Piyeküsü 19 - Sümi Tiqhelimi Bible

Babylon Ikiqive keu Lokivi Le

¹ Hipathiu kungugha lono aqokitikhi kijè ghügha lakhi toi keu sütsa I no chilu: “Hallelujah! Xakulupu, ajuküvü eno aküka ye ningu Lhou’w ke,

² kughengu paw küghaküthaqo ye kuchou eno achipi ke. Pa no kütüqhalimi ajekipiu khuu li shi-aji ghasükümla vechewo ayeghiqha shikuchubeve keno tipau kiléqhive ke. Pa no li shou pa qemiqo jì peleve keu mükhü luvae.”

³ Tisheno panongu no itaghi ishi ighae: “Alhou sheqhelo! Li piti keu michhi hu ye alhokupuju lono alhokupuju kutólo pho ipeghi anani.”

⁴ Sakiphemi muchomi mukubidi eno aküxü akeu lhoxü bidí no qhoqhünheluve no aküka lakhü lo iqa akeu Alhou müláe. Eno panongu no ishi ighamuku: “Amen, Halleluyah!”

⁵ Tisheno aküka lakhü lono asütsa lakhi no ishi pi: “Nongu pa qemi kümtsü, nongu pa sümsa chekemiqo, kijemi kitilami kümtsü ningu Lhou sheqhelo!”

⁶ Tipathiu timi aqokitikhi kijè no azü qowu akeu ghügha eno tsütsü-küsü kuloghi toi keu ghügha lono ishi ighamuku keu I no chilu: “Hallelujah! Kughengu ningu Mpeu Alhou Akughushuu no ayè pe anie.

⁷ Ningu alovisheni eno alovini eno ajuküvü pa tsüní nolo! Kughengu Ambeti’w külakupu ye ighivae, eno paw külaliu ye kutò pe ngovae.

⁸ Phephei keu phì, yevüqai eno mithemighei keu pesü li pelo upenike tsüe.” (Phephei keu phi hu ye Alhou’w timiqo no achipiumikucho kümlà shikeu hu ke.)

⁹ Tipathiu kungumi hu no I vilo ishi pi, “Hipau yè lo: Ambeti wu külakupu ghulhu lo khunoqo kusüni keno tipano kümghae!” Eno pa no I vilo hi ghí pi, “Hipaqo ye Alhou’w kuchou tsaqo ke.”

¹⁰ Pa no hipau pi kelo ni ye pa mülá niye pa pukhuphi lo qhoqhünheluve. Ikemu pa no ishi pi, “Tishi kevilo! Ni ye no ngò O thiküzümi eno O achelimi khunoqo Jisü kükütsü pape cheni keno tipaqo gholo lakhi ke. Alhou mülá lo! Kughengu tungkuptsa Ghungu kümlà ye timiqo pelo Jisü shepe shilu pe nikeu ke.”

Kungugha Ghütomi no Tüghashi Theqhive

¹¹ Tile I no kungugha hukikha khaqhipüa keu ithulu eno I zülo khurshi miyetsüghoi keu lakhi ae, tipau küsáu vilo Pükhübekulu eno Kuchou ipi kue. Amikucho pesü pa no küghathabe eno aghüshi ke.

¹² Pa nhethi ye ami vüqalei keu toi ke, eno pa kütsü lo aküka kütsükuqho kutomo ae. Pa ye aje lakhi pa phimpi lo yèpuku pepüa kemu pa likhi no kumo aye timi khumu aje tipau ithimoe.

¹³ Pa ye chijeboboi-phi ajì lo pütsüve keu pepu ae, eno Alhou Tsa ipikeu no pa je shiae.

¹⁴ Kungugha ghüshimiqo no miyetsüghoi keu khurshi sasü phephei keu phì miyetsüghoi eno mithemighei shi pepusü pa pape che.

¹⁵ Pa kichí lono tsüghaminhei keu akihizüta ipeghi ae eno tino shiyeqo kütsave nikeu shi ake. “Ayì no mülà keu akükau küsǘ pesü pa no panongu shou ayè pe nani.” Pa no atsaizü kütsüghǜ-a lono atsaizü tsüghüphe akeshi Akughushu Lhou’w muqhumüza keu loghu tsüghüphe nani.

¹⁶ Paw ubephi eno paw alukobo lo aje hitoi yèpüa: Kükamiqo shou akükau eno ampemiqo shou ampeu.

¹⁷ Ikelo kungumi lakhi khetsünhe lo puthugho akeu I no ithulu. Pa no asütsa kijè lakhi lono kunguu amlhü lo aghau yechekeqo kümtsü vilo ighamuku ghi ishi pi, “Ighilo, Alhou’w aghulhu kijè ghenguno aqoshi kumqolo,

¹⁸ tishianguno nongu pelo kükamiqo, ghüshimiqo shou atou eno aghütomiqo, khurshi eno tipau küsámiqo, kuqhopheve kemi eno aqüaxemiqo, kijemi eno kitilami kümtsü shi chu peniye ke.”

¹⁹ Tile no tüghashi ngò ayeghi lo kükamiqo eno panonguw ghüshimiqo no khurshi küsáu eno paw ghüshimiqo sasü aghüshi niye aqoshi kumqo akeu I no ithulu.

²⁰ Ikemu tüghashi hu ye küghaluve, eno pa gholo kichileu tungkupumi khuu no pa züqhu shi amichipu kümlàqo shi akeno tipaqo ghí küghaluve. Amichipu hipaqo pesü pa no tüghashi michi xapu akeqo ngò pa julho mülá chekeqo pishiqhike. Tüghashi ngò kichileu tungkupuu pama ye kügha pesü ami no piti akeu amichu yizükucho lo aküxü no vesüve.

²¹ Pama nguno alau kütamiqo ye khurshi küsáu kichí lono akihizüta ipeghi keu no ghiqhikhave, eno aghauqo kümtsü no chulu ke thaqhü panongu shi chuve.