Piyeküsü 1 - Sümi Tiqhelimi Bible

Kilekithi

¹ Piyeküsü hipau ye Jisü Khristo lau no ighike. Hiye paikhavi lono kiu shive niye ani keno Alhou no Jisü Khristo qemiqo lau pìye penike ghenguno Jisü Khristo tsü keu ke. Pa no paw kungumi puwu keu vechewo pa qeu John pelo ithilu pe ke.

² John ye pa no ithulu keu thowkha kümtsü ashepe shi cheni. Tiye Alhou tsa eno Jisü Khristo shepe ke.

³ Khuu no ighamuku tungkuptsa hipau phisüni keno tipano kümghae, eno khunoqo no hi chilu püzü kiu yèpüani keno tipau papeni keno tipaqo kümghae, kughengu ado ye kupunúvae.

Petha eno Shikimthikütsü

^4-5 John no, Asia bocho lo akukuhou tsünì lau yèlu ani: Alhou khuu acheghi, acheni, eno ighi niye ani, eno pa küká lakhü zülo aghungu tsünì akeqo eno Jisü Khristo, pükhübekulu thopiu, akithí lono atüghishi xülethughi keu eno ayeghi lo kükamiqo shou ayekipeu keno, pama lau no ighi keu küpükini eno aloino keu nongu gholo apeniu. Khuu ningu kimiye cheni eno pa jì vechewo axiné lono ningu kuqhophevea

⁶ eno pa Lhou eno paPù qe penike ningu pesü pa kükaphu lo achinemiqo shitsü keno pa lau alhokupuju lono alhokupuju kutólo ajuküvü eno ayekipe ache pelo! Amen.

⁷ “Julo, pa ye khüngküsü shou no cheni,” eno “timi kümtsü no pa ithulu nani, pa qhuqhi pìthíve kemiqo ghí pa ithulu nani”; eno ayeghi lo timi jeli kümtsü no “pa ghenguno amloküsa shi nani.” Tishi nani pütsá ke! Amen.

⁸ “Ni ye Alpha eno Omega ke,” ipi Ampeu Alhou no pi. Eno, “ni ye acheghi, acheni, eno ighi niye shi akeu, ni ye akughushuu ke,” ipi pa no pike.

John no Kungunhetsü lono Khristo Ithulu keu

⁹ Ni John, nongu thiküzüu eno Jisü kükaphu lo aghime küsaje küqha akeu, kheakulu shi kutuukulu shipe niye Jisü no ningu kulù ketoi ni ye Alhou tsa eno Jisü shepe shikeu ghenguno Patmos züdoyeghi lo I küghape qhive ke.

¹⁰ Ampeu Tsalani Aghungu no I peitha ake, ikelo afuko ghügha toi I zübou ighamuku keu lakhi I no chilu,

¹¹ eno asütsa tipau no ishi pi: “Nono kiu ithulu keno liküküzü kaku lakhi lo yèpuku no akukuhou tsünì hipaqo lau tsüpuwu lo: Ephesus, Smyrna, Pergamum, Thyatira, Sardis, Philadelphia eno Laodicea.”

¹² I pütsa akeu sütsa ju niye I no ighowo ju ke. Eno kughou I no ighowo ju keno ameshoyi no mülà keu akulu tsünì ghopeqhi püaghi keu ithulu,

¹³ eno akulu ghopeqhi keqo dolo timi nu toi keu lakhi chijeboboi-phi no pa pukhu kutólo pepu ae eno ameshoyi no mülà keu heqhiphi lakhi no pa mülà lo heqhi püakeu ithulu.

¹⁴ Pa kütsü lo asà ye amhiyeho eno avü toi miyetsüghoi ke eno pa nhethi ye ami toi vüqalei ke.

¹⁵ Pa pukhu ye alazayi no ayì kiyiqibo lakhi lo vü akeu toi ke, eno pa sütsa ye aghoki kijè no qowu akeu sütsa toi ke.

¹⁶ Pa u ajeu no ayepu tsünì tsüqüpe ae, eno pa kichí lono puto-puto kihizüta tsüghaminhei keu lakhi ipeghi. Pa gi ye khetsünhe no ighono vüqai ipeghi akeu toi ke.

¹⁷ Kughou I no pa ithulu keno ni ye thive kemi toi pa zülo ikiqive. Ikelo pa no pa u ajeu I shou be no ishi pi: “Msà kevilo. Ni ye Abothu eno Ashekha ke.

¹⁸ Ni ye xü akeu hu ke; Ni ye thive ke, ikemu itehi ye julo, ni ye alhokupuju lono alhokupuju kutólo xü anani! Eno I no akithí ngò Hades kümaw khayi pesü ani.

¹⁹ “Tighenguno nono kiu ithuluvea, itehi kiu shi ani eno kutou kiu shi nani keno tipaqo yè lo.

²⁰ Nono I u ajeu ayepu tsünì akeu ithulu keu ngò ameshoyi no mülà keu akulu tsünì ghopeqhi püakeuw tuqhou ye hike: Ayepu tsünì ye akukuhou tsünìw kungumiqo ke, eno akulukibepu tsünì ye akukuhou tsünì ke.