Piyeküsü 5 - Sümi Tiqhelimi Bible

Liküküzü Kaku eno Ambeti

¹ Tisheno aküka lakhü lo iqa akeu u ajeu liküküzü kaku lakhi akeu I no ithulu. Liküküzü kaku tipau ye ashou eno alou ghí yèpüa eno mekha keu tsünì no mekhapüa ke.

² Eno akughushu kungumi lakhi no ighamuku ghi ishi asheshu akeu I no ithulu, “Khuu no mekhapüa keu liküküzü kaku hepho no khaqhi küzü kea?”

³ Ikemu kungugha lo momu ayeghi shou momu ayeghi qhou timi khuu nomu liküküzü kaku khaqhi mülae momu tipau aloumu jusü mülae.

⁴ Khumu liküküzü kaku khaqhi nikeu momu alou jusü nikeu aküzüpushi aghimove ke ghenguno ni ye shishe qa ae.

⁵ Ikelo sakiphemi muchomi lakhi no I vilo ishi pi, “Qa kevilo! Julo, Judah shiaye Bongushuu eno David polokughukou hu no theqhikulu shi toluvae. Pa no liküküzü kaku eno tipau mekhapüa keu tsünì hu khaqhilu nanie.”

⁶ Tisheno I no Ambeti lakhi ghiqhi pepüa ketoi ithulue eno tiye aküka lakhü mtá lo aküxü akeu lhoxü bidí ngò sakiphemi muchomiqo no sühomxa pe ake toi ithulu. Ambeti ye akibò tsünì eno anhethi tsünì puae, eno tiye ayeghiqha kümtsü lo Alhou ghungu tsünì puwu keqo ke.

⁷ Ambeti no wu püzü aküka lakhü lo iqa akeu u ajeu lono liküküzü kaku ikhiluve.

⁸ Eno kughou pa no liküküzü kaku ikhiluve keno, aküxü akeu lhoxü bidí eno sakiphemi muchomi mukubidi no Ambeti zülo qhoqhünheluve. Panongu kümtsü aheo lakhi-khi pesü ae eno panongu ye ameshoyi no mülà keu bohu lo müsüghüta no chhitoi shi pesü ae, tiye Alhou’w timiqo kighini ke.

⁹ Eno panongu no ishi ale kithé lakhi phe: “No ye liküküzü kaku ikhilu küzüpu ke eno tipau mekhapüa keu khaqhi küzüpu ke. kughengu no ye ghiqhive ke, eno shiaye jeli, atsa jeli piche kemi, timi amqo eno shiye jeli pelo Alhou’w timi shilu penike ghenguno O jì pesü qhüluve ke.

¹⁰ Nono panongu pelo akükaphu lo ningu Lhou qe penike ghenguno achinemi shipeke, eno panongu no ayeghi lo ayè pe nani.”

¹¹ Tisheno I no ju kelo ye kungumi kutomo kihikhakümla qhethonhe eno qhethonhe chighí kutólo akeu sütsa chilu. Panongu no aküka lakhü eno aküxü akeu lhoxüqo ngò sakiphemi muchomiqo sühomxaluve.

¹² Panongu no ighamuku ghi ishi piae: “Ghiqhive keu Ambeti ye aküka, aküakini, alokütsü, akumto agigihu, ajuküvü eno akishé ithulu küzüpu ke!”

¹³ Tisheno kungugha lo eno ayeghi shou eno ayeghi qhou eno azüghi lo, eno tipaqo lo lhoxü akeqo kümtsü no ishi pikeu I no chilu: “Aküka lakhü lo iqa akeu eno Ambeti lau akishé, agigihu, ajuküvü eno aküka alhokupuju lono alhokupuju kutólo ache pelo!”

¹⁴ Aküxü akeu lhoxü bidí no, “Amen,” ipi eno sakiphemi muchomiqo no qhoqhünhe pe no Ambeti mülae.