MATTHEW 3 - Sümi Tiqhelimi Bible

John Baptiz Kishiu no Alaghi Ghephe tsü

¹ Tipau ghuloki lo John Baptiz kishiu ighino Judea lo küghünamokeu-a lo kütsüsü ighi

² eno ishi pi, “Amlo pebidelo kughengu kungugha kükaphu ye kupunú ighivae.”

³ John ye tungkupuu Isaiah vechewo ishi pipüa keu hu ke: “Küghünamokeu-a lono asütsa lakhi no ishi ighamuku anie, ‘Ampeu ghenguno alaghi ghepe qhitsülo, pa no wu kepu laghi müzüchoi shitsülo.’ ”

⁴ John’w tiphimini ye sayeshi mhi no mülà keu, eno pa ye ashiyiko pokha no pa chita khapu eno pa ye tülhaqu ngò aghasa lo akhingozü chuche.

⁵ Jerusalem, Judea qhalo eno Jordan ko-aqha kümtsü lono timiqo no John lau ighie.

⁶ Panongu no pütüta xinéqo piphe püzü John no Jordan Ghoki lono panongu baptiz shitsüe.

⁷ Ikemu kughou Phariseemi ngò Sadduceemiqo kutomo no pa no baptiz shi akeu-a küdau chekeu ithulu keno, pa no ishi panongu vilo pi: “Nongu apighitiqo! Khuu no nongu pelo Alhou loghukighide chekeu lono polu penike pikichive kea?

⁸ Amlo pebideve keu toi xüpe pìyelo.

⁹ Eno nongu ye nolikhi no vilo, ‘Ningu ye Abraham no ningu papù ke,’ ipi pilu nani küghashi kümsü kevilo. I no nongu vilo pìní, Alhou ye atu hipaqo pesü Abraham ghenguno anuli kughulhopheve tsülu nani.

¹⁰ Amghü ye asüboqo kuhu phivilo kutò pe ani, eno asübo khijehi no axathi kivi pithímoni keno yeqhive no ami lo vesüve nani.

¹¹ “Nongu mlo pebide penike ghenguno ni ye azü pesü nongu baptiz shitsü ani. Ikemu khuu I shelo cheni keno pa ye I nguno akumtou ke, ni ye pa pukhukuqhomu pe küzü kumoe. Pa no Aghungu Kimthe eno ami pesü nongu baptiz shitsü nani.

¹² Paw fuleve kepu thigha ye pa u lo ani, eno pa no pa niqa shikimtheve püzü pa thì pekütsü pesü ale lo sǘ nani ikemu amuu ye khilemu ghapinhe müla keu mi lono pitive nani.”

Jisü Baptiz Shikeu

¹³ Ikelo Jisü ye John pelo baptiz shitsü peniye Galilee lono Jordan ghoki lo ighi.

¹⁴ Ikemu John no pa lakha ghi pi, “Nono ni baptiz shitsü moayesa ani püzü, nou no I lau ighi ani keshea?”

¹⁵ Jisü no khochile, “Itehi ghengu ye ishi aghivelo; achipiumikucho kümtsü shikupu nike ghenguno hipau shikeu no achipi ke.” Tile no John no pulove tsü.

¹⁶ Jisü ye baptiz shive kemtsa, pa ye azü lono khalau ipeghive. Tipa mtsa no kungugha khaqhive, eno Alhou Ghungu no miqhedu lakhi toi pa shou ikughi akeu pa no ithulu.

¹⁷ Eno kungugha lono asütsa lakhi ishi pi, “Hiye I no qhuivü chekeu I nu ke; ni ye pa shou I mlokiqi achenie.”