Piyeküsü 9 - Sümi Tiqhelimi Bible

¹ Kungumi apunguu no pa fuko küigha kelo atsütsǘ lono ayepu lakhi ayeghi lo ikiqighi keu I no ithulu. Aqokutho lo ilo chekeu khaqhiyi pesü ayepu hu tsüe.

² Kughou ayepu hu no aqokutho khaqhi keno, ayì kiyiqibo kuloghi lakhi lono amichhi ipeghi akeshi aqokutho lono amichhi ipeghi. Aqokutho lono ipeghi keu michhi hu no khetsünhe eno atsütsǘ küzüphove.

³ Eno amichhi lono tülhaquqo ipeghino ayeghi lo iqighi eno aküka pesü ayeghi lo achuwa pazáqo tsü keu hutoi tülhaquqo tsüe.

⁴ Tülhaquqo vilo ayeghi lo atsüni momu asütsüni momu asübo lakhimu shipüsa kevilo pi, ikemu timi khunoqo no panongu kishe lo Alhou’w amichi chishida keu küha keno tipaqo likhi ghimeqhi lo ipi.

⁵ Tülhaquqo pelo panongu pìthíve pemoe ikemu aqhi pungu kutólo panongu ghimeqhi pe ke. Eno panongu no kushuküqha shi ime keu ye achuwa pazá lakhi no qü akeshi ke.

⁶ Tipau tsalaqo lo timiqo ye akithí phu nani kemu phu müla nani; panongu no thinishi nani, ikemu akithí no panongu lau no itshüve nani.

⁷ Tülhaquqo ye khurshiqo no aghükishi ghenguno kutò pe ngo akeu ju toi ke. Panongu kütsü lo ameshoyi kütsükuqho toi keu pepu no ake, eno panongu ju ye timi ju mihi ke.

⁸ Panongu kütsüsa ye totimiqo kütsüsa toi ke, eno panongu hu ye abongushuu hutoi ke.

⁹ Panongu mülaküküzüpu ye ayì no mülà keu mülaküküzüpu toi ake, eno panongu chishibo sütsa ye khurshi ngò khurkulu kutomo no aghükishi lo kohawu chekeu sütsa toi ake.

¹⁰ Panongu ye achuwa pazá toi qü chekeu shomi xapu ake, eno panongu shomi lo aqhi pungu ghenguno timi ghimeqhilu kepu küká ake.

¹¹ Panongu shou akükau toi keu shini keu aqokuthow kungumi ake, pa je ye Hebrew tsau no Abaddon eno Greek tsau no Apollyon.

¹² Ahasapu atüghiu ye wovae; eno hipathiu ahasapu kini ye ighi niye aphike.

¹³ Kungumi akütsüghou no pa fuko küigha kelo ameshoyi no mülà keu akümlá-khache lo akibò bidí akeu lono Alhou zülo asütsa lakhi ipeghi keu I no chilu.

¹⁴ Tipau no afuko pesü akeu kungumi akütsüghou vilo ishi pi, “Euphrates ghoki kuloghi lo kungumi bidí tsüghapüa keu kuqhopheve lo.”

¹⁵ Ikelo kungumi bidí hu ye atüqhüdo, atsala, aqhi eno ampe hipau lo timi kikijé küthü pìthí penike ghenguno kutò pe püakeu toi kuqhopheve.

¹⁶ I no khurshi’w ghüshimiqo kikihi inilue. Eno panongu kikihi ye kihikha müla ke.

¹⁷ I no kungunhetsü lono khurshi eno tipau küsámiqo ithulu keu ye hitoi ke: Panongu mülaküküzüpu ye ami toi huchuhuyi, tsülabei eno amichu toi awune ke. Khurshi kütsüqo ye abongushuu kütsü mihi ke, eno panongu kichí lono ami ngò amichhi eno amichu ipeghi ke.

¹⁸ Khurshiqo kichí lono ami, amichhi eno amichu püsa ipeghi keu no timi kikijé küthü pìthíve ke.

¹⁹ Khurshiqo küká hu ye panongu kichí ngò ashomi lo ake; kughengu panongu shomi ye apighi toi ghüzaluve kepu akütsü ake.

²⁰ Püsa hipaqo no pithímove keu timi thaqhü ye panongu u no mülà keu kümlà ghenguno xaidemo ke; panongu ye tüghami mülá nikeu, eno ameshoyi, ghükayi, alazayi, atu eno asǜ no mülà keu ajulho lhou mülá tamo ke. Ajulho lhou hipaqo ye ithulu chemo momu alà chelu chemo ke.

²¹ Momu panongu ye timi ghiqhi püakeu, kuduu shikeu, kipito xüküpsa kümlà momu panongu küpüka lono xaidemo ke.