Piyeküsü 13 - Sümi Tiqhelimi Bible

Azüghi lono Tüghashi Ipeghi

¹ Tüghaküsa hu no azüghi mükü lo puthugho ae. Ikelo azüghi lono tüghashi lakhi ipeghi keu I no ithulu. Tüghashi tipau ye akibò chighí eno akütsü tsünì eno, pa kibò lo akütsükuqho chighí ake, eno akütsü kümtsü lo pipütha keu je lakhi-khi ae.

² I no tüghashi ithulu keu ye angushuu mihi ke, ikemu pa pukhu ye ava pukhu toi eno akichi ye abongushuu kichí toi ke. Tüghaküsa no pa küká eno pa küká lakhü eno kükagha kijè pesü tüghashi hu tsüe.

³ Tüghashi kütsü tsünì akeu dolo lakhi ye akithipu ghüza kijè xapu ake toi ke, ikemu akithipu ghüza tipau ye viluve. Ayeghiqha kümtsü lo akichiqhi keu no chhitoive eno tüghashi hu pape wuve.

⁴ Timiqo no tüghaküsa hu müláe kughengu pa no kükagha pesü tüghashi hu tsüke, eno panongu no tüghashi ghí mülá no ishi iniju, “Tüghashi toi keu khuu ani kea? Khuu no pa sasü aghü shikulupu kea?”

⁵ Tüghashi pelo aqheküza tsa eno pipütha keu tsa pipe nikeu kichí eno aqhi lhobidi kini kutólo kükagha peitha pe nikeu tsüpüae.

⁶ Tüghashi no Alhou pipütha, pa je ngò pa no ngo chekeu-a ngò kungugha lo xü akemiqo pipüsa niye pa kichí xukhoe.

⁷ Alhou’w akimthemiqo sasü aghüshi no panongu shou toluve pe nikeu küká pesü tüghashi hu tsüpüa. Eno ashiaye jeli, timi jeli, atsa jeli piche kemiqo, eno shiye jeli kümtsü shou aye pelu pe nikeu kükagha pa tsüpüa.

⁸ Ghiqhive keu Ambeti’w aküxüpu kaku lo aje yèpuku püaghi kemi nguno alau ye ayeghi lhophe kelo no acheghi kemi kümtsü tüghashi hu mülá nani.

⁹ Chilu nishi kemiqo pelo chilu pelo.

¹⁰ “Khunoqo akughu shiwuve kepu shi akeno, panongu ye akughu shiwuve nani. Akihizüta pesü khunoqo ghiqhive kepu shi akeno, akihizüta pesü panongu ghiqhive nani.” Hiye Alhou’w timiqo pelo kheakulu shi kutuulu eno amikucho shipe niye ghutú akeu ke.

Ayeghi lono Tüghashi Ipeghi

¹¹ Tipathiu ayeghi lono tüghashi akiniù ipeghi keu I no ithulu. Tüghashi tipau ye ambeti toi akibò kini xapu ae, ikemu pa ye tüghaküsa lakhi toi atsa pie.

¹² Pa no tüghashi atüghiu züqhu shi kükagha kümtsü peitha ke, eno ayeghi eno tile xüküami kümtsü pelo tüghashi atüghiu mülá pe. Tüghashi atüghiu ye akithipu ghüza lono viluve keu hu ke.

¹³ Eno tüghashi akiniù hipau no amichipu kümlà kijè kutomo shipe pìye, eno timiqo kümtsü zülo atsütsǘ lono ami ayeghi lo iqighi pe.

¹⁴ Tüghashi atüghiu züqhu shi amchipu kümlàqo shipe nike aküka tüghashi akiniù tsü keu vechewo ayeghi lo xüküamiqo pishiqhive. Tüghashi akiniù no tüghashi khuu akihizüta no ghüzave kemu xüluve keno pa gihu keu michi shi ajulho lakhi mülà puku lo ipi ayeghilomiqo azah tsü.

¹⁵ Tüghashi atüghiu julho lo athuthu tsülu kepu küká pesü tüghashi akiniù tsüe. Tishianguno ajulho pelo atsa pilu pe eno ajulho mülámo kemiqo kümtsü pìthíve peniye ke.

¹⁶ Ajulho tipau no anguka shi kijemi ngò kitilami, kiními ngò athokhami, kuqhopheve kemi ngò aqüaxemi kümtsü pelo panongu u ajeu momu panongu kishe lo amichipu chishida pe nikeu shie,

¹⁷ tishi keu vechewo timi khunoqo no amichipu küha keno tipaqo ye kiumu küqhü-kili shilupemo niye ke. Amichipu hu ye tüghashi je momu pa je kikihi ke.

¹⁸ Hipau lo alokütsü shi moayesa keu anie. Timi khuno no juchhokulupu ani keno pano pelo tüghashi kikihi kihiju pelo, kughengu tiye timi lakhi wu akikihi ke. Tipau kikihi ye 666 ke.