Piyeküsü 4 - Sümi Tiqhelimi Bible

Kungugha lo Aküka Lakhü

¹ Hipathiu I no ju kelo kungunhetsü kütau lakhi ithulu, ike tiye kungugha lo ahukikha lakhi khaqhi pesü I zülo akeu ithulu. Eno atüghi lo asütsa lakhi no afuko ghügha toi I pütsa keu I no chilu keu hu no ishi pi, “Hilau ikughilo eno hipathiu kiu shi moayesa nani keno I no O pìyenie.”

² Ghuthukhavi lono ni ye Aghungu no chhitoive, eno kungugha lo timi khami no aküka lakhü lo iqa akeu I zülo ipeghi.

³ Eno tile iqa akeu hu ye akughupu-tu eno amekusho-tu ju toi ke. Milisü lakhi no amekusho-tu lakhi toi vüipeghi no aküka lakhü sühomxa pesü ngove.

⁴ Aküka lakhü mukubidi kütau no aküka lakhü hu sühope ae, eno tilehi sakiphemi muchomi mukubidi no iqa ae. Panongu ye miyetsüghoi keu phimini pepua eno panongu kütsü lo ameshoyi no mülà keu aküka kütsükuqho ae.

⁵ Aküka lakhü tipau lono tsütsüpha kulo eno kong-kong shi tsütsü-küsü sütsa ipeghie. Eno aküka lakhü zülo akulu tsünì iqü ae. Hipaqo ye Alhou ghungu tsünì ke.

⁶ Eno aküka lakhü zülo ahiju züghi lakhi toi tsüghükhüi ae. Aküka lakhü homxa pe akeu mtá lo xü akeu lhoxü bidí ae, eno panongu nhethiqo hu no azüu eno athiu kümtsü küzüpe ae.

⁷ Xü akeu lhoxü atüghiu ye abongushuu toi, akiniù ye amishitsü toi, aküthüu no timi gi toi, eno abidiu ye aluqu yewu chekeu toi ke.

⁸ Aküxü akeu lhoxü lakhi-khi no achishibo tsügho pua eno achishibo qhou kutólo anhethi no küzüpe ae. Putho-pucho panongu no tamo no ishi piae: “ ‘Ampeu Alhou Akughushuu ye akimthe, akimthe, akimthe ke,’ pa ye acheghi, acheni eno ighi niye akeu ke.”

⁹ Kugho-kughomu aküxü akeu lhoxüqo no ajuküvü, agigihu eno shikimthi keu pesü aküka lakhü lo iqa akeu eno alhokupuju xüache keu tsüní keno

¹⁰ sakiphemi muchomi mukubidi no aküka lakhü lo iqa akeu zülo qhoqhünheluve no alhokupuju lono alhokupuju kutólo xü acheni keu mülá ke. Panongu no aküka lakhü zülo panongu küká kütsükuqho lhaqhi no ishi pi:

¹¹ “Ningu Mpeu eno Alhou, no ye ajuküvü ngò agigihu eno aküka ithulu küzü ke, kughengu nono thowkha kümtsü lhoqhi ke, eno O pulou lono panongu lhophe kehu panongu ye xü anike.”