Piyeküsü 14 - Sümi Tiqhelimi Bible

Ambeti eno 1,44,000

¹ Tisheno I no ju akelo ye I gizülo Ambeti no Zion Naghuto lo puthugho ae eno pa gholo akishe lo pa je eno paPù je yèpüa kemi timi 1,44,000 ngo ae.

² Eno kungugha lono azü qowu akeu eno tsütsü-küsü shikeu ghügha toi keu sütsa lakhi I no chilue. I no aghügha chilu keu ye aheo küighamiqo no aheo küigha akeu ghügha toi ke.

³ Eno panongu no aküka lakhü zülo eno aküxü akeu lhoxü bidí eno sakiphemi muchomiqo zülo ale kithé lakhi phe ae. Ayeghi lono xachileluve kemi timi 1,44,000 nguno alau ye timi khumu ale tipau shikakulupu shimoe.

⁴ Timi hipaqo ye totimi gholo kitiqemo kemiqo ke, kughengu panongu ye athathe ke. Panongu ye Ambeti no khila wu keno tilau pa papesü wuke. Panongu ye ayeghi lo timiqo dolo no xachileluve kemi, Alhou eno Ambeti lau amsüu shi ikhiphe pe tsüve kemiqo ke.

⁵ Panongu kichí lo akimiki tsa piqhimoe; eno panongu ye tukutiye küha kemiqo ke.

Kungumi Küthü

⁶ Tile no kungumi kütau lakhi kunguu amlhü lo yewu chekeu I no ithulu, eno ayeghi lo shiye jeli, ashiaye jeli, atsa jeli piche kemiqo eno timi jeli xüküamiqo lau asheshu nike lhokta tsakiviu pa u lo pesü ake.

⁷ Pa no asütsa kuloghi lakhi lono ishi pi, “Alhou sümsa lo eno ajuküvü pesü pa tsülo, kughengu paw küghakütha do hu ye ighivae. Kungugha, ayeghi, azüghi eno azüpuki lhosü keu Lhou mülá lo.”

⁸ Kungumi akiniù no atüghiu papesü ighino ishi pi, “ ‘Babylon ajekipiu ye Ikiqivae! Ikiqivae!’ Li no shiye jeli kümtsü pelo li shi-aji ghasükümla ji ye pe ke.”

⁹ Kungumi aküthüu no asütsa kuloghi lakhi lono ishi pi: “Khuala no tüghashi eno tipau julho mülá eno panongu kishe momu panongu u lo tüghashi michipu xapuve aghí aye,

¹⁰ panongu ghí Alhou mlo kighide ji ye nani. Alhou mlo kighide jì ye azü lekitemo no mükamüghai pa loghukighide jikhu lo lesüvae. Panongu ye akimthe kungumiqo ngò Ambeti zülo no piti akeu amichu pesü ghimeqhi nani.

¹¹ Eno panongu ghimeqhi akeu michhi no alhokupuju phoiku nani. Khunoqo no tüghashi eno tipau julho mülá momu tüghashi jemichi xapuveni keno pano ghengu ye puchomu puthomu akulhokiqhi do küha nani.”

¹² Hiye Alhou’w timi khunoqo no Alhou zakütsü pape cheni eno Jisü lau amikucho shi cheni keno panongu sheamzü lo kheakulu shi kutuulu peniye piakeu lakhi ke.

¹³ Tile no kungugha lono asütsa lakhi no ishi pikeu I no chilu, “Hipau yè lo: Hinguno hilau ye khunoqo no Ampeu lono thiveni keno panoqo kümghae.” “Iyei, panongu ye panongu kümlà lono akulhoqhinia ke, kughengu panongu kümlà kivi no panongu pape nani ke,” ipi Aghungu no pi.

Ayeghi shou Ghile Hu keu

¹⁴ I no ju akelo I gizülo khüngküsü miyetsüghoi keu lakhi ae, eno timi nu toi keu lakhi no pa kütsü lo ameshoyi no mülà keu kütsükuqho lakhi pepu no pa u lo tsüghaminhei keu ayevǘ lakhi pesü khüngküsü lo iqa ae.

¹⁵ Tipathiu kungumi kütau lakhi no achineki lono ipeghi eno asütsa kuloghi lakhi lono khüngküsü lo iqa akeu vilo ishi pi, “O yevǘ ikhilu no ghile hulo, kughengu ayeghi lo aghì hu ye nivae eno ghile hu nikeu do ighivae.”

¹⁶ Ikelo khüngküsü lo iqa akeu hu no pa yevǘ pesü ayeghi shou chhopuwo, eno ayeghi lo ghile hu kepu shi akeu gholuve.

¹⁷ Kungumi kütau lakhi no kungugha chineki lono ipeghi, eno pa u lo ghí tsüghaminhei keu ayevǘ lakhi ae.

¹⁸ Itaghi kungumi kütau lakhi ami jukütsü akeu hu no akümlá-khache lono ipeghino asütsa kuloghi lono tsüghaminhei keu ayevǘ pe akeu vilo ishi pi, “O yevǘ ikhilulo eno ayeghi lo atsailu akeu lono atsaithi pho ghitha pe kumqolo, kughengu ayeghi lo astaithiqo ye nivea ke.”

¹⁹ Kungumi hu no pa yevǘ pesü ayeghi shou chhopuwo no atsaithiqo ghitha pe kumqove püzü Alhou loghukighide kütsüghǜ-a lo vesüve.

²⁰ Panongu ye mishighüna nguno khalau no atsaizü kütsüghǜ-a lono tsüghǜve, ikelo ajì no akütsüghü-a lono qò ipeghi. Ike tiye khurshi kichí kükha toi akushu láu Kilometer 300 kutólo qhemghai ikughia ke.