsü niye ke—

¹² tishi keu vechewo ningu lakhi-khi küpülü vechewo ningu lakhi no lakhi shikumtolu peniye ke.

¹³ Athiküzümi eno achelimiqo, ni ye nongu pelo hi mtha no ape nishi amoe, tiye I no Jewkumomi kütamiqo gholo shikeu toi nongu gholo ghí ni ye aghungu kümlà pekholu niye ghuthu kutomo nongu lau ighi niye kughuju ke ikemu itehi kutólo I pelo tishilu pe nikeu lono lakhape püani.

¹⁴ Ni ye ayekighithimi ngò ayekümthami kinikujo lau, eno kighithimi ngò kümthami kinikujo lau ishi api-ashe pù aphike.

¹⁵ Tighenguno ni ye nongu Rome lo akemiqo vilo ghí atsakiviu pikülha nike shishe khekulhoshi ani.

¹⁶ Ni ye atsakiviu ghenguno küjove chemoe, kughengu hiye pülü kemi kümtsü lau xakulu süghitsü chekeu Alhou küká ke: atüghishi Jewmi lau, eno tithiu no Jewkumomi lau süghi ke.

¹⁷ Kughengu atsakiviu lono Alhou chipiumikucho pephe-piyevae. Achipiumikucho tiye atüghi lono ashekha kutólo aküpülü vechewo ke, tiye hitoi yèpüa keu toi ke: “Amikuchomi ye aküpülü vechewo xülu nani.”

Axinemiqo Shou Alhou Loghu

¹⁸ Alhou loghu ye atsütsǘ lono alhou kümthami eno küsakügha kümlà shi chekemiqo shou pephe-piyevae. Timi tipaqo ye panonguw küsakügha pesü kuchou ghasü cheni ke.

¹⁹ Alhou no panongu lau mütsümishei shive tsüke ghenguno Alhou ghili kiu ithi kepu ani keno panongu ghengu ye mütsümishei ke.

²⁰ Kughengu ayeghiqha pulhosü kelo nomu Alhou’w ithukümla meküaqo—tiye paw lhokta küká eno akimthe lhoaye—kinikujo mütsümishei ithuluvae, eno tiye kiu lhoqhi püani keno tipau lono vethaluvea, ikehu timiqo ye ajekukivi kiumu kühavae.

²¹ Kughengu Alhou pülümo kemi ye Alhou ithi anamu, panongu ye Alhou kepi pa je pipitsümoe momu shikimthi pa tsümoe, ikemu panongu kükümsü ye abokümsa shive eno panonguw nikhanigha mlo ye züchiyive ke.

²² Panongu no alokütsümi kepi pükha anamu panongu ye nikhanighami shive ke

²³ eno ajuküvü pesü thimo keu Lhou tsü nikeu züqhulo panongu ye thiveniküau timi julho, aghau, lhoxü eno itikiche lhoxü julho toi ithulu keqo müláuve ke.

²⁴ Tighenguno Alhou no panongu ikhiphe pe panongu mlo lo kipito kimthe kumo kümlà shinishiqhiyi keu lo tsüve ke. Ikehu panongu ye lakhi no lakhi lau panongu phimpi ju-aje shipüsa ghi kipito mikucho kumo kümlà shike.

²⁵ Panongu no Alhou’w kuchou ghili pesü akimiki gholo kilive ke, eno pulhosükütsü Lhou mülá eno huthu nikeu züqhulo pulhosü püakeu jeliqo mülá eno huthuke. Pulhosükütsü Lhou ye pülhapuju sheqhe akepue. Amen.

²⁶ Hi ghenguno, Alhou no panongu ikhiphe pe akukujopu kimineqo lo tsüve ke. Panonguw totimiqo ghí alhoaye lono kipitimi-totimi ashi-aji küqha keu ghola kumo no pano likhi pano dolo ashi-aji küqha keu shike.

²⁷ Tihutoi kipitimiqo ghí alhoaye lono totimi sasü ashi-aji küqha chekeu ghola qhive no lakhi no lakhi mine keu pitipüzaqhi ke. Kipitimi no kipitimi kütami sasü akukujopu kümlàqo shi, eno pano likhi pano shikipimi ghenguno aghime ithulu küzüpu shi akeu ithulu ke.

²⁸ Tinguno alau, panongu ye Alhou ghili ithi nikeu ameküapu shi kümsümoe, ikehu Alhou no panongu ikhiphe pesü pano kükümsü lhoküsa lo tsüve no panongu ye kiu shimo kepu keno tipau shi acheni pe ke.

²⁹ Panongu ye küsakügha, alhoküsa, alakimine eno alhoküsa jeli kümtsü no chhitoi ani. Panongu küxü ye anhekushu, hekiqhi, kumgho keu, pishikiqhi eno axeküsü no chhitoi ani. Panongu ye xishi chekemi,

³⁰ pipütha chekemi, Alhou kimthimi, ayiküsami, akuchhoma eno aqheküzami; panongu ye küsakügha shi chekeu laghi iqikiphemi; panongu ye panongu pù-aza hebide cheni;

³¹ panongu ye vethakulu küha, aghokulu shikeu küha, kikimiye momu kimiyeqhiyi keu küha.

³² Panongu ye Alhou chipiumikucho yeza lo hipaqo shikeu ye pìthíve küzüpu kepi ithi anamu panongu ye tamo no hipaqo shikeu likhi kumo no khunoqo no hipaqo shi cheni keno panoqo jupe amlokiqi shi cheni.