Piyeküsü 6 - Sümi Tiqhelimi Bible

Mekhapüa keqo

¹ Ambeti no mekhapüa keu tsünì dolo atüghiu khaqhi keu I no jua. Ikelo aküxü akeu lhoxü bidí dolo lakhi no tsütsü-küsü sütsa toi ishi pi, “Ighilo!”

² I no ju kelo I zülo khurshi miyetsüghoi keu lakhi ithulu! Khurshi küsáu ye asüzü xipusü ae, eno aküka kütsükuqho lakhi pa tsü, eno pa ye theqhikulumi lakhi toi aghü lewu niye chesü wuve.

³ Kughou Ambeti no mekhapüa keu akiniù khaqhi keno xü akeu lhoxü akiniù no ishi pikeu I no chilu, “Ighilo!”

⁴ Tipathiu khurshi kütau ighono huchuhuyi keu lakhi ipeghi. Tipau küsáu ye ayeghiqha lau no külakishi ikhiluve no timiqo pelo lakhi no lakhi pìthíve pe nikeu küká tsüe. Eno akihizüta kijè lakhi pa tsüpüae.

⁵ Kughou Ambeti no mekhapüa keu aküthüu khaqhi keno aküxü akeu lhoxü aküthüu no ishi pikeu I no chilu, “Ighilo!” I no ju kelo I zülo khurshi tsübui keu lakhi ae! Tipau küsáu ye pa u lo ahú kimighipu lakhi pesü ae.

⁶ Tipathiu aküxü akeu lhoxü bidí dolo lakhi no piakeu sütsa toi I no hitoi chilu, “Atsala lakhi jume ghenguno ashothi ahukimighi lakhi, eno atsala lakhi jume ghenguno barelythi ahukimighi küthü, eno thazü ngò atsaiji shipüsa kevilo!”

⁷ Kughou Ambeti no mekhapüa keu abidiu khaqhi keno aküxü akeu lhoxü abidiu no ishi pikeu sütsa I no chilu, “Ighilo!”

⁸ I no ju kelo I zülo phalai keu khurshi lakhi ithulu! Tipau küsáu je ye Akithí, eno pa zübou Hades no kupunukhoi papesü che. Akithí ngò Hades pama pelo akihizüta peitha eno püqümiye, küsükini eno ayeghi lo tüghashiqo peitha püzü ayeghi lo timi saje bidí dolo saje lakhi ye pìthíve pe nikeu küká panongu tsüe.

⁹ Kughou Ambeti no mekhapüa keu apunguu khaqhi keno akümlá-khache qhou Alhou tsa pesü asheshu chekemiqo eno amikucho shi ashepe shikeu ghenguno ghiqhive kemiqo ngulho akeu I no ithulu.

¹⁰ Panongu no asütsa kuloghi lakhi lono ishi pi, “Akughushu Mpeu, akimthe eno kuchou, no ye kughou no ayeghi lo xü akemiqo shou küghathabe no ningu jì peleve keu mükhü lutsü nani kea?”

¹¹ Tipathiu panongu kümtsü chijeboboi-phi miyetsüghoi keu lakhi-khi tsü, eno panongu vilo panongu küsàmi aqemi eno athiküzümi ngò achelimiqo kümtsü panongu toi pìthívemo ke kutólo ado kitila ngokhe aghílo ipive.

¹² Mekhapüa keu akütsüghou hu Ambeti no khaqhi akeu I no ju ae. Ikelo ayeghi küghütha kijè lakhi ighi. Khetsünhe no ane mhi no mülà keu yeqhiyephi toi tsübuive, eno aqhi no ajì toi huchuhuyive,

¹³ amlhü kijè no mububo lakhi sükini kelo mubuthi ikiqi akeshi atsütsǘ lono ayepuqo no ayeghi lo ikiqighive.

¹⁴ Liküküzü kaku lakhi liküzü akeshi atsütsǘ hu ye hailove eno naghuto ngò züdoyeghi kümtsü pütüta-a lono iqeve.

¹⁵ Tipathiu ayeghi lo kükamiqo, kükapumiqo, ghüshimi shou kijemiqo, kiními, akughushumi, aqüaxemi eno kuqhopheve kemi kümtsü no atuki ngò naghuto lo atuquqo dolo itshüwu khave.

¹⁶ Panongu no naghuto eno atuquqo vilo ishi pi, “Ni veqaluve lo eno khuu no aküka lakhü lo iqa ani keno pa gizü lono eno Ambeti loghukighide lau no ningu peküsüve tsülo!

¹⁷ Kughengu panongu shou aloghukighide ikughi nikeu tsalà kijè hu ighivae, eno khuu no tipau lono xülu kea?”