Piyeküsü 3 - Sümi Tiqhelimi Bible

Sardis lo Akukuhou lau

¹ “Sardis lo akukuhouw kungumi lau yèlu ani: Atsa hipaqo Alhou’w aghungu tsünì eno ayepu tsünì pesü akeu tsa ke. I no O kümlà ithi anie; no ye xü akeu ghenguno ajekipi shi ani, ikemu no ye thivae.

² Ithughivelo! Kiu no aphi eno kiu no thive niye shivea keno tipau shikumtolo, kughengu I Lhou zülo nono akümlà shiqhimo no akeu I no phuluvae.

³ Tighenguno, nono kiu ithulu eno chilu keno kümsülulo; tipau mutotoi tsüqülulo, eno xaidelo. Ikemu nono ithumo aye, I no küpkami lakhi toi ighi nani, eno I no kiu dolo no O lau ighi nani keno no ye mtha nani.

⁴ Ikemu no ye Sardis lo timi hami kitiqemo kemi aphie. Panongu ye aphimini miyetsüghoi keu pepusü I gholo alà che nani kughengu panongu ye tishi küzü ke.

⁵ Khuu no tokuluu keno pa ghí panongu toi aphimini miyetsüghoi keu pepu nani. Ni ye aküxüpu kaku lono timi tipau je khilemu ikhivemo nani, ikemu I pù eno paw kungumiqo zülo no pa je piphe tsü nani.

⁶ Aghungu no akukuhouqo vilo kiu piani keno chilu nishi kemiqo pelo chilu pelo.

Philadelphia lo Akukuhou lau

⁷ “Philadelphia lo akukuhouw kungumi lau yè ani: Atsa hipaqo khuu no akimthe eno kuchou eno David’w khayi pesü ani keno pa tsa ke. Pa no kiu khaqhivea keno khunomu khamlae, eno pa no kiu khavea keno khunomu khaqhi mülae.

⁸ I no O kümlàqo ithi anie. Julo, I no O zülo khunomu khamla kepu hukikha khaqhipe qhipüani. No ye akumto kitila likhi akeu I no ithi ani, tishiaghimu no ye I tsa pape ke eno I je milivemo ke.

⁹ Khunoqo no Satan’w synagogmi keno eno khunoqo no panongu ye Jewmi kumomu Jewmi ipi pükha cheni püzü akimikimi keno, I no panongu pelo ighino O pukhu phivilo qhoqhünhe pe no ni ye O kimiye cheni kepi ithi pe nani.

¹⁰ I no kheakulu shilo pi azah tsü keu nono papelu keu ghenguno ayeghi lo xü akemiqo peju nike ayeghiqha kuchopu shou küghathabe niye shi akeu tüqhüdo lau no O peküsüve nani.

¹¹ Ni ye itheno cheni. Nono kiu pe ani keno tipau tsüqüpe ngo lo, tishianguno khiu pelomu O kütsükuqho ikhiluve pemo nike.

¹² Khuu no tokuluu keno I no pa pesü I Lhou chineki lo atsükucho lakhi shitsü nani. Eno panongu ye khilemu itaghi tipau-a qhivemo nani. I no panongu shou I Lhou je eno I Lhou’w mishighüna je yèpuku nani. I Lhou’w mishighüna je ye Jerusalem akitheu ke eno tiye kungugha lono I Lhou lau no iqi cheni ke. Eno I no I je akitheu ghí pesü panongu shou yèpuku nani.

¹³ Aghungu no akukuhouqo vilo kiu piani keno chilu nishi kemiqo pelo chilu pelo.

Laodicea lo Akukuhou lau

¹⁴ “Laodicea lo akukuhouw kungumi lau yè ani: Atsa hipaqo ye Amen’w ke, pükhübekulu eno thopi kuchou, Alhou no lhoqhipüa keu shou ayekipeu tsa ke.

¹⁵ I no O kümlàqo ithi ani, no ye akumkomu kumo eno akülǘmu kumoe. Ni ye O pelo khikhiumu shi aghí penishi anie.

¹⁶ Ike nono akumkomu kumo eno akülǘmu kumo no lüküpünha keu ghenguno ni ye I kichí lono O qhileve niye kutovae.

¹⁷ Nono, ‘Ni ye kiními ke; Ni ye aküakini kutomo pekütsüluvae eno thime lakhimu avehupu shi amoe,’ ipi cheni. Ikemu no ye ahaküsapu, kimiye kepu, athokhami, anhethi kighichemi, aphikümsa ngo ani kepi no ye mtha no anie.

¹⁸ O pelo kiními shilu penike ghenguno I no O vilo I lau no ami lono thakütsüghüve keu ameshoyi qhülulo; O phikümsa küküjo küzü nike ghenguno miyetsüghoi keu phimini pepu kepu qhülulo; eno O pelo ithulu penike ghenguno O nhethi lo sǘ kepu shikipivi qhülulo pi akükümsü O tsüke.

¹⁹ I no khunoqo kimiye cheni keno I no tipaqo lomipi eno ghasü cheni ke. Tighenguno pulopiniyi shilo eno xaidevelo.

²⁰ Julo! I no ahukikha lo puthugho no kukhu cheni. Khukhumu I sütsa chilu no ahukikha khaqhi aye, I no iloghi no timi tipau gholo chu nani, eno panongu no I gholo chu nani.

²¹ Khuu no tokuluu keno, I no tokulu shilu no I pù gholo pa küká lakhü lo iqa keu toi I no pa pelo I gholo I küká lakhü lo iqa pe nani.

²² Aghungu no akukuhouqo vilo kiu piani keno chilu nishi kemiqo pelo chilu pelo.”