Piyeküsü 11 - Sümi Tiqhelimi Bible

Thopimi Kini

¹ Akimighi sü toi keu aküsǘ lakhi pesü I tsü eno I vilo ishi pi, “Wu no Alhou chineki eno akümlá-khache mighiju lo eno tipau lo akümlámiqo kihiju lo.

² Ikemu achineki khalau ye qhivelo; tiye mighi kevilo, kughengu tiye Jewkumomiqo tsüvea ke. Panongu no aqhi 42 kutólo akimthe mishighüna qoda nani.

³ Eno I no iw thopimi kini süküsü shi nani, eno panongu no yeqhiyephi pepusü atsala 1,260 kutólo tungkuptsa pi nani.”

⁴ Pama ye “olive sübo kini hu ke” eno akulu ghopeqhi keu kini ke eno “pama ye ayeghi Mpeu zülo puthugho achekeu hu ke.”

⁵ Khuala no pama ghüza niye shi aye pama kichí lono ami ipeghi keu hu no aghümiqo pitiqhive cheni. Khukhumu pama ghüza nishi kemi ye hitoi thive moayesa ke.

⁶ Pama ye kungughaqo khaluve kepu küká ani, tishi keu vechewo pama no tungkuptsa pi ake dolo tsüghu pemo niye ke; eno pama ye azü pesü ajì kughulhove kepu küká ani eno kugho-kughomu pama no püsa jeli kümtsü pesü ayeghi shou vepuku nishi ke thaqhü vepukuluve kepu küká ani.

⁷ Kughou thopimi pama no pama shepe shitave nike no aqokutho lono tüghashi ipeghi keu no pama sasü kichighi nani, eno pama shou theqhive no pìthíve nani.

⁸ Pama sükumo ye mishighüna kuloghi lo mìshí kumqo chekeu-a lo qhi nani. Mishighüna ajekipiu hu ye aholetsau no Sodom eno Egypt ipi ku cheni. A-a hipau lono pama Mpeu ghí yedapithive ke.

⁹ Atsala küthü tüxa kutólo timi jeli, ashiaye jeli, atsa jeli piche kemiqo eno shiye jeli lono timiqo no pama sükumo lo jupuku nani eno pama qhove pe nikeu lakükha shi nani.

¹⁰ Pama thive kelo ayeghi lo xüküami no alokivishi nani eno alokivi lau no panongu no aghò pesü lakhi no lakhi chhekile nani, kughengu tungkupumi hiküma no ayeghi lo xüküamiqo ghimeqhi ke.

¹¹ Ikemu atsala küthü tüxa thiu Alhou lau no ighi keu aküxü tuthu hu no pama lolo ilove, eno pama ye puthughove, eno pama ithulu kemiqo kümtsü no shishe msàve.

¹² Tisheno kungugha lono asütsa kuloghi lakhi no pama vilo ishi pikeu pama no chilu, “Hila ikughilo.” Eno pama ye khüngküsü lakhi lono kungugha lo ikuve, eno tishi akelo pama ghümiqo ye pama ju ae.

¹³ Tipau tüqhüdo lo ayeghi küghütha kijè lakhi ighi eno mishighüna saje chighí lo lakhi ye kütsapinive. Ayeghi küghütha lono timi qhethonhe tsünì thive, eno aküxü achili shilu keqo ye akichiqhive no ajuküvü pesü kungugha Lhou lau tsüe.

¹⁴ Ahasapu akiniù hu ye tavae; eno ahasapu aküthüu hu ye itheno chenie.

Afuko Akütsüniu

¹⁵ Kungumi akütsüniu no pa fuko küigha kelo kungugha lono asütsa kuloghi ipeghino ishi pie: “Ayeghi lo akükaphu hu ye ningu Mpeu eno paw Messiah kükaphu shivae, eno pa no alhokupuju lono alhokupuju ghenguno ayè pe nani.”

¹⁶ Eno sakiphemi muchomi mukubidi khunoqo no panongu küká lakhü lo Alhou zülo iqa akeno panongu no panongu gi pishiqho pesü qhoqhünhe no Alhou müla

¹⁷ ghi ishi pi: “Ampeu Alhou Akughushuu, khuu acheghi eno acheni keno, ningu no shikimthi keu pesü O tsü ani, kughengu nono O küká kijè peluvea eno aye pethuvae.

¹⁸ Shiyeqo ye amloide ake, ikemu O loghukighide hu ye ighivae. Kithimi shou küghathabe nikeu eno pa qemi ngò tungkupumiqo kijè lono kitila kutólo eno ow timi O je gihu chekemiqo qesaxu tsüní keu eno khunoqo no ayeghi kütsave keno tipaqo kütsave nikeu do ighivae.”

¹⁹ Tile no kungugha lo Alhou chineki khaqhive, eno achineki alou paw puloshoqhi bohu akeu ithulu pe. Tile no tsütsüpha kulo ipeghi eno kong-kong shi tsütsü-küsü shi, ayeghi küghütha eno shishe murasü qie.