MATTHEW 28 - Sümi Tiqhelimi Bible

Jisü Ye Xülethuvae

¹ Sabbath tsalà thiu, apine tsalà atüghiu lo tsütho ipeghi kelo, Mary Magdalene eno Mary lakhiu pama ye Jisü sükumo ju niye wue.

² Tilehi ayeghi küghütha kijè lakhi ighie, kughengu Ampeu’w kungumi no kungugha lono iqighi, eno akumoki lo wu no atuqu tukulove tsü püzü tipau shou iqa ae.

³ Pa jukoghe ye tsütsüpha toi, eno paw tiphimini ye murasü nguno miyetsüghoi pepu ake.

⁴ Ikelo ghükhemiqo ye kungumi hu ju pesü shishe msàve eno panongu ye thüghüive eno akithí kumlho shive.

⁵ Ikelo kungumi hu no totimi pama vilo pi, “Msà kevilo! Nokujo ye Jisü yeda pìthíve keu phu cheni ipi I no ithi anie.

⁶ Pa no pipüa keu toi, pa ye hilehi kühae; pa ye xülethuvae. Ighino khilehi pa sükumo qhipüa keno julo.

⁷ Mtazü wu püzü pa khopemiqo vilo ishi pilo: ‘Pa ye akithí lono xülethuvae eno nongu züu no pa ye Galilee lo wuve niye cheae. Tilau no nongu no pa sasü kusholu nani.’ I no hi nongu vilo piakeu kümsüchilelu lo.”

⁸ Ikehu totimi pama no akimighi shi akumoki qhive no, akümsa eno alokivi küqha ghi, Jisü khopemiqo vilo pi niye posü wuve.

⁹ Zülile no Jisü no pama sasü kusho no ishi pi, “Alo ani kema?” Ike pama no pa lau ighino pa pukhu mutuluve püzü pa müláe.

¹⁰ Tisheno Jisü no pama vilo pi, “Msà kevilo. Wulo eno I thiküzümiqo vilo Galilee lo wulo pilo; tilau no panongu no I sasü kusholu nani.”

Ghükhemiqo no Asütsa Pìthi Keu

¹¹ Totimi pama no alà lo che kelo, ghükhemiqo khami no mishighüna lo ilo no achinetomiqo vilo kiu shive keno kümtsü lhepe pivetsü.

¹² Ikelo achinetomi ngò kichimiqo kusholu no avehu kümqüve eno panongu no pisa kutomo pesü ghüshimiqo tsüve no

¹³ panongu vilo pi, “Nongu ye ishi pilo, ‘Ningu no putho lo zü ake lono pa khopemiqo no ighi püzü pa kumo pükape wuvae.’

¹⁴ Kughou atsa hipau angh vilo pithive keno, ningu no pa pütsakümtshaluve nani eno nongu ye aküpüna shipemo nanie.”

¹⁵ Ikelo ghüshimiqo no pisa luve no panongu vilo kíshi pilo pi mijetsü keno titoi pivetsü. Eno hipau ghili ye Jewmiqo dolo aqha kuchopu veküpha wove no ishi kutólo hipau tsa pekishe achephi.

Azakütsü Akijeu

¹⁶ Ikehu akhopemi pano chighiqhaqhi ye Galilee lo Jisü no panongu vilo naghuto khilehi wulo pi keno tilehi wue.

¹⁷ Kughou Jisü ithulu keno, panongu no pa müláe; ikemu khami ye ta pülümo ghi ae.

¹⁸ Ikelo Jisü no panongu lau ighino pi, “Kungugha lo eno ayeghi lo kükagha kümtsü pesü I tsüvae.

¹⁹ Tighenguno shiye kümtsü lau wulo eno I khopemiqo shilu pelo; Apù jeku, Anu jeku eno Aghungu Kimthe jeku no baptiz shitsülo,

²⁰ eno I no azah nongu tsüve keu kümtsü papelu penike panongu kütsü tsülo. Eno ni ye kuchou no, ashekha ghuloki kutólo pülhapuju nongu sasü ache nani.”