MATTHEW 27 - Sümi Tiqhelimi Bible

Judas no Pa Likhi Pa Tshüqhi Pìthíve

¹ Inaqhe itheno, achinetomiqo gholo kichimiqo kümtsü kumqo no kíshi püzü Jisü pìthíve nike no aküpüghü jeli shiae.

² Ike panongu no ayikichhe pesü Jisü tshüve, eno sawu püzü Angh Pilate u lo sǘvetsü.

³ Judas khuu Jisü thechu shive keno, pa ye kughou Jisü shou küghathabeve keu ithive keno, pa no shipimive keu lo amlo kütakihive eno tsandiyi shighi pesü wu no achinetomi eno kichimiqo lau pechilesü ighi.

⁴ Pa no pi, “Ni ye axiné shivae, kughengu ni ye akipimí küha keu timi pesü thechu shivea ke.” Panongu no khochile, “Tiye ningu vilo kiu shilo pi kea? Tiye O likhi O vehua thono!”

⁵ Ike Judas ye pisa hu pesü achineki lo vesüve no cheve. Tisheno pa ye wu püzü pa likhi pa tshüqhi pìthíve.

⁶ Achinetomiqo no ghükayiqo kicheluve püzü ishi pi, “Hipau pesü achinekiw akiníbo lo sǘ nikeu ye ayeza kiqi lo achipi kumoe, kughengu hiye ajì no qhüve keu pisa ke.”

⁷ Tighenguno panongu no küptsave no, pisa hipau pesü inamiqo sükumo qhokeu-a shini ke ghenguno ayeghi lì kümlamìw alu lakhi qhüve.

⁸ Tighenguno ishi kutólo hipau pesü, “Ajì no qhü keu yeghi,” ipi cheni.

⁹ Tishi keu vechewo tungkupu Jeremiah no ishi piqhipüa keu shikupuve, “Panongu no ghükayi shighi luve tsü, tiye Israel timiqo no pa shou ame kihithape qhitsü ke,

¹⁰ eno tiye Ampeu no azah I tsü keu toi, panongu no tipau pesü ayeghi lì kümlamìw alu qhüve keu lo peithave ke.”

Jisü no Pilate Zülo Puthugho

¹¹ Tishi akelo Jisü ye angh zülo puthughoe, eno angh no pa vilo iniju, “No ye Jewmiqo kükau keshea?” Jisü no khochile, “Nono ti pivae.”

¹² Kughou achinetomiqo eno kichimiqo no pa nguku ghi iniju keno, Jisü ye kiumu khochilemoe.

¹³ Ikelo Pilate no iniju, “Panongu no O lachile akeu shepe pesü pi ighi akeu no ye chilu anima?”

¹⁴ Ikemu Jisü ye akipimí pa tsü akeu lo lakhimu khochilemoe, ikelo angh ye shishe akichiqhive.

¹⁵ Ike tiqhitini ghuloki lo alhoaye lono angh ye aqokitikhi pulou lono akughumi dolo lakhi kuqhopheve tsüche.

¹⁶ Tipau tüqhüdo lo alhoküsa lo ajekipimi lakhi Barabbas ipikeu akughu shiae.

¹⁷ Ikehu kughou aqokitikhi no hekütsüluve keno, Pilate no panongu vilo iniju, “Nongu ye I pelo khikhiu xaphe pesü nongu tsüpe nishi ani kea: Barabbas keo, Jisü, Messiah ipi chekeu kea?”

¹⁸ Kughengu panongu no panonguw lüthü lá ghenguno Jisü pesü pa u lo phesü püakeu pa ye ithi ake.

¹⁹ Kughou Pilate no xakütha lakhü lo iqa akeno, pa nipu no asütsa hitoi pa lau pi puwu, “Akipimí küha keu timi tipau shou kiumu shikepu kumoe, kughengu ìji I samou ni ye pa ghenguno aloqhi ime püani ke.”

²⁰ Ikemu achinetomi eno kichimiqo no aqokitikhi xukutho püzü Barabbas xapheve no Jisü pìthíve penike Pilate vilo khue.

²¹ Angh no ishi iniju, “Nongu ye I vilo hi pama dolo khiu nongu ghenguno xapheve tsülo pi kea?” “Barabbas,” ipi panongu no khochile.

