MATTHEW 4 - Sümi Tiqhelimi Bible

Timi Küghünamokeu-a lo Jisü Peju keu

¹ Tipathiu Alhou Ghungu no Jisü sasü küghünamokeu-a lo tüghami pelo ghuju penike pa sasü wuve.

² Jisü ye putho tsalà eno pucho tsalà lhobidi kümvüve kethiu müzüthive.

³ Tüghami hu no pa lau ighino pi, “Nono Alhou Nu shi aghí aye, atu hipaqo vilo asho ilhovelo pilo.”

⁴ Jisü no khochile, “Ishi yèpüani: ‘Timi ye achuqupu shou likhi bepe xümlae, ikemu Alhou no pikeu tsa shou bepe xülu nanie.’”

⁵ Tithiu tüghami hu no akimthe mishighüna lo Jisü sawu no pa pelo achineki kütsüqa lo puthugho pe.

⁶ Tüghami hu no pi, “Nono Alhou Nu shi aghí aye, ilhe iqivelo.” Kughengu ishi yèpüani: “ ‘Pa no paw kungumi pelo O tucho penike azah tsü nani eno O pukhu pelo atu shoumu püsüpuku pemo nike ghenguno panongu no panongu u lono O khapeluve nani.’”

⁷ Jisü no pa khochile, “Hi ghí yèpüani: ‘Ampeu O Lhou theju kevilo.’”

⁸ Itaghi, tüghami hu no Jisü sasü ighono chuqumghai keu naghuto lakhi lo saiku no ayeghi lo kükaphuqo qhivütsüni akeu kümtsü pa pìye.

⁹ Eno pi, “Nono qhoqhünhe no I mülá aye, I no hi kümtsü O tsüveni.”

¹⁰ Jisü no pa vilo pi, “I lau no chevelo, Satan! Kughengu ishi yèpüani: ‘Ampeu O Lhou likhi mülá lo eno pa likhi huthu lo.’”

¹¹ Tipathiu tüghami ye Jisü qhive no wuve, eno kungumiqo no ighino pa tucho-hiju luve.

Jisü no Kütsü thuve keu

¹² Kughou Jisü no John ye akughuki lo süvae ipi chilu keno, pa ye Galilee lo idewove.

¹³ Pa ye Nazareth qhive no Capernaum ipikeu-a lo wu no tile xüacheuve. Capernaum ye Zebulun ngò Naphtali ko-aqha lo Galilee züghi phivilo ke.

¹⁴ Tiye, Isaiah tungkupuu vechewo kiu pipüa keno shikupu niye ke:

¹⁵ “Zebulun ngò Naphtali yeghi, Azüghi Laghi, Jordan nguno hukukuu Jewkumomiqow Galilee

¹⁶ àküzǘ lo xü akemiqo no aküvü kijè lakhi ithuluvae; akithí yekükhü yeghi lo xü akemiqo shou aküvü lakhi ipeghivae.”

¹⁷ Tipathiu Jisü no ishi kütsü thuve, “Amlo pebidelo, kughengu kungugha kükaphu ye kupunú ighivae.”

Jisü no Pa Khopemi Atüghimiqo Kulù

¹⁸ Jisü no Galilee züghi mükü lo alà cheche kelo, Simon, Peter ipi ku chekeu eno pa thiküzüu Andrew ipikeu pama athiazü, pa no ithulu. Pama ye akhakükhami kehu azüghi lo akhame vesü ae.

¹⁹ Jisü no pi, “Ighilo, I papelo, I no nokujo pelo akha khalu ketoi timi khalu penike puwunie.”

²⁰ Pama no akimighi shi akhameqo qhive no Jisü papesü wuve.

²¹ Tile no chesü wu kelo, pa no athiazü kütami kini ithulu, Zebedee nu James eno pa thiküzüu John. Pama ye pama papù Zebedee sasü ashuka lo akhameqo pukho ae. Jisü no pama ku

²² ikelo, paikhavi lono pama no ashuka ngò pama papù qhive no Jisü papesü wuve.

Jisü no Aküsümi Shipivi

²³ Jisü ye Galilee qha kümtsü lo wu no synagogqo lo kütsü, akükaphu sütsa kiviu pesü asheshu eno küsükinimi ngò aküsǜ jeli kümtsü shipivi ae.

²⁴ Jisü ghili Syria qha kümtsü külha wove, eno timiqo no aküsǜ jeli sǜ akemi, ighono minheqhi sǜ akemi, tüghaküsa no tsüghape akemi, kilighakipemi, eno aphimpi ithamlave kemiqo kümtsü pa lau saighi; eno Jisü no panongu shipivi tsüe.

²⁵ Timi kutomo Galilee, Decapolis, Jerusalem, Judea eno Jordan ko-aqha lono ighi kemiqo no pa pape wuve.