MATTHEW 6 - Sümi Tiqhelimi Bible

Aveküsami Kuphu keu

¹ “O chipiumikucho kümlà ithulu peniye timi zülo pephe-piye keu shimo nike kutokupui alo. Tsalá nongu no tishiaye, Apù kungugha lo akeu lau no asaxu ithumla nani.

² “Tighenguno nongu no kughou aveküsami kuphuni keno, nongu ye kühaküghamiqo no synagog eno alaghilaqo lo ighamuku kütami pelo panongu gihu peniye asheshu keu toi shi kevilo. Kuchou no I no nongu vilo pìní, panongu ye pano sala qesaxu kuchopu ithuluvae.

³ Ikemu kughou nongu no aveküsamiqo kuphuni keno, O u ajeu no kiu tsü ani keno O u piyiu pelo ithi pe kevilo,

⁴ tishianguno nono tsü akeu ye tuqhou shilu nani ke. Tishi keu vechewo nongu Papù khuu nongu no tuqhou no kiu mülà acheni keno ithulu akeu hu no asaxu nongu tsü nani.

Akighini Vehu

⁵ “Eno kughou nongu no akighini shini keno kühaküghamiqo toi shi kevilo, kughengu panongu ye synagogqo lo puthugho no akighini shinishi cheni eno kütami pelo ithulu peniye alaghila chekuqo lono akighini shi cheni. Kuchou no I no nongu vilo pìní, panongu ye pano sala qesaxu kuchopu ithuluvae.

⁶ Ikemu kughou nongu no akighini shini keno, nongu chebo lo ilo no ahukikha khavelo eno nongu Papù khuu ithulu chemo keno pa vilo inikhulo. Tishiaye nongu Papù khuu nongu no tuqhou no kiu mülà acheni keno ithulu akeu hu no qesaxu nongu tsü nani.

⁷ Eno kughou nongu no akighini shini keno Jewkumomiqo toi adou tsa za kevilo, kughengu panongu no kümsü keu no kutomo za keu ghenguno chilutsü nani küghashi kümsü cheni ke.

⁸ Panongu toi shi kevilo, kughengu nongu Papù ye nongu no kiu avehupu shi ani keno khu mphi lonomu ithi anike.

⁹ “Tishiaye, nongu ye hitoi inikhu moayesae: “ ‘O ningu Papù kungugha lo küau, O je akimthe shi pelu pelo,

¹⁰ O yekipe ighilo, kungugha lo toi ayeghi lo ghí O pulou shilu pelo.

¹¹ Tsalakipe chuqupu ishí tsalà lo ningu tsülo.

¹² Eno ningu no kütami no pimive keu kipimíqo qhivetsü keu toi ningu no pimive keu kipimíqo ghí qhive tsülo.

¹³ Eno ningu pelo ghukuju lo ilove pe kevilo ikemu küsakügha lau no ni xaphe tsülo. Kughengu akükaphu, aküka eno ajekipi ye alhokupuju lo ow ke. Amen.’

¹⁴ Kughengu timi kütami no nongu lau axiné shive kelo, nongu no panongu kipimí qhivetsü aye, nongu Papù kungugha lo küau ghí nongu kipimí qhivetsü nani.

¹⁵ Ikemu nongu no kütami no axiné shive keu kipimíqo qhive tsümo aye, nongu Papù kungugha lo küau ghí nongu kipimíqo qhitsümo nani.

Kümvü keu Vehu

¹⁶ “Kughou nongu no kümvüni keno kühaküghamiqo toi agi küzü pìye kevilo, kughengu panongu ye timi kütamiqo pelo kümvü anike ipi ithi peniye panongu gi kilive cheni ke. Kuchou no I no nongu vilo pìní, panongu ye pano sala qesaxu kuchopu ithuluvae.

¹⁷ Ikemu kughou nongu no kümvü nike no thazü pesü O kütsü lo sǘvelo eno O gi phavelo,

¹⁸ tishianguno timi kütami zülo nongu ye kümvü ani ipikeu ithi pemo nani ke, ikemu nongu Papù khuu ithulu chemo keno eno nongu Papù khuu nongu no tuqhou no mülà akeu ithulu acheni keno, pa no qesaxu nongu tsü nani.