²² “Imaye, Messiah ipi ku chekeu Jisü pesü I vilo kiu shivelo pi kea?” ipi Pilate no iniju. Ikelo panongu kümtsü no khochile, “Pa yedavelo!”

²³ Pilate no iniju, “Kushiye kea? Pa ye ayeza heküxá kümlà kiu shipüani kea?” Ikemu panongu no alau shi, “Pa yedavelo!” ipi igha kithe auve.

²⁴ Kughou timiqo no muqhumüza thuve niye auve eno Pilate ye kiumu shimlava ipi ithive keno, pa no aqokitikhi zülo no azü pesü pa u mütsüve eno ishi pi, “Timi hipau pìthíve akeu lo I kipimí kiumu kühae, hiye nongu makho ke.”

²⁵ Ikelo timi kümtsü no khochile, “Pa kithí makho ye ningu shou eno ningu tianuli shou ikughi pelo.”

²⁶ Tisheno panongu lau pa no Barabbas khaqhiphe pe tsüve. Ikemu Jisü ye akighikipili pesü heqhi no yeda pìthíve penike ikhiphe pe tsüve.

Ghüshimiqo no Jisü Junu

²⁷ Tisheno angh’w ghüshimiqo no Jisü sailo angh kikhala lo qhi, eno ghüshimi lojiqo kümtsü hekütsü no pa sühope kumqoluve.

²⁸ Panongu no pa phì xave tsü eno huchuhuyi keu chijeboboi-phi lakhi pesü pa pu-ue,

²⁹ eno asahu ghoküna pe akütsükuqho mülà no pa pipe. Panongu no pa u ajeu aküsǘ lakhi ikhisü tsü. Tisheno panongu no pa gizülo qhoqhünhe no pa junu ghi pi, “Jewmiqo kükau sheqhelo!”

³⁰ Panongu no Jisü gi lo müsüte puku tsü, eno aküsǘ pesü pa kütsü lo ide-ide hepuku tsüe.

³¹ Panongu no pa junuqhi tave kethiu, chijeboboi-phi xave tsü püzü paw tiphimini pesü pa pu-uve. Tisheno pa yedave nike sasü wuve.

Jisü Yedave Keu

³² Panongu no khalau wuche kelo, Cyrenemi lakhi Simon ipikeu sholu, ikelo ghüshimiqo no anguka lono pa pelo Jisü’w kros xapu pe.

³³ Panongu no Golgotha ipikeu-a lakhi lo ighi, tipau kiqi ye “Akütsü boghe-a.”

³⁴ Tilehi ghüshimiqo no Jisü pelo ye peniye atsaiji gholo khumtsai keu kiteve no pesü pa tsü, ikemu pa no ti micheju no tithiu ye yètsümove.

³⁵ Kughou Jisü yedave keno, panongu no asaqhi no paw tiphimini kijéluve.

³⁶ Eno panongu ye tilehi iqa ghi Jisü khekuto auve.

³⁷ Jisü kütsü shou panongu no akipimí pa tsü keu yepìthi tsa hitoi yèpeqhie: Hiye Jisü, Jewmiqo Kükau ke.

³⁸ Jisü gholo hekibidemi kini yeda pe püake, tiye lakhi no pa u ajeu eno lakhi no pa u piyiu.

³⁹ Tipau vechesü wukemiqo no Jisü thaigha keu tsa pa shou pipuku eno panongu kütsü küngü

⁴⁰ ghi ishi pi, “No ye achineki kuboleve no atsala küthü lono shiqhepukuve niye kutò anike kumo? O likhi O xalulo! Tsalá nono Alhou Nu shi aghí aye, kros lono iqighive julo!”

⁴¹ Titoi, achinetomi, ayeza kükütsümi eno kichimiqo ghí Jisü junuqhie.

⁴² Panongu no ishi pi, “Pa ye kütami xalu kemu pa likhi pa xalu amoe. Pa ye Israelmi kükau ke! Pa pelo itehi no kros lono iqighive pelo eno ningu no pa pülünie.

⁴³ Pa ye Alhou shou pükhü achenie. Alhou no pa xalunishi aghí aye, itehi no pa xaluve pelo, kughengu pa no ishi pi acheni, ‘Ni ye Alhou nu ke.’ ”

⁴⁴ Titoi pa gholo yedapüa keu hekibidemi pama ghí kütami gholo Jisü thaigha keu tsa pie.

