Piyeküsü 16 - Sümi Tiqhelimi Bible

Alhou Loghukighide Bohu Tsünì

¹ Ikelo achineki lono asütsa kijè lakhi no kungumi tsünì vilo ishi pikeu I no chilu, “Wulo, Alhou loghukighide bohu tsünì pesü ayeghi shou lepuku lo.”

² Kungumi atüghiu no wu püzü pa bohu pesü ayeghi shou lepuku, eno tüghashi kikihi michi pua kemiqo ngò tüghashi julho mülá ache kemiqo shou anikupu piyí juküsapu shi ipeghie.

³ Kungumi akiniù hu no pa bohu pesü azüghi lo lesü, ikelo azüghi zü no timi thive kemi lakhi jì toi ilhove, eno azüghi lo lhoxü jeli xü akeu kümtsü thive.

⁴ Kungumi aküthüu hu no pa bohu pesü aghoki eno azüpuki lo lesü kelo ye tipaqo no ajì ilhokhave.

⁵ Tile no azü jukuto akeu kungumi hu no ishi pikeu I no chilu: O Akimtheu, nono hipaqo shou küghakütha shikeu ye achipi ke, No ye achekeu eno acheghi keu ke;

⁶ kughengu panongu no ow akimthemi eno tungkupumiqo jì pele ke, eno panongu no ithulu küzüpu shi akeu toi nono ajì pesü panongu pelo ye penike tsüe.

⁷ Ikelo akümlá-khache no ishi khochile keu I no chilu: “Iyei, Ampeu Alhou Akughushuu, ow küghaküthaqo ye kuchou eno amikucho ke.”

⁸ Kungumi abidiu no pa bohu pesü khetsünhe shou lepuku, eno khetsünhe pelo ami pesü timiqo ghaqhi pe.

⁹ Akülǘ kümka hu no timiqo pitiqhi kelo panongu no püsa hipaqo ghasüpe akeu Lhou je ghushoqhi, ikemu panongu ye amlo pebide no Alhou juküvü shini keu milive ke.

¹⁰ Kungumi apunguu no pa bohu pesü tüghashi küká lakhü shou lepuku, ikelo tüghashi kükaphu hu ye àküzǘ no chhive. Kushuküqha láu no timiqo no panongu mili tsathae

¹¹ eno panongu küsü ngò apiyí ghenguno panongu no kungugha Lhou ghushoe, ikemu panongu ye panongu no kiu shive keno tipaqo lono amlo pebide nikeu milive ke.

¹² Kungumi akütsüghou no pa bohu pesü Euphrates ghoki kijè shou lepuku, tile no kükami kipelau no chekeqo pelo pülalu peniye aghoki hu ye qhayive pe.

¹³ Tisheno I no mithekumo ghungu küthü achuyí kimihi shikeu ithulu; tipaqo ye tüghaküsa ngò tüghashi eno kichileu tungkupumi kichí lono ipeghi.

¹⁴ Tüghaküsa ghungu tipaqo ye amichipu kümlà shi chekeqo ke, eno panongu ye ayeghiqha kümtsü lo kükamiqo lau wu no Alhou Akughushuu tsalà kijè lo aghükishi ghenguno panongu hekütsü niye wuche ke.

¹⁵ “Julo, ni ye küpkami lakhi toi ighini cheni! Timi khuu no züida aghí püzü tiphimini pepumini aghíni keno tipano kümghae, kughengu pa ye aphikümsa iqho-iqimo nani eno timi gizülo akukujopu shivemo nani.”

¹⁶ Tisheno panongu no Hebrew tsau no Armageddon ipi ku chekeu-a lo kükamiqo hekütsüe.

¹⁷ Kungumi akütsüniu no pa bohu pesü amlhü lo lepuku, ikelo achineki lo aküka lakhü lono asütsa kijè lakhi ipeghino ishi pi, “Hiye tavae!”

¹⁸ Tile no tsütsüpha kulo ipeghi eno kong-kong shi tsütsü-küsü shi, eno ayeghi küghütha kijè ighie. Timi no ayeghi lo xü ighi kelo ayeghi küghütha hitoi keu khilemu ighiju mphie kughengu tiye ighono kijè ke.

¹⁹ Ayeghi küghütha no Babylon mishighüna hu ye kokütha küthü shi kijethave tsü, eno ayeghiqha lo mishighünaqo kutomo ikiqive no kubopiniyive. Alhou no Babylon Ajekipiu kümsülu no paw muqhumüzai keu loghukighidew aji pesü ajikhu chhitoi sü no li pelo shope.

²⁰ Züdoyeghi kümtsü hauve eno naghutoqo kümtsü külaqave.

²¹ Atsütsǘ lono murasü kuloghi no timiqo shou ikighi. Murasü lakhi-khi lo ahú lhobidi-pungu kutólo ke. Eno murasü püsa ghenguno timiqo no Alhou ghushoe, kughengu püsa tiye shishe aküighüpu ke.