Kungugha lo Kiníqo

¹⁹ “Nongu likhi nongu sala ayeghi lo akiní pekütsü kevilo, kughengu tiye amila ngò ayisa no tsapühave eno küpükamiqo no hepho ilo püka pewuve cheni.

²⁰ Ikemu nongu likhi nongu sala kungugha lo akiní pekütsü lo, tilehi ye amila ngò ayisa no tsapühave müla, eno küpkami no hepho ilo püka müla nani ke.

²¹ Kughengu nongu kiní khilehi ani keno nongu mlo ghí tilehi anani ke.

²² “Anhethi ye aphimpi küvü ke. O nhethi no vi aghí aye, O phimpi kuchopu aküvü no chhitoi nani.

²³ Ikemu O nhethi no vi aghimo aye, O phimpi kuchopu àküzǘ no chhitoive nani. Tsalá O lolo aküvü akeu hu no àküzǘ shive aye, àküzǘ tipau ye kiutoi àküzǘ kijè shive nani kea!

²⁴ “Timi khumu ampeu kini qüaxemi shimlae. No ye lakhi mithive no lakhiu kimiye nani, momu no ye lakhi qhoqhü püzü lakhiu phimo nani. No ye Alhou eno küakini küma kinikujo qüaxeu ye shimlae.

Amlosa kevilo

²⁵ “Tighenguno I no nongu vilo pìní, nongu küxü lo chu kepu ghenguno amlosa kevilo; momu nongu phimpi lo pepumini nikeu ghenguno amlosa kevilo. Aküxü ye achuqupu nguno akhotou ke kumo keshea, eno aphimpi ye tiphimini nguno akhotou ke kumo keshea?

²⁶ Atsütsǘ lo aghauqo pishipuku julo; panongu ye kiumu yisü chemo momu ghile hu chemo momu ale lo kiumu pekütsü pe qhi chemoe. Tishiaghi pinamu nongu Papù kungugha lo akeu no panoqo lojí acheni. Nongu ye tipaqo nguno alau akughupu ke kumo keshea?

²⁷ Nongu dolo khuala no amloküsa shikeu vechewo pa küxü lo ayì kihedo lakhimu süküphalu nani keshea?

²⁸ “Ike nongu ye kushiye tiphimini ghenguno amlosa acheni kea? Axamunuqo no kíshi aluqa lo thuwu acheni keno julo. Panongu ye akümlà shichemo momu aphì ghò chemoe.

²⁹ Ikemu I no nongu vilo pìní, Solomon ye pa kiní kütsasa anamu axamunu hipaqo no qhivütsüni akeu toi tiphimini pepu lumoe.

³⁰ Nongu aküpülü miqemilei kemiqo! Aluqa lo ishí ye xüa püzü thoghiu ye ami lo vesüve niye akeu axamunuqo kutólo ghí Alhou no tucho-mjo aye, pa ye tinguno alau nongu tuchomoni keshea?

³¹ Tighenguno amlosa ghi ishi pi kevilo, ‘Ningu ye kiu chuni kea?’ momu ‘Ningu ye kiu shoni kea?’ momu ‘Ningu ye kiu pepuni kea?’

³² Kughengu Jewkumomiqo no thime hipaqo kümtsü phu acheni, eno nongu Papù kungugha lo akeu no nongu no hipaqo avehupu shi akeu ithi anie.

³³ Ikemu Alhou kükaphu eno pa chipiumikucho paghi phululo, eno thime hipaqo kümtsü nongu küphatsü nani ke.

³⁴ Tighenguno thoghiu vehu pesü amlosa kevilo, kughengu thoghiu no thoghiu tsalà ghenguno amlo sakepu anani ke. Atsala-atsala lo amlo küsapu akeu no tipau tsalà ghenguno lukümkha ke.”