Piyeküsü 7 - Sümi Tiqhelimi Bible

1,44,000 Chishidave keu

¹ Hipathiu kungumi bidí no ayeghi cheku bidí lo puthugho akeu I no ithulu. Panongu no ayeghi mülhü bidí pelo ayeghi shou momu azüghi shou momu asübo lakhi shoumu fupuku pemo niye amlhü hu sünhe chile pesü ae.

² Tipathiu kipelau no kungumi kütau ipeghi keu I no ithulu, pa ye xü akeu Lhou’w chishida kepu pesü ae. Pa no asütsa kuloghi lono ayeghi ngò azüghi shipüsa peniye aküka tsüpüa keu kungumi pano bidí vilo ishi pi:

³ “Ningu no ningu Lhou qemiqo kishe lo chishida no amichi shimphi kutólo ayeghi momu azüghi nomu asüboqo shipüsa kevilo.”

⁴ Tisheno amichi pesü chishidave kemi kikihi I no chilu: Tiye Israel shiaye kümtsü küqha kelo 1,44,000 ke.

⁵ Judah shiaye lono timi 12,000 amichi shi chishidave, Reuben shiaye lono timi 12,000, Gad shiaye lono timi 12,000,

⁶ Asher shiaye lono timi 12,000, Naphtali shiaye lono timi 12,000, Manasseh shiaye lono timi 12,000,

⁷ Simeon shiaye lono timi 12,000, Levi shiaye lono timi 12,000, Issachar shiaye lono timi 12,000,

⁸ Zebulun shiaye lono timi 12,000, Joseph shiaye lono timi 12,000, Benjamin shiaye lono timi 12,000.

Aqokitikhi Kijè no Miyetsüghoi keu Chijeboboi-phi pepu Akeu

⁹ Hipathiu I no ju akelo timi khunomu kihikha müla kepu shi I gizülo timi kutomo ae. Tiye shiye, ashiaye, aju kütüta eno atsa kütüta piche kemi kümtsü no aküka lakhü zülo eno Ambeti zülo puthugho ae. Panongu ye miyetsüghoi keu chijeboboi-phi pepu ae eno panongu u lo amsabo loka pesü ngo ae.

¹⁰ Eno panongu no asütsa kuloghi lakhi lono ishi ighamuku: “Xakulu ye ningu Lhou aküka lakhü lo iqa achekeu eno Ambeti pamaw ke.”

¹¹ Kungumi kümtsü no aküka lakhü eno sakiphemi muchomiqo eno aküxü akeu lhoxü bidí sühomxa pesü puthugho ae. Panongu no aküka lakhü zülo qhoqhünhe pe no Alhou mülá

¹² ghi ishi pi: “Amen! Shekiqhe, ajuküvü alokütsü, shikimthi, agigihu aküka eno akumto ye alhokupuju ghenguno ningu Lhou’w ke. Amen!”

¹³ Tipathiu sakiphemi muchomiqo dolo lakhi no I vilo ishi iniju, “Miyetsüghoi keu chijeboboi-phi pepu akemiqo ye khunoqo kea eno panongu ye khilau no ighi kea?”

¹⁴ I no ishi khochile, “Akijeu, nono ithi anie.” Ikelo pa no pi, “Timi hipaqo ye aghime kitikhi kijè hechesü ipeghi kemiqo ke; panongu ye panonguw chijeboboi-phiqo ishivae eno Ambeti jì lono miyetsüghoi kughulhovae.

¹⁵ Tighenguno, “panongu ye Alhou küká lakhü zülo anie eno putho-pucho pa chineki lo pa huthu acheni; eno khuu no aküka lakhü lo iqa acheni keno pa no panongu gholo ngo no süsho nanie.

¹⁶ ‘Panongu ye khilemu müzüthi kithemae; panongu ye khilemu tüghüthi kithemae. Panongu ye khilemu khetsünhe külǘ,’ momu kiu külǘ nomu panongu ghaqhimo nani.

¹⁷ Kughengu aküka lakhü mtá lo Ambeti akeu hu no panonguw ambe kheu shi nani; ‘pa no aküxüpu züpukiqo lo panongu sawu nani.’ ‘Eno Alhou no panongu nhethi lono anhezü kümtsü isüve tsü nani.’”