Piyeküsü 10 - Sümi Tiqhelimi Bible

Kungumi eno Liküküzü Kaku Akitilau

¹ Tipathiu kungumi akumto lakhi kungugha lono iqi chekeu I no ithulu. Pa ye khüngküsü no küzüpe ae eno milisü no pa kütsü sholo ae; pa gi ye khetsünhe toi, eno pa pukhu ye ami tsükuchoqo toi ke.

² Pa no liküküzü kaku aghulo lakhi pa u lo khaqhi pesü ngo ae. Eno pa pukhu ajeu pesü azüghi shou bepe ngo eno pa pukhu piyiu pesü ayeghi shou bepe ngo,

³ eno abongushuu ghügha toi pa no aghügha kuloghi lakhi ighae. Kughou pa no igha keno, tsütsü-küsü tsünì sütsaqo hu no atsa pie.

⁴ Eno kughou tsütsü-küsü tsünì hu no atsa pi keno I no yè niye shia; ikemu kungugha lono asütsa lakhi ishi pikeu I no chilu, “Tsütsü-küsü tsünì no kiu pi keno tipau mekhavelo eno tipau yèpeqhi kevilo.”

⁵ Ikelo I no azüghi eno ayeghi shou kungumi puthugho akeu ithulu keu hu no pa u ajeu kungugha küdau peqhe.

⁶ Eno kungumi hu no, kungugha, ayeghi eno azüghi eno tipaqo lo akeu jeli kümtsü lhosü keu alhokupuju lono alhokupuju kutólo xüache keu Alhou je pesü ashoqhi shi no ishi pi, “Hinguno hilau ye munuve pemo nani!

⁷ Ikemu tipau tsalaqo lo kughou kungumi akütsüniu no pa fuko küigha niye kutove nike no, pa no pa qemi tungkupumiqo vilo piputo tsüke hutoi Alhou’w tuqhou ye shikupuve nani.”

⁸ Tisheno püzüu kungugha lono asütsa lakhi I pütsa keu hu no itaghi I vilo ishi pikeu I no chilu: “Wulo, azüghi eno ayeghi shou puthugho akeu kungumi khuu u lo liküküzü kaku khaqhipe püani keno tipau ikhilulo.”

⁹ Ike I no kungumi lau wu no pa vilo liküküzü kaku aghulou hu I tsülo pi khu. Pa no I vilo pi, “Hipau ikhilulo eno chulo. Hipau no O kive lo khumtsai tsü nani, ikemu ‘O kichí lo ye akhingozü toi ngoniyi nani.’”

¹⁰ I no kungumi u lono liküküzü kaku aghulou hu ikhiluve püzü chuve. Tiye I kichí lo akhingozü toi ngoniyi chulu ke, ikemu kughou I no chusüve keno tiye I kive lo khumtsaive.

¹¹ Ikelo kungumi hu no I vilo ishi pi, “No ye itaghi timi, shiye, atsa jeli kipími eno kükamiqo kutomo vilo tungkuptsa pi moayesa nani.”