Philemon 1 - Sümi Tiqhelimi Bible

¹ Khristo Jisü tsakiviu pikülha keu ghenguno akughu shi akeu Paul eno ningu thiküzüu Timothy lau no, Ningu no kimiye chekeu aküsàu Philemon eno mülà küqha akemi lau—

² ningu chepu Apphia eno mülà küqha akeu ningu küsàu Archippus—eno O ki lono kusho no kuho chekemiqo lau yèsü hipau yèlu ani:

³ Ningu Papù Alhou eno Ampeu Jisü Khristo lau no ighi keu kikimiye eno aloino keu nongu tsü ani.

Shikimthikütsü eno Akighini

⁴ I no I kighini lo O kümsülu ke kümtsü lo I Lhou shikimthi acheni,

⁵ kughengu nono akimthemiqo kümtsü lau ow kikimiye akeu eno Ampeu Jisü shou O küpülü akeu I no chilu ke.

⁶ Nono aküpülü lono ningu gholo kütshükime akeu vechewo ningu no Khristo je ghenguno akivi thimeqo küsaje akeu kümtsü lo ow vethakulu thonheilu penike I no akighini shi ani.

⁷ Ow kikimiye no alokiqi kijè I tsü eno I shikumto luvae, kughengu athiküzüu, nono Ampeu’w timiqo mlo ghüthipüxüve tsü ake.

Paul no Onesimus Ghenguno Qhüiniju

⁸ Tighenguno, ni ye Khristo lono amlo kumto shi püzü nono kiu shikepu ani keno shilo ipi azah tsülu kepu shi ani kemu,

⁹ ni ye kikimiye vechewo O qhüiniju nikeu no I pulou shi ani. Tiye kütami kumo no Paul ke—kitemi lakhi eno itehi ye Khristo Jisü ghenguno akughu shi akeu—

¹⁰ ni ye O lau I nu Onesimus, khuu I no ayikichhe lo tsüghape ake lono I nu shilu keno, pa ghenguno qhüiniju ani.

¹¹ Azüu pa ye O ghenguno peitha kümlapú shive ke, ikemu itehi pa ye O ghenguno ghí eno I ghenguno ghí avehupu shivae.

¹² Pa ye I mlo kuchuu ke. I no pa pesü O lau kighide puwo ani.

¹³ Ni ye I gholo pa qhiluve nishi ake, tishianguno I no atsakiviu ghenguno ayikichhe lo tsüghape akelo pa no O züqhu shi I kuphu peniye ke.

¹⁴ Ikemu ni ye O kükümsü lumo no kiumu shive nishiamo ke, tishianguno nono kimiyekini kümlà kiu-kiu shi namu tiye anguka lono kumo no puloniqhiyi shilu peniye ke.

¹⁵ Onesimus no ado kitila ghenguno O lau no kütüta shive keu ye O pelo alhokuthu ghenguno pa sachileluve pe nikeu ghenguno shi aghiluvi ke—

¹⁶ aqüaxemi lakhi toi kumovea, ikemu aqüaxemi nguno akiviu shi kimiye chekeu athiküzüu lakhi toi shiluvea ke. Ni ye ighono pa avehupu shi ani ikemu I nguno alau nono pa avehupu shi nani, pa ye mülà küqha akemi toi eno Ampeu lono athiküzüu lakhi toi; eno tiye kinikujo ke.

¹⁷ Ike tsalá nono ni ye kütüna akemi lakhi kepi kümsü aghí aye, I sasǘ akeshi no ye pa sasülu tsülo.

¹⁸ Tsalá pa no O lau kiuala achipikumou shipüaghi momu O tsü kepu aghí aye, I makho shive tsülo.

¹⁹ Ni Paul ampi no yèsü hipau yè ani. I no ti O lochileve nani—ishi pi akepu kumo kemu O küxü ghí I shou bepe ani kene.

²⁰ Athiküzüu, Ampeu lono ni ye O lau no kiuala alá shilu nikeu kümsü ani; Khristo lono I mlo ghüthipüxü tsülo.

²¹ O ghokulu shou pülükibe qhi no, ni ye O lau yè ani, no ye I no khu akeu nguno alau mülà nani kepi pülü ani.

²² Eno itaghi thime lakhi aphi: I sala inami chebo lakhi kutò tsülo, kughengu I no laju akeu ye Alhou no nongu kighiniqo khochile tsü no nongu lau ighilu pe nani ke.

²³ Epaphras, Khristo Jisü lono I gholo kümtsa akughu shi akeu no petha nongu tsüpuwu ani.

²⁴ Eno tihutoi Mark, Aristarchus, Demas, eno Luke, I gholo mülà küqha akemiqo ghí petha tsü ani.

²⁵ Ampeu Jisü Khristo’w küpükini no nongu nguagha gholo apeniu.