Piyeküsü 15 - Sümi Tiqhelimi Bible

Kungumi Tsünì Gholo Püsa Tsünì

¹ I no kungugha lo amichipu kijè eno akichiqhipu kütau lakhi ithulu: tiye kungumi tsünì no püsa tsünì ashekhau pesü akeu ithulu. Hiye ashekhau ke, kughengu panongu vechewo Alhou loghukighide ye kishekhave nikeu shi ake.

² Eno I no ju akelo ahiju züghi toi keu lakhi lo ami yebide akeu toi ithulu, eno azüghi tipau phivilo khunoqo no tüghashi eno tipau julho eno pa je kikihi shou toluve keno tipaqo no puthugho ae. Panongu ye Alhou no aheo tsü keqo pesü ae

³ eno panongu no Alhou qeu Moses le ngò Ambeti le ishi phea: “Ampeu Alhou Akughushuu, O kümlàqo ye kijè eno akichiqhipu ke. Shiyeqo kükau, O laghiqo ye amikucho eno kuchou ke.

⁴ Ampeu, khuu no O msàmoni kea, eno khuu no O je sheqhe tsümoni kea? Kughengu O likhi no akimthe ke. Shiye kümtsü no O zülo ighino O mülá nani, kughengu O chipiumikucho kümlà ye pephe-piyeva ke.”

⁵ Hipathiu I no ju akelo kungugha lo achineki akeu hu ithulu eno tiye khaqhipüa ke—tiye tushokiqhi yezaw puloshoqhi-chebo hu ke.

⁶ Achineki lono kungumi tsünì hu no püsa tsünì pesü ipeghi. Panongu ye phephei keu phi no mülapuyi shi püzü mithemighei pepusü ae eno ameshoyi no mülà keu heqhiphi no panongu mülà lo heqhipusü ae.

⁷ Tisheno aküxü akeu lhoxü bidí dolo lakhi no ameshoyi no mülà keu bohu tsünì lo alhokupuju lono alhokupuju kutólo xüache keu Lhou’w aloghukighide chhitoi sǘve no kungumi tsünì hu tsüe.

⁸ Eno achineki ye Alhou juküvü eno pa küká lono ipeghi keu michhi no chhitoive, eno kungumi tsünì hu no püsa tsünì pesü akeu kishekhamo ke kutólo timi khumu achineki lo ilomlave.