Piyeküsü 8 - Sümi Tiqhelimi Bible

Mekhapüa keu Akütsüniu eno Ameshoyi no Mülà keu Kümlá Kipiti Bohu

¹ Kughou Ambeti no mekhapüa keu akütsüniu khaqhi keno kungugha lo ayì kihedo tüxa qhalo iqünheive.

² Tisheno Alhou zülo kungumi tsünì puthugho akeu I no ithulu, eno afuko tsünì pesü panongu tsüe.

³ Kungumi kütau khuu ameshoyi no mülà keu kümlá kipiti bohu lakhi pesü akeno, pa no ighino akümlá-khache phivilo puthughove. Aküka lakhü zülo ameshoyi no mülà keu akümlá-khache-a lo Alhou’w timiqo kümtsü kighini gholo no mülá penike ghenguno müsüghüta kutomo pesü pa tsüke.

⁴ Müsüghüta michhi gholo no Alhou’w timiqo kighini hu ye kungumi u lo akipiti bohu pesü akeu lono Alhou lau ikuve.

⁵ Tisheno kungumi no ameshoyi no mülà keu kümlá kipiti bohu ikhiluve no akümlá-khache lono ami ikhipe pesü chhitoi hisü püzü ayeghi shou vepuwuve; tile no kong-kong shi tsütsü-küsü sütsa ipeghi, tsütsüpha kulo eno ayeghi küghütha ighie.

Afukoqo

⁶ Tipathiu afuko tsünì pe akeu kungumi tsünì hu no afuko küigha nike kutoe.

⁷ Kungumi atüghiu no pa fuko küigha kemtsa murasü eno ami pesü ajì gholo süküqhave no ayeghi lo leqhi piqive. Ikelo ayeghi kikijé küthü pitileve, asübo kikijé küthü pitileve, eno atsüni kümtsü pitileve.

⁸ Kungumi akiniù hu no pa fuko küigha kelo kiu kela lakhi no naghuto kuloghi toi keu akuchopu piti ghi azüghi lo vesüve. Azüghi kikijé küthü ye ajì ilhove,

⁹ azüghi lo aküxü akeu lhoxü kikijé küthü thive, eno zükiluqo kikijé küthü kütsakungove.

¹⁰ Kungumi aküthüu no pa fuko küigha kelo ayepu kuloghi lakhi hu no vüqalei keu akulu küvü lakhi toi atsütsǘ lono piti sü ikighi püzü aghoki ngò azüpuki kikijé küthü shou ikiqi ikuve—

¹¹ ayepu tipau je ye “Khumtsai” ke. Azü kikijé küthü khumtsaive, eno timi kutomo no azü khumtsaive keu ye keu lono thive.

¹² Kungumi abidiu no pa fuko küigha kelo khetsünhe eno aqhi eno ayepu kikijé küthü kütsave, tishi keu vechewo khetsünhe, aqhi, eno ayepuqo hu ye tsübuive. Pucho tsalà kikijé küthü aküvü kühave eno titoi kijili kikijé küthü ye aqhi-ayepu kühave no zümoive.

¹³ I no ju akelo, aluqu lakhi no kunguu amlhü lo yewu ghi asütsa kuloghi lakhi lono ishi igha keu I no chilu: “Ayeghi lo akemiqo ye Ahasapue! Ahasapue! Ahasapue! kughengu kungumi kütami küthü ye afuko küigha niye kutovae!”