Piyeküsü 18 - Sümi Tiqhelimi Bible

Babylon Ikiqive keu

¹ Hipathiu kungugha lono kungumi kütau iqighi keu I no ithulu. Pa ye kükagha kijè pe ake, eno paw qhivütsüni keu hu no ayeghi kuchopu yepüvü pe ae.

² Asütsa kuloghi lakhi lono pa no ishi igha: “ ‘Babylon ajekipiu ye ikiqivae! Ikiqivae!’ Li ye tüghamiqo ghenguno akùngó-a lakhi shivae eno mithekumo ghungu kümtsü, mithekumo ghau kümtsü, mithekumo eno junishimo keu lhoxü kümtsü küghütshü-a lakhi shivae.

³ Kughengu shiye kümtsü no li shi-aji ghasükümla ji shomzüvae. Ayeghi lo kükamiqo no li sasü asalha kümlà shike, li no ihulo nibonilei keu ghenguno ayeghi lo alhikishimiqo ye kiními shilukhavae.”

Babylon’w Küghakütha lono Pokajolu peniye Pikichi keu

⁴ Tipathiu kungugha lono itaghi asütsa lakhi no ishi pikeu I no chilu: “ ‘Iw timiqo, li lau no ipeghivelo,’ tishianguno nongu ye li xinéqo gholo küsajemo nani, eno nongu ye li ghimeqhi niye akeu ghime kiumu ithulu pemo nani ke;

⁵ kughengu atsütsǘ kutólo li xinéqo kisheqhe puku pesü ngovae, eno Alhou ye li no ayeza hexave keqo kümsü pesü anie.

⁶ Li no tsü keu toi li lau tsüchilelo; li no kiu shive keno tipau küghüsü ghí li. li no aji kütami pìye keu küghüsü ghí li jikhu lo lesü tsülo.

⁷ Li no ajekipi eno nibonilei shi xü keu toi aghime eno amlokighishi tijehi li tsülo. Li ye li mlo lo aqheküza shi ishi pi cheni, ‘Ni ye akükaliu toi aküka lakhü lo iqa ani. Ni ye chimemi lakhi kumoe; Ni ye khilemu mloqamo nani.’

⁸ Tighenguno liw püsaqo no ghulo lakhi ye li shou ikughive nani: tiye akithí, amloküsa eno püqümiye ke. Li ye ami no pitiqhive nani, kughengu Ampeu Alhou khuu li shou küghathabe cheni keno pa ye akughushuu ke.

Babylon Ikiqive keu lo Ahasapu

⁹ “Kughou ayeghi lo kükami khunoqo no li sasü asalha kümlà shiche eno li no nibonilei shi xü keu küsaje chekeqo no li pitiqhi akeu michhi ithulu keno, panongu ye li ghenguno anhezü-piji eno mloqa nani.

¹⁰ Li ghimeqhi akeu jupe akichiqhive no panongu ye putou puthugho no hitoi qa nani: “ ‘Ahasapue! Mishighüna ajekipiu, O Babylon mishiphughi akughushuu! O ghenguno ahasapue! Ayì kihedo lakhi dolo no O ghenguno kishekha tsalà ighivae!’

¹¹ “Ayeghi lo alhikishimiqo no li ghenguno anhezü-piji eno mloqa nani kughengu khunomu panonguw alhikishi ki lono qhümove nani.

¹² Panongu lhikishi ki lo tinhemügha hipaqo kutomo je anani: ameshoyi, ghükayi, akughupu-tu eno mülapuchi; phephei keu phì, hughai keu phì, atayeho phì eno huchuhuyi keu phì; axokütsüngü sǜ jeli kümtsü, akühahu no mülà keu thime jeliqo, amekusho sü, alazayi, ayì eno chunutuqo no thime mülà keu jeli kümtsü;

¹³ aküsá eno vepuju, tsüngqüimukhu, axokütsüngüta eno müsüghüta, atsaiji ngò olive thazü, ashokukubo ngò ashothi akiviu; pichepighi ngò ambe; khurshi ngò khurkulu; eno timiqo pesü aqüaxemi shi jea ke.

¹⁴ “Panongu no ishi pi nani, ‘Nongu no axathi lunishiqhiyi achekeu ye nongu lau no wuvae. Nongu no nibonilei eno qhivütsüni shi xü chekeu ye hauvae, eno tiye khilemu ithulu chile müla nani.’

¹⁵ Alhikishimi khunoqo no thime hipaqo je no li lau no panongu kiní alá shiluve keno panongu ye li ghimeqhi akeu ju pesü akichiqhive no putou puthugho nani. Panongu no anhezü-piji eno mloqa nani

¹⁶ eno ishi igha qa nani: “ ‘Phephei keu phì, hughai keu phi, eno huchuhuyi keu phi pepu akeu eno ameshoyi, akughupu-tu eno mülaputu no phuphui shi akeu mishighüna ajekipiu, O ghenguno ahasapue! Ahasapue!

¹⁷ Ayì kihedo lakhi lono kinikulu hipaqo kümtsü pühavae!’ “Zükilu lo kepten kümtsü, zükilu lono izǘ chekemi, zükilu küsámi eno azüghi lono aqe qechu chekemi kümtsü no putou puthugho nani.

¹⁸ Kughou panongu no li pitiqhi akeu michhi ithuluni keno, panongu no ishi igha nani, ‘Mishighüna ajekipiu hipau toi keu mishighüna lakhimu ache keshea?’

¹⁹ Panongu no ayeghimukhu pesü panongu kütsü lo vepuku nani, eno anhezü-piji eno mloqa ghi ishi igha nani: “ ‘Mishighüna ajekipiu, O ghenguno ahasapue! Ahasapue! azüghi lo zükilu akemi kümtsü li küakini vechewo kiními shilu ke! Ayì kihedo lakhi dolo no li ye kütsakungovae!’

²⁰ “Nongu kungugha lo akemiqo, li kütsave keu lo alovishelo! Nongu Alhou’w timiqo, alovishelo! Apostolmi ngò tungkupumiqo, alovishelo! Kughengu li no nongu shou küghathabe keu pesü Alhou no li shou küghathabevae.”

Babylon Küxü Kishekha

²¹ Tile no kungumi kumto lakhi no athi kütsüghǜ tuqu qhemi atu kijè lakhi ikhipesü azüghi lo vesüve, eno ishi pi: “Mishighüna ajekipiu Babylon ye khilemu ithulu kithe müla kepu shi hitoi muqhumüzai vepiqive nani.

²² Aheo küighamiqo le eno alekiphemi, fulili eno afuko küigha chekemi lephe O lau no khilemu chilu kithemove nani. Külalú kümlà kishimi lakhimu O lau no ithulu kithemove nani. Athì kütsüghǜ sütsa O lau no khilemu chilu kithemove nani.

²³ Akulu küvü hu ye O lolo khilemu vüipeghi kithemove nani. Külapuu ngò külaliu sütsa hu ye O lau no khilemu chilu kithemove nani. Ow alhikishimiqo ye ayeghiqha lo ighono akhotomi shi acheke. Nono saqhi-sali kichileu shikeu vechewo shiyeqo kümtsü pishiqhi khave ke.

²⁴ Babylon mishighüna lono tungkupumiqo ngò Alhou’w akimthemi ayeghiqha lo ghiqhive keqo kümtsü jì aghíe.”