Piyeküsü 21 - Sümi Tiqhelimi Bible

Kungugha Kithe eno Ayeghi Kithe

¹ Tisheno I no “kungugha eno ayeghi kithé lakhi,” ithulu, kughengu kungugha atüghiu eno ayeghi atüghiu ye hauve, eno azüghi ye kühave ke.

² Eno Akimthe Mishighüna, khikhi Jerusalem akitheu keno, kungugha lo Alhou lau no iqi chekeu I no ithulu eno tiye külaliu no li kimi shi niye akeu ghenguno jukivi shi aghili kutò pesü akeshi iqighie.

³ Eno aküka lakhü lono asütsa kijè lakhi no ishi pikeu I no chilu, “Julo! Itehi ye Alhou no ngo chekeu-a ye timi gholo auvae, eno pa ye timiqo gholo xüacheuve nani. Panongu ye paw timi shive nani, eno Alhou ampi no panongu gholo anani eno panongu Lhou shive nani.

⁴ ‘Pa no panongu nhethi lono anhezü kümtsü isüve tsü nani. Tilehi khilemu akithí küha nani,’ mloqa keu, aküqa momu aghime kühave nani, kughengu aqau thimeqo ye wovae.”

⁵ Aküka lakhü lo iqa akeu hu no ishi pi, “I no thowkha akithé shitsü anie!” Tisheno pa no I vilo hi ghí pi, “Hipau yè lo, kughengu atsa hipaqo ye pükhübekulupu eno kuchou ke.”

⁶ Pa no I vilo pi: “Hi kümtsü tavae. Ni ye Alpha eno Omega, Hukuthuu eno Kishekhau ke. Tüghüthi akemi lau kümsá no aküxüpu züpuki lono azü tsü nani.

⁷ Khunoqo no tokulu shiluni keno panongu no hipaqo kümtsü ighílu nani, eno I no panongu Lhou shive nani eno panongu ye I nuliqo shive nani.

⁸ Ikemu bamsami, pülümo kemi, ayiküsami, hekiqhimi, kipito xüküpsami, kuduu shi chekemi, ajulho mülá chekemi eno akimkimiqo kümtsü huchuhuyi piti akeu amichu yizükucho lo vesüve nani. Hino akithí akiniù ke.”

Jerusalem Akitheu, Ambeti’w Külaliu

⁹ Kungumi tsünì dolo püsa tsünì no abohu tsünì chhitoi shi pesü akeu no ighi püzü I vilo ishi pi, “Ighilo, I no külaliu, Ambeti nipu O pìye nike.”

¹⁰ Eno pa no Aghungu lono naghuto kijè eno qhemghai keu lakhi lo I sasü wu no Akimthe Mishighüna, Jerusalem kungugha lo Alhou lau no iqi chekeu I pìye.

¹¹ Akimthe Mishighüna hu ye Alhou juküvü no yevüqai pesü ae, eno tipau küvü ye shishe akughupu chiku lakhi toi, eno akughupu-tu lakhi toi ighono tsüghükhüi ke.

¹² Akimthe Mishighüna lo aliwo kuputu kijè eno qhemghai keu ae eno tilehi khagho chighikini akeu lo kungumi chighikini no khaghoqo lo ngo ae. Khaghoqo lo Israel shiaye chighikini je yèpüa.

¹³ Kipelau no khagho küthü, ahuu no küthü, apéu no küthü, eno kulolau no küthü ishi ae.

¹⁴ Akimthe Mishighüna aliwo kuputu ye aboqha-tu chighikini ae, eno aboqha-tu tipaqo lo Ambeti’w apostolmi chighikini je yèpüae.

¹⁵ Kungumi I pütsa keu u lo Akimthe Mishighüna mighi nikeu, tipau khagho ngò aliwo kuputu mighi nikeu ghenguno ameshoyi no mülà keu kimghi küsǘ lakhi pesü ae.

¹⁶ Mishighüna hu ye akobidikujo lo lakhi toi eno akushu láu ngò akije lau aphiphi ke. Pa no akimighi küsǘ pesü mishighüna mighi kelo akushu láu ngò akije lau eno akiqhe lau kilometer 2,200 qhalo mighilu.

¹⁷ Kungumi hu no timi no mighi chekeu pesü aliwo kuputu mighike, eno tiye akishi lau aunhekipishe 200 shi aghí.

¹⁸ Aliwo kuputu hu ye akughupu-tu pesü mülàpüa, eno mishighüna ye kitiqemo keu ameshoyi no ahiju toi tsüghükhüi mülàpüa.

¹⁹ Mishighüna liwo kuputu boqha-tuqo lo akughupu-tu jeli kümtsü pesü tünananu shipuku pepüa. Aboqha-tu atüghiu ye jasper-tu no shipüa, akiniù no sapphire-tu, aküthüu no agate-tu no, abidiu no emerald-tu no,

²⁰ apunguu no onyx-tu no, akütsüghou no ruby-tu no, akütsüniu no chrysolite-tu no, akütacheu no beryl-tu no, akutokuu no topaz-tu no, achighiu no turqouise-tu no, chighiqhaqhiu no jacinth-tu no eno chighiakiniu no amethyst-tu no shipüa.

²¹ Khagho chighikini ye akughupu-tu chighikini ke, khagho lakhi-khi lo akughupu-tu lakhi no mülàpüa. Akimthe Mishighüna laghila ye ighono kijè eno tiye ameshoyi no mülàpüa eno ahiju jupilikulu hutoi tsüghükhüi ke.

²² Ni ye Akimthe Mishighüna lo achineki lakhimu ithumlae, kughengu Ampeu Alhou Akughushuu ngò Ambeti pama no Akimthe Mishighüna chineki ke.

²³ Akimthe Mishighüna shou yepüvü nikeu ghenguno khetsünhe momu aqhi avehupu shimoe, kughengu Alhou juküvü no tipau yepüvü tsü cheni eno Ambeti hu no tipau kulu ke.

²⁴ Shiye jeli no tipau küvü lono chewulu nani, eno ayeghi lo kükamiqo no panonguw kinikülü pesü tipau lo peighi nani.

²⁵ Atsala lakhimu Akimthe Mishighüna khagho hu ye khavemo nani, kughengu tilehi ye àküzǘ tsalà küha nani.

²⁶ Shiye jeli no tipau-a lo panongu ju-aje eno kinikülü pesü iloghive nani.

²⁷ Mithekumo jeli kiumu Akimthe Mishighüna lo ilo müla nani, khukhumu akukujopu momu pishikiqhi kümlà shi chekemi ye khilemu ilo müla nani, ikemu Ambeti’w aküxüpu kaku lo aje yèpüa kemiqo likhi no ilolu nani.