Jisü Kithí

⁴⁵ Puchomta lono avelau ayì küthü kutólo àküzǘ no ayeghiqha kümtsü küzüpholuve.

⁴⁶ Avelau ayì küthü kihe ghuloki lo, Jisü no ighamuku no ishi pi, “Eli, Eli, lema sabachthani?” Hipau kiqi ye, “I Lhou, I Lhou, no ye kushiye I qhivea kea?”

⁴⁷ Tilehi puthugho akemiqo dolo khami no ti chilu kelo, panongu no ishi pi, “Pa ye Elijah ku anie.”

⁴⁸ Tishi kemtsa panongu dolo milakhi no powu püzü aghüshi lakhi peighi. Pa no aghüshi lo akiqhizü pütsüve püzü Jisü pelo müsüye penike asǜ lakhi lono jì pesü chhopuku tsüe.

⁴⁹ Ikemu kütami no pi, “Itehi ye palokutove aghílo. Elijah no ighi püzü pa xalu nani keo xamla keno ningu juni nolo.”

⁵⁰ Eno kughou Jisü no itaghi asütsa kuloghi shi igha keno, pa ye süthahuve.

⁵¹ Tishi kemtsa, achineki lo nhaqhiphi hu no atsǜqo lono abò kutólo ixü kütüta kini shive. Ayeghi no itha, atuqo no amta lono ipokütüta shive

⁵² eno akumokiqo ipove no lhapheve. Akimthemi thive no akeqo phimpi kutomo xüputhuve.

⁵³ Eno Jisü no xülethuve kethiu, panongu no akumoki lono ipeghive püzü akimthe mishighüna lo ilo no timi kutomo lau ipeghi pìye.

⁵⁴ Kughou aqhe shou zatsüu eno pa gholo Jisü khe akemiqo no ayeghi küghütha eno kiu shi akeno ti kümtsü ithulu keno, panongu ye kichi-mamaive no akichiqhi ghi ishi pi, “Pa ye kuchou no Alhou nue!”

⁵⁵ Tilehi totimi kutomo putosü lono chhejua. Panongu ye Jisü vehupuqo jukuto tsü niye Galilee lono pa papesü ighi kemiqo ke.

⁵⁶ Panongu dolo Mary Magdalene, James ngò Joseph pazá Mary eno Zebedee nu pama pazá ishi ae.

Jisü Sükumo Kükütsü

⁵⁷ Avelau shive kelo, Arimathea lono ighi kemi kiními lakhi Joseph ipikeu ighi. Pa ghí Jisü papeluve kemi lakhi ke.

⁵⁸ Pa no Pilate lau wu no Jisü sükumo khu, ikelo Pilate no asükumo pa tsüve penike azah tsüve.

⁵⁹ Ike Joseph no asükumo luve püzü phephei keu phì akimthe pesü küzüve,

⁶⁰ eno tipau pesü pa no atu chhupho no akumoki akithé shi mülàpüa keu lo sǘve. Pa no atu kijè tukulo pewo akumoki hukikha khave eno wuve.

⁶¹ Mary Magdalene eno Mary lakhiu pama ye akumoki ghüngü lo iqa ae.

Akumoki lo Ghükhemiqo

⁶² Tishiwo thoghiu, tiye Sabbath tsalà thiu aghili kutò chekeu tsalà lo, achinetomi ngò Phariseemiqo Pilate lau wue.

⁶³ Panongu no pi, “Akijeu, ningu no kümsülu akeu ye, timi pishikiqhiu hupau no xüakelo, ‘atsala küthü thiu ni ye xülethuve nani,’ ipi ake.

⁶⁴ Tighenguno nono azah tsüve no atsala aküthüu kutólo akumoki akivishi kheluve pelo. Tishimo aye, pa khopemiqo no ighi püzü asükumo püka pesü wuve no timiqo vilo pa ye xüputhuve ipi nosake. Hi ashekhau no atüghiu nguno alau pishikiqhi alhoküsau shive nanie.”

⁶⁵ Pilate no panongu vilo pi, “Ghükhemiqo sawu lo, eno kíshi asükumo akivishi kheluve moayesa keno nongu no ithi ake toi tishive lo.”

⁶⁶ Ike panongu no wu püzü atu mekha chekeu pesü akumoki mekhave eno ghükhemiqo pelo akivishi kheluvepe.