Piyeküsü 2 - Sümi Tiqhelimi Bible

Ephesus lo Akukuho lau

¹ “Ephesus lo akukuhouw kungumi lau yèlu ani: Atsa hipaqo ye au ajeu ayepu tsünì pesü akeu eno ameshoyi no mülà keu akulu ghopeqhi püakeqo dolo alà che akeu tsa ke.

² I no O kümlàqo, nono ime mülà akeu eno nono tsükhoi shi akeu ithi ani. No ye küsaküghamiqo lau küsüqhilu chemo keu I no ithi ani eno nono apostolmi kumomu apostolmi kepi pükha chekemiqo peju no panongu ye kichileu kepi phupheluve keu ghí I no ithi ani.

³ No ye tsükhoi shi no I je ghenguno aghime kutuuluve ke eno no ye akulho shivemo ke.

⁴ Tishiaghimu ni ye O vilo ishi muchho nishi ani: No ye atüghi lo I kimiye cheke toi kimiyemovae.

⁵ No ye khikuto lo veqhivea keno kümsüjulo! Xaideghivelo eno nono atüghi lo mülà keu kümlàqo shilo. Nono xaidevemo aye I no O lau ighi nani eno O kulu ghopeqhi püakeu-a lono ikhive nani.

⁶ Ikemu hipau no O saphu ani: No ye Nicolait papemiqo no shi chekeqo mithi ke, ni ghí tipaqo mithi cheni ke.

⁷ Aghungu no akukuhouqo vilo kiu piani keno chilu nishi kemiqo pelo chilu pelo. Khuu no toluvea keno pa pelo Alhou ghuno-a lo aküxüpu sübo akeu lono chulu pe nikeu I no azah tsü nani.

Smyrna lo Akukuho lau

⁸ “Smyrna lo akukuhouw kungumi lau yèlu ani: Atsa hipaqo ye khuu no Atüghiu eno Ashekhau, khuu no thive no aküxü shiluve keno tipau tsa ke.

⁹ O ghime eno O thokha I no ithi ani, tishiaghimu no ye kinikülü ke! Timi pipüsa chekemiqo no Jewmi kumomu Jewmi kepi pi cheni keno I no panongu ghili ithi ani kughengu panonguw synagog ye Satan’w ke.

¹⁰ Nono imeve niye akeu ghenguno msà kevilo. I no O vilo piani, tüghami ye nongu peju nike ghenguno akughuki lo nongu khami sǘ nani, eno nongu ye atsala chighí kutólo pishi-puju no ghimeqhi nani. Ikemu akithí kutólo pükhübekulu shilo, tishiaye I no aküxüpu pesü ow tokulu kütsükuqho shitsü nani.

¹¹ Aghungu no akukuhouqo vilo kiu piani keno chilu nishi kemiqo pelo chilu pelo. Khunoqo no toluvea keno akithí akiniù ye khilemu pa ghüza müla nani.

Pergamum lo Akukuho lau

¹² “Pergamum lo akukuhouw kungumi lau yèlu ani: Atsa hipaqo ye tsüghaminhei keu puto-puto kihizüta pesü akeuw ke.

¹³ Nono khile acheni keno Satan küká lakhü ghí tilehi ani kepi I no ithi ani. Tishiaghimu no ye I je phevemo ke. Iw pükhübekulu thopiu Antipas pesü ow mishighüna khilehi Satan no ngo cheni keno tilehi no pa pìthíve ke ghuloki lo ghí no ye I shou aküpülü akeu phevemo ke.

¹⁴ Tishiaghimu, ni ye thime hami O vilo pi kepu ani: Nongu dolo khami ye Balaam kükütsü pape chekemi ani. Balaam ye Israelmiqo zü sasü axiné shive peniye Balak shika ke, eno tishi keu vechewo Israelmiqo ye ajulho lhou müláve keu chuqu chuve eno kipito xüküpsa kümlà shike.

¹⁵ Tihutoi, O gholo ghí Nicolait papemiqo kükütsü tsa pape chekemi anie.

¹⁶ Tighenguno axiné lono xaideghivelo! Tishimo aye, I no nongu lau pai ighino I kichí lo kihizüta pesü panongu sasü kichighi nani.

¹⁷ Aghungu no akukuhouqo vilo kiu piani keno chilu nishi kemiqo pelo chilu pelo. Khuu no tokuluu keno, I no manna küsüpüa keu khami pesü tsü nani. Tisheno I no itaghi atu miyetsüghoi keu lakhi lo aje kithé lakhi yèpuku no timi tipau tsü nani. Eno tiye timi khuu no tipau ithuluni keno pa likhi no ithi nani.

Thyatira lo Akukuho lau

¹⁸ “Thyatira lo akukuhouw kungumi lau yèlu ani: Atsa hipaqo ye Alhou Nu tsa ke. Pa nhethi ye vüqalei keu ami toi ke eno pa pukhu ye alazayi piti kütsüghǘ pesü mülapuyi akeu toi ke.

¹⁹ Nono shikeqo, ow kikimiye ngò aküpülü, O kümlàqo eno nono tsükhoi shikeu eno nono atüghi lo mülà keu nguno alau itehi mülà akeu I no ithi ani.

²⁰ Tishiaghimu, ni ye O vilo hipau pi kepu ani: Nono Totimi Jezebel khuu li likhi li pesü tungkupumi lakhi ipi pi cheni keno li lau küsüqhi tsüke. Li kükütsü vechewo li no I qemiqo saküghüzü sasü kipito xüküpsa kümlà ngò ajulho müláve keu chuquqo chuve pe ke.

²¹ Li xüküpsa lau no xaideve penike I no ado li tsüke, ikemu li ye pulo amoe.

²² Tighenguno I no aghime lipa lo li vedave nani, eno khunoqo no li gholo küqha no shupu kümlà shi cheni keno panongu no xaideghimo aye li gholo no aghime kitikhi shi ime pe nani.

²³ I no li nuliqo ghüza pe pìthíve nani. Tishive aye akukuhouqo kümtsü no ni ye timi mlo eno akükümsü phuju chekeu hu ke ipi ithi nani, eno I no nongu kümlà kiqi lono nongu lakhi-khi lau qesaxu tsü nani.

²⁴ Thyatira lo nongu khunoqo no li kükütsü pape chemo eno Satan’w tuqho-tugho mtha aphi keno, I nongu kümtsü vilo hi piani, ‘Ni ye nongu shou amakho kütau kiumu bemo nani,

²⁵ ikemu nongu ye I no ighimo ke kutólo nongu u lo kiu ani keno tipau tsüqüpe ngo lo.’

²⁶ Khuu no tokulu shilu eno ashekha kutólo I pulou shiluni keno, I no shiyeqo shou kükagha tsü nani.

²⁷ I no I pù lau no kükagha ithulu keu toi pa no ‘ayì küsǘ pesü panongu shou ayè pe nani eno ayeghi lì toi panongu kubopiniyive tsü nani.’

²⁸ I no inaqhe yepu ghí pa tsü nani.

²⁹ Aghungu no akukuhouqo vilo kiu piani keno chilu nishi kemiqo pelo chilu pelo.