Piyeküsü 12 - Sümi Tiqhelimi Bible

Totimi eno Tüghaküsa

¹ Tisheno kungugha lo amichipu kijè lakhi ipeghi: eno totimi lakhi no khetsünhe usü ipeghi, li pukhu no aqhi nepe eno ayepu chighikini kütsükuqho lakhi no li kütsü lo ae.

² Li ye mishí ae eno punú niye akelo li no aküsǜ lau no igha qae.

³ Ikelo kungugha lo amichipu kütau lakhi ipeghi: huchuhuyi keu tüghaküsa kijè lakhi akütsü tsünì eno akibò chighí eno akütsükuqho tsünì hu no pa kütsüqo lo ae.

⁴ Pa shomi no atsütsǘ lono ayepu saje küthü ikhipesü ayeghi lo vepiqive. Totimi hu ye angá punú niye ake. Ikehu tüghaküsa ye totimi hu no angá punuqhi kemtsa tsüchuve niye li gizülo puthugho ngo ae.

⁵ Li no anu lakhi punú, tiye kipitimi ke, eno anu hu no “ayì no mülà keu aküka küsǘ pesü shiye kümtsü shou ayè pe nikeu shi ake.” Ikelo li nu hu ye Alhou lau eno pa küká lakhü lo müxa pesü ikuve.

⁶ Totimi hu ye atsala 1,260 tucho peniye Alhou no li ghenguno kutopüa keu küghünamoke-a lakhi lo pove.

⁷ Ikelo kungugha lo aghükishi ipeghive. Kungumi atou Michael eno paw kungumiqo no tüghaküsa sasü aghüshi, eno tüghaküsa ngò paw kungumiqo ghí mujochile ke.

⁸ Ikemu tüghaküsa hu ye aghükishi tomove, eno kungugha lono panongu hapheve.

⁹ Tüghaküsa kijè hu ye aqhou vepiqive. Tüghaküsa hu ye khaghi apighi khikhi tüghami momu Satan ipi ku chekeu hu ke. Pa ye ayeghilomi kümtsü pishikiqhiu hu ke. Paw kungumiqo gholo no pa ye ayeghi lo vepiqive ke.

¹⁰ Tipathiu kungugha lono asütsa kuloghi lakhi no ishi pikeu I no chilu: “Itehi ye xakulu eno aküka eno ningu Lhou’w kükaphu eno Messiah kükagha ighivae. Kughengu putho-pucho ningu Lhou zülo ningu thiküzümi eno achelimiqo nguku achekeu hu ye aqhou vepiqivae.

¹¹ Panongu no pa shou toluvae tiye Ambeti jì vechewo eno panongu no kuchou shepe tsa pikeu vechewo no ke; panongu ye ighono panongu küxü kimiyemo ke eno panongu ye thive nikeu kutólo msàmo ke.

¹² Tighenguno kungugha eno nongu tile akemiqo alovishelo! Ikemu ayeghi eno azüghi ghengu ye ahasapue, kughengu tüghami hu ye nongu lau iqivae! Pa ye amlokighide no chhitoi ani kughengu pa do ye ikhonhei likhiva kepi pa no ithi anike.”

¹³ Kughou tüghaküsa no ayeghi lo pa vepiqive keu ithive keno, pa no anu punú keu totimi hu phuthuve.

¹⁴ Totimi hu ye aluqu kuloghi chishibo kini tsüpüae, tishianguno li pelo li ghenguno kutò pe püakeu küghünamoke-a lo yewu luve peniye ke. Tiye apighi no ighi müla nikeu-a ke. A-a tipau ye ampe küthü tüxa ghenguno li tucho niye akeu-a ke.

¹⁵ Tipathiu tüghaküsa hu no azükuqo vechewo totimi hu yipewuve niye pa kichí lono aghoki lakhi toi azü puqule ke.

¹⁶ Ikemu ayeghi no pa kichí mukuluve püzü tüghaküsa no pa kichí lono aghoki zü toi puqule keu hu munove tsü eno totimi hu kuphuve tsü.

¹⁷ Tipathiu tüghaküsa ye totimi hu ju pesü aghaideve no li nuli-kughukomi khijehi ani keno tipaqo sasü aghüshi niye wuve. Li po lo kughukomiqo ye Alhou zakütsü pape chekemi eno akumto shi Jisü shepe shi chekemiqo ke.