MATTHEW 8 - Sümi Tiqhelimi Bible

Jisü no Apügha Kupumi Lakhi Shipivi

¹ Kughou Jisü no naghuto küdau no iqighi keno timi kutomo no pa papesü ighi.

² Ikelo apügha kupumi lakhi no ighi püzü pa zülo qhoqhünhe no pi, “Ampeu, nono pulo aghí aye, no ye I shipivive tsülu nanie.”

³ Jisü no pa u chhopuwo timi tipau bu no ishi pi, “Ni ye pulo anie, viluvelo.” Paikhavi no timi tipau ye apügha küsǜ lono viluve.

⁴ Tisheno Jisü no pa vilo pi, “No ye timi khuu vilomu pi kevilo. Ikemu achinemiqo lau kimichikütsü shi wu no panongu pìyelo eno Moses no azah tsüpüa keu toi akümlagho pesü mülá lo.”

Aqhe Shou Zatsüu Küpülü

⁵ Kughou Jisü no Capernaum lo ighi keno, aqhe shou zatsüu lakhi no pa lau akukuphu khu ighi.

⁶ Pa no Jisü vilo pi, “Ampeu, I qeu ye aphi ithamlave no ighono ichhe-ime aki lo ihozü anie.”

⁷ Jisü no pa vilo pi, “I no ighino pa shipivive tsüní keshea?”

⁸ Aqhe shou zatsüu no khochile, “Ampeu, O pelo I ki sheqho lo iloghi penike aküzüpu kumoe. Ikemu nono azah tsüve aye I qeu ye viluve nanie.

⁹ Kughengu ni ghí kükagha qholo ani eno I qhou ghüshimiqo anie. I no ghüshimi lakhi vilo, ‘wulo,’ ipi aye pa no wucheni; eno I no, ‘Ighilo,’ ipi aye pa no ighi cheni. I no I qeu vilo, ‘Hipau shilo,’ ipi aye pa no shi cheni.”

¹⁰ Kughou Jisü no hi chilu keno pa ye akichiqhive eno pa pape chekemiqo vilo pi, “Kuchou no I no nongu vilo pìní, ni ye Israel lo aküpülü kuloghi hitoi kemi lakhimu phu müla aphie.

¹¹ I no nongu vilo pìní, kipelau eno kulolau no timi kutomo ighi nani, eno panongu no kungugha kükaphu lo Abraham, Isaac eno Jacob noqo gholo iqa no aghulhu shi nani.

¹² Ikemu akükaphu lo anani ipi chekeqo ye khalau zümoi keu lo vepheve nani. Tilehi qanimlo eno ahu tsüghü-bubushi keu anani.”

¹³ Tisheno Jisü no aqhe shou zatsüu vilo pi, “Wolo, nono pülü ake toi tishiluve peniu.” Ikelo pa qeu ye tipau süchedo lono shipiviluve.

Jisü no Timi Kutomo Shipivi

¹⁴ Kughou Jisü no Peter ki lo iloghi keno, Peter pani ye aghamiki püzü alipa lo ihozü aghí keu pa no ithulu.

¹⁵ Jisü no li u bu kelo ye li phi lono aghakimiki kühave, eno li no paikhavi ithuve püzü achuqupu kutò pe pa tsüe.

¹⁶ Kughou avela shive keno, tüghaküsa no tsügha pesü akemi kutomo Jisü lau saighi, ikehu pa no pa tsa vechewo tüghaküsa ghawuqo hapheve tsü eno küsükinimi kümtsü shipivi tsü.

¹⁷ Hi kümtsü shikeu ye Isaiah tungkupuu no pipüa keu shikupu niye ke: “Pa no ningu kutokumoqo puluve tsü eno ninguw küsükiniqo puqheluve tsüe.”

Jisü Pape Nikeu Mekusho

¹⁸ Kughou timi aqokitikhi no pa sühope akeu Jisü no ithulu keno, pa no ayizükucho hukuku küdau wuni keu azah shie.

¹⁹ Tipathiu ayeza kükütsümi lakhi no Jisü lau ighino pi, “Akükütsüu, nono khila wuni keno ni ghí O papesü wunie.”

²⁰ Jisü no khochile, “Aghalotsüqo ye ngo kepu tuki ani eno aghauqo ye apüsü anie, ikemu Timi Nu ye pa kütsü mükhü kepu-a ghí kühae.”

²¹ Akhopemi lakhiu no Jisü vilo pi, “Ampeu, I pelo wu no I pù kumo shiqhove paghi pelo.”

²² Ikemu Jisü no pa vilo pi, “I papelo, kithimi pelo kithimi kumo shiqho apelo.”

Jisü no Pasapagha Haküqüsü

²³ Tipathiu Jisü no ashuka lo iku eno pa khopemiqo no pa papesü ighi.

²⁴ Zülile no pasapagha lakhi azüghi shou muqhumüzasü ighi, ikelo azü fukucho pesü ashuka küzüpholuve kepu toive. Ikemu Jisü ye züae.

²⁵ Akhopemiqo no wu no Jisü küdaputhu ghi ishi pi, “Ampeu, ningu xalulo! Ningu ye azü no yimive niye shivae!”

²⁶ Jisü no khochile, “Nongu aküpülü kitila likhi akeqo, nongu ye kushiye ighono msà ani kea?” Tisheno pa no idaithughi püzü amlhü eno azü fukucho lomipi, ikelo shishe iqünheive.

²⁷ Timiqo ye akümzave no ishi iniju, “Hiye kiutoi keu timi kea? Amlhü eno azü fukucho kutólo pa gholu anie!”

Jisü no Tüghaküsa no Tsügha Pesü Akemi Kini Shipivi Tsü

²⁸ Kughou Jisü no azüghi tüxau Gadarenes ko-aqha lo ighi keno, tüghaküsa no aphi lo ilove kemi kini akumoki lono ipeghino pa sasü kushoe. Pama ye ighono ayiküsa kehu timi khumu tipau là hechesü wumla no ache.

²⁹ Pama no ighamuku pi, “Alhou Nu, no ye nikujo lau no kiu avehupu shi ani kea? No ye ado püghüpüa keu tomphi züu no nikujo ghimeqhi niye hilau ighi ani keshea?”

³⁰ Pama no ngo akeu-a lono kushuwa kumo lo awo aloji kijè lakhi nguchu ae.

³¹ Tüghaküsaqo no ishi Jisü qhüiniju, “Nono ningu haphe kepu shi aghí aye, awo loji gholo ningu puwu tsülo.”

³² Jisü no panongu vilo pi, “Wuvelo!” Ike panongu no ipeghive no awoqo phi lo ilove, eno awo lojiqo kümtsü atuxu lo kohakive iqive no ayizükucho lo ilove püzü pütsüqhive.

³³ Awo khemiqo no pove püzü mishiphu lo ilo no thowkha kümtsü pesü pi eno tüghaküsa aphi lo ilove kemi lau kiu shive keno ti ghí pesü pie.

³⁴ Tilehi no mishiphu lo xüküami kümtsü Jisü sasü kusho niye wue. Eno kughou panongu no Jisü ithulu keno, Jisü vilo pano ko-aqha qhive no wuve tsülo pi qhüiniju.