Piyeküsü 22 - Sümi Tiqhelimi Bible

Aküxüpu Ghoki

¹ Tile no kungumi hu no aküxüpu zü ghoki I pìye. Aghoki tipau ye ighono tsüghükhüi eno tiye Alhou eno Ambeti küká lakhü lono qò ipeghi püzü

² Akimthe Mishighünaw alaghila kijè mtá lo qowu ae. Aghoki hukukuu eno hikukuu küma lo aküxüpu süboqo ae, eno aküxüpu süboqo lo axathi ghuthu chighikini pithí ae, tiye aqhi lo ghuthu lakhi-khi pithí ake. Eno aküxüpu sübo nipaqo hu ye shiyeqo shipivi nikeu ghenguno ake.

³ Akimthe Mishighüna tilehi Alhou no ghushove keu kiumu küha nani. Akimthe Mishighüna lo Alhou eno Ambeti pamaw aküka lakhü anani, eno Alhou qemiqo no pa mülá nani.

⁴ Panongu no Alhou ithulu nani, eno panongu kishe lo Alhou je yèpuku pe anani.

⁵ Tilehi khilemu àküzǘ tsalà küha nani. Panongu ye akulu küvü momu khetsünhe küvü avehupu shimo nani, kughengu Ampeu Alhou no panongu küvü shive nani. Eno panongu no alhokupuju lono alhokupuju kutólo ayè pe anani.

John ngò Kungumi

⁶ Kungumi no I vilo pi, “Atsa hipaqo ye pükhübekulupu eno kuchou ke. Ampeu Alhou khuu no tungkupumiqo lau müzüsütsü cheni keno, pa no pa qemiqo vilo thime hipaqo itheno shikupu moayesa akeu pìye niye paw kungumi puwu ke.”

⁷ “Julo! Ni ye itheno chenie! Khunoqo no liküküzü kaku hipau lo tungkuptsa yèpüa keqo ikhiluni keno tipaqo kümghae.”

⁸ Ni John no thime hipaqo chilu eno ithulu ke. Eno kughou I no tipaqo chilu eno ithulu keno, ni ye thime hipaqo I pìye akeu kungumi hu mülá niye pa pukhuphi lo qhoqhünheluve.

⁹ Ikemu pa no I vilo pi, “Tishi kevilo! Ni ghí no eno O gholo akemi tungkupumiqo eno liküküzü kaku hipau lo yèpüa keu tsaqo ikhilu chekemi kümtsü gholo aqemi lakhi ke. Alhou mülá lo!”

¹⁰ Tisheno pa no I vilo pi, “Liküküzü kaku hipau lo tungkuptsa akeqo mekha kevilo, kughengu ado ye kupunúvae.

¹¹ Khunoqo no achipikumo shi acheni keno panongu pelo tishi apelo; ayiküsami pelo ayiküsa shi apelo, khunoqo no achipiu shi acheni keno panoqo pelo achipiu shi apelo; eno akimthe timiqo pelo akimthe shi apelo.”

Ashekuhotsa: Kukusü eno Pikichi

¹² “Julo, ni ye itheno chenie! I saxu ye I gholo ani, eno timi lakhi-khi no pa no kiu müla püani keno tipau kiqi lono tsü nani.

¹³ Ni ye Alpha eno Omega ke, Atüghiu eno Ashekhau, Hukuthuu eno Kishekhau ke.

¹⁴ “Khuno no panow tiphiminiqo mithemighei aghíni keno panongu kümghae, tishianguno panongu ye khagho lono Akimthe Mishighüna lo ilolu no aküxüpu süboqo lono axathi chulu nikeu chipiu anani.

¹⁵ Akimthe Mishighüna khalau ye atsǜqo anie; tipaqo ye kuduu shi chekemiqo, kipito kimthe kumo, hekiqhimi, ajulho mülá chekemiqo eno khunoqo no kichileu kimiye no kichileu kümlà shiche keno tipaqo ke.

¹⁶ “Ni Jisü no ashepe hipau pesü akukuhouqo tsüpe niye iw kungumi nongu lau puwuvea ke. Ni ye David Kuhu-aghü eno pa Nuli-kughukomi ke, eno ni ye yevüqai keu Inaqhe Yepu hu ke.”

¹⁷ Aghungu eno külaliu no ishi pi, “Ighilo!” Khuno no chilu ani keno, “Ighilo!” pilo. Khuno no tüghüthi ani keno ighi pelo; eno khuno no aküxüpu zü kümsá ghò lunishi ani keno ikhilu pelo.

¹⁸ Liküküzü kaku hipau lo tungkuptsa chiluve kemiqo kümtsü lau I no pikichi ani: Timi khuala no tungkuptsa hipau lo kiuala alá süküpha aye Alhou no liküküzü kaku hipau lo püsa ghili pipüa keu pesü timi tipau ghimeqhi nani.

¹⁹ Eno timi khuala no tungkuptsa liküküzü kaku hipau lo pipüa keu tsaqo ikhive aye, Alhou no liküküzü kaku hipau lo aküxüpu süboqo eno Akimthe Mishighüna ghili pipüa keu lo timi tipau saje akeu ikhisüwuve nani.

²⁰ Khuu no thime hipaqo kümtsü shepe shi ani keno pa no ishi piani, “Julo, ni ye itheno chenie.” Amen. Ighilo, Ampeu Jisü.

²¹ Ampeu Jisü’w küpükini Alhou’w timiqo kümtsü gholo apeniu. Amen.