Piyeküsü 17 - Sümi Tiqhelimi Bible

Babylon eno Kütüqhaliu

¹ Kungumi tsünì dolo abohu tsünì pe akeu no ighino I vilo ishi pi, “Ighilo, kütüqhaliu ajekipiu khuu azüghi kutomo phivilo iqa acheni keno li ghimeqhi niye akeu I no O pìye nike.

² Ayeghi lo kükamiqo no li sasü asalha kümlà shike, eno ayeghi lo xüküamiqo ye li no shupu keu ji yepusü shomzüvae.”

³ Tisheno kungumi no Aghungu lono I sasü küghünamokeu-a lakhi lo sawuve. Tilehi totimi lakhi no huchuhuyi keu tüghashi lakhi shou iqa akeu I no ithulu. Tüghashi tipau phi lo Alhou pipütha keu aje chhitoi yèpukupüa eno pa ye akütsü tsünì eno akibò chighí puae.

⁴ Totimi hu ye hughai keu eno huchuhuyi keu phimini, eno ameshoyi, akughupu-tu eno meshotu phuphui keu pepu ae. Li ye li u lo ameshoyi no mülà keu jikhu pesü ae, eno ajikhu tipau lo aphikümqhüpu thimeqo ngò liw kipito kimthe kumo no chhitoi shipe ae.

⁵ Li kishe lo aje yèpüa keu hu ye tuqhou lakhi ke: Babylon ajekipiu kütüqhamiqo eno ayeghi lo aphikümqhüpu kümtsü pazá.

⁶ Totimi hu ye Alhou’w akimthemi khunoqo no Jisü shepe shiche keno tipaqo jì shomzüpüsü akeu I no ithulu. Kughou I no li ithulu keno, ni ye ighono akümzave.

⁷ Ikelo kungumi hu no I vilo ishi pi: “No ye kushiye akümza ani kea? I no O vilo totimi hipauw tuqhou eno li no akütsü tsünì ngò akibò chighí akeu tüghashi sà chekeu ghili chixechilei pi nani.

⁸ Nono tüghashi khikhi ithulu keno tihu ghuthu lakhi ye xüache, ikemu itehi ye kühavae, tishiaghimu ghuthu lakhi aqokutho lono ipeghi püzü kütsakungove nike wu nani. Ayeghi lhophe ke lono aküxüpu kaku lo ayeghi lo xüküami khunoqo je yèpüaghimo nike no panongu ye tüghashi hu ithulu kelo akümzave nani, kughengu tüghashi hu ye ghuthu lakhi xüache, ikemu itehi ye kühavae, eno tishiaghimu ghuthu lakhi ipeghi nani ke.

⁹ “Hipau lo alokütsü akeu kükümsü avehupu shi anie. Akütsü tsünì ye totimi hu no iqa chekeu ato tsünì hu ke.

¹⁰ Akütsü tsünì ye kükami tsünì ghí ke. Pungu ye ikiqiva, lakhi ye itehi akeu, eno lakhiu ye ighi mphi ke; ikemu kughou pa no ighini keno pa ye ado kitila ghengu likhi ngo moayesae.

¹¹ Tüghashi khuu xüache püzü itehi ye kühavea keno tipau ye akükau akütacheu ke. Tipau ye tsünì dolo lakhi ke eno pa ye kütsakungove niye wucheni ke.

¹² “Nono akibò chighí ithulu keu ye akükaphu ithulumo no akeu kükami chighí ke, ikemu panongu ye tüghashi gholo no ayì kihedo lakhi ghenguno kükami toi kükagha ithulu nani.

¹³ Panongu küká ngò kükagha pesü tüghashi hu tsüve nikeu lo panongu ye akükümsü lakhi shi nani.

¹⁴ Panongu no Ambeti sasü aghüshi nani, ikemu Ambeti no panongu shou toluve nani kughengu Ambeti ye ampeuqo shou Ampeu eno kükamiqo shou Akükau ke, eno pa gholo pa no kulùve kemi, kisheluve kemi eno pükhübekulumi pa pape chekemiqo anani ke.”

¹⁵ Tisheno kungumi hu no I vilo ishi pi, “Nono kütüqhaliu no iqa akeu azü ithulu keu ye timi jeli, aqokitikhi jeli, shiye jeli eno atsa jeli piche kemiqo ke.

¹⁶ Nono tüghashi eno akibò chighí ithulu keu hu no kütüqhaliu mithi nani. Panongu no li kütsave nani eno li phimini xave tsü nani; panongu no li sükumo shi chu nani eno ami pesü li pitive nani.

¹⁷ Kughengu Alhou tsaqo shikupumo ke kutólo Alhou no pa kimiji shikupu nike ghenguno kükami chighí mlo pütsave tsü püzü panongu pelo panonguw kükagha pesü tüghashi u lo sǘvetsü nikeu lo puloluve pe nani.

¹⁸ Nono totimi ithulu keu hu ye ayeghi lo kükamiqo shou ayè pe achekeu mishighüna ajekipiu ke.”