Piyeküsü 20 - Sümi Tiqhelimi Bible

Ampe Qhethonhe

¹ Tile no kungugha lono kungumi lakhi iqi chekeu I no ithulu, pa gholo aqokutho khayi ani eno pa u lo ayikichhe kijè lakhi tsüqüpe ae.

² Pa no tüghaküsa hu küghaluve no ampe qhethonhe lakhi ghenguno tsüghape qhive. Tüghaküsa tipau ye khaghilow apighike, pa ye tüghami momu Satan ke.

³ Kungumi hu no aqokutho lo tüghaküsa vesüve eno ampe qhethonhe kishekhamo ke kutólo tüghaküsa pelo shiyeqo pishiqhipemo niye pa khathave no mekhave. Tipathiu tüghaküsa ye ado ikhonhei ghenguno ghuthu lakhi khaqhiphe moayesa nani.

⁴ I no aküka lakhüqo ithulu eno tipaqo lo küghathabe penike kükagha tsüve kemiqo no iqa ae. Eno Jisü ghili pesü ashepe shi eno Alhou tsa pesü asheshu keu ghenguno akütsü lovetsü kemiqo ghungu I no ithulue. Panongu ye tüghashi momu tipau julho mülámoe eno panongu ye panongu kishe momu panongu u lo tüghashi michi xapumoe. Panongu ye xüchilethuve no Khristo gholo ampe qhethonhe lakhi ayè pe ke.

⁵ (Thive kemi kütamiqo ye ampe qhethonhe hu kishekhave moke kutólo xülethughimoe.) Hino kithimiqo xülekuthu shikeu atüghiu ke.

⁶ Khunoqo no xülekuthu shikeu atüghiu lo küsajelu keno panongu ye akimthemiqo ke eno panongu ye shishe müghae. Akithí akiniù ye panongu shou aküka küha nani, ikemu panongu ye Alhou eno Khristo’w achinemiqo shi nani eno Khristo gholo ampe qhethonhe lakhi ayè pe nani.

Satan shou Küghathabe keu

⁷ Ampe qhethonhe lakhi tave kethiu, Satan ye pa kughuki lono khaqhipheve

⁸ no ayeghi cheku bidí lo shiyeqo—tiye Gog ngò Magog shiyeqo—pishiqhi no aghüshini ke ghenguno panongu hekütsü niye wu nani. Panongu kikihi ye azüghi mükü lo asàye toi ke.

⁹ Panongu no ayeghiqha nhachhive eno Alhou’w timiqo no ngo chekeu ghazü eno pa no kimiye chekeu mishighüna süholuve. Ikemu kungugha lono ami iqighi no panoqo pitiqhive.

¹⁰ Eno panongu pishiqhive keu tüghami hu ghí tüghashi ngò kichileu tungkupuu pama vesüve no pitiqhi akeu amichu yizükucho lo vesüve. Panongu ye putho-pucho alhokupuju lono alhokupuju kutólo ghimeqhi anani.

Kithimi shou Küghathabe keu

¹¹ Tile no miyetsüghoi keu küká lakhü kijè lakhi eno tipau shou timi lakhi iqa akeu I no ithulu. Ikelo ayeghi eno kungughaqo no pa lau no pove, eno tipaqo ithulu kithemove.

¹² Eno I no kithimi kijemi eno kitilami kümtsü ithulu. Panongu ye aküka lakhü zülo puthugho ae, eno kakuqo lhaphe pesü püae. Kaku kütau lakhi lhaphe, ikelo tiye aküxüpu kaku shiae. Kithimiqo ye kakuqo lo panongu kümlà yekithi pesü qhipepüa keu kiqi lono küghathabeve.

¹³ Azüghi lo kithimi akeqo hu ye azüghi no pesü tsüve, eno akithí ngò Hades lo kithimi akeqo hu ghí pama no pesü tsüve, eno kithimi hipaqo lakhi-khi lau panongu no mülàpüa keu kiqi lono küghathabeve.

¹⁴ Tipathiu akithí ngò Hades pama ye pesü ami yizükucho lo vesüve. Ami yizükucho hipau ye akithí akiniù ke.

¹⁵ Khukhumu aküxüpu kaku lo aje yèpüaghimo kemi ye ami yizükucho lo vesüve.