MATTHEW 24 - Sümi Tiqhelimi Bible

Achineki Kütsave nikeu eno Ashekha Tsalà Michipu

¹ Jisü ye achineki qhive no chesü wuche, ikelo pa khopemiqo no pa lau ighino achineki shipüa keqo kiche pesü pa pìye.

² Jisü no iniju, “Nongu ye hipaqo kümtsü ithulu anima? I no kuchou no nongu vilo pìní, hilehi atu lakhimu lakhi shou bepe ngomove nani, eno atu kümtsü tuleqhive nani.”

³ Jisü no Olive naghuto lo iqa akelo, pa khopemiqo no lomo shi pa lau ighi eno pi, “Ningu vilo pitsülo, tipaqo ye kughou no shikupu nani kea, eno nono ighi nikeu eno ashekha ghuloki michipu ye kiu kea?”

⁴ Jisü no khochile: “Khuu pelomu nongu pishiqhive pemo nike jukuto alo.

⁵ Kughengu kutomo no I je lono, ‘Ni ye Messiah ke,’ ipi ighi nani eno kutomo pishiqhi nani.

⁶ Nongu no nongu kupunú lo aghüshi akeu eno putou aghüshi akeu uyewu sütsa chilu nani, ikemu tipaqo no nongu shithüghüive mokepu shi jukuto alo. Hipaqo ye shikupu moayesa nani, ikemu ashekha ghuloki ye ighini aphike.

⁷ Shiye lakhi no shiye lakhi mjochile ipeghi nani, eno kükaphu lakhi no kükaphu lakhi mjochile ipeghi nani. Püqümiye keu eno ayeghi küghüthaqo a-a kütüta lo anani.

⁸ Hipaqo kümtsü apunu küsǜ huthu akeu paphi ke.

⁹ “Tishi no nongu ye pishi-puju eno pìthíve penike pesü tsüve nani, eno shiyeqo kümtsü no I ghenguno nongu mithi nani.

¹⁰ Tipau ghuloki lo kutomo no aküpülü pheve no wuve nani eno lakhi no lakhi thechu shi nani eno kimthi kilé nani,

¹¹ eno kichileu tungkupumiqo kutomo ipeghi nani eno timi kutomo pishiqhi nani.

¹² Küsakügha no thuwuve keu ghenguno timi kutomo mlo lo kikimiye mkove nani,

¹³ ikemu khuno no ashekha kutólo mutotoi puthugho aghíni keno xaluve nani.

¹⁴ Eno Alhou kükaphu tsakiviu hipau no thopi lakhi shi ayeghiqha kümtsü lau kütsüwu nani, eno tithiu no ashekha tsalà ighi nani.

¹⁵ “Ikehu kughou nongu no ‘aphikümqhüpu tipau küghüküghaleive pe chekeu,’ khikhi Daniel tungkupuu no pipüani keno, tipau no akimthe-a lo puthugho aghí keu ithulu aye (phi akemi no hi ithilo)

¹⁶ Judea lo akemiqo pelo naghutoqo lo pove pelo.

¹⁷ Aki kütsüqa lo akemi khumu aki lo anhemgha ikhi phelu niye aqhou iqighi pe kepu kumoe.

¹⁸ Alu lo akemi khumu idewo ubephi luwu kepu kumoe.

¹⁹ Atsala tipaqo lo totimi angá mishí akemi ngò azá angapini akemiqo ghenguno kiutoi akümsapu kea!

²⁰ Süsü tsalà momu Sabbath tsalà lono pokajo keu shipemo nike inikhu alo.

²¹ Hipau tüqhüdo lo aghime kitikhi anani, eno tiye ayeghiqha lhophe ke lono ishi kutólo titoi ighi mphi keu momu ighi nikeu lomu titoi akiniù ighimo nikeu ke.

²² “Tsalá atsala tipaqo no kughukhove moaye, timi khumu xüluni chemoe, ikemu kisheluve kemiqo je lono atsala hipaqo ye kughukhove nani.

²³ Tipau süchedo lo tsalá khiuala no O vilo, ‘Julo, Messiah hi chenie!’ momu, ‘Pa ye hu cheni!’ ipi aghí namu ti pülü kevilo.

²⁴ Kughengu kichileu messiahqo ngo kichileu tungkupumiqo no pishiqhi niye ipeghi püzü akümzapu eno amichipu kümlà kijè shi nani, eno tsalá shikulupu shi aye kisheluve kemiqo ghí pishiqhi niye shi nani.

²⁵ Julo, I no ashe-azü shi nongu vilo pivae.

²⁶ “Ikehu, tsalá khukhumu O vilo, ‘Messiah ye hulehi küghünamokeu-a lo anie,’ ipi namu khalau ipe kevilo; momu ‘pa ye hilehi achebo alou anie,’ ipi namu pülü kevilo.

²⁷ Tsütsüpha kipelau ipeghi kelo kulolau ghí ithulu chekeu toi, Timi Nu ighi kelo ghí titoi nanie.

²⁸ Khilehi ashikumo ani keno, tilehi aluquqo no kumqo nani.

²⁹ “Aghime kitikhi tsalà hipaqo thiu, paikhavi lono, “ ‘khetsünhe no züchiyive nani, eno aqhi no pa küvü tsümove nani; ayepuqo no atsütsǘ lono ikiqive nani, eno atsütsǘ lo akeu jeli kümtsü süküghütha nani.’

³⁰ “Tilehi kungugha lono Timi Nu akeu michipu ipeghi nani. Eno kughou Timi Nu atsütsǘ lo khüngküsü lono aküka eno ajuküvü kijè gholo no chekeu ithuluni keno, ayeghi lo timiqo kümtsü no qau khave nani.

³¹ Eno pa no afuko ghügha kijè gholo no paw kungumiqo puwu nani, eno panongu no ayeghi cheku bidí lono pa no kisheluve kemiqo hekütsü süghi nani, eno tiye ayeghi ashekha lono ashekha kutólo kisheluve kemiqo süghi nani.

³² “Mububo lono akükütsü hipau shikalulo: Kughou aloka lo apishe ipeghive püzü tipau nipa no miní ipeghiveni keno, nongu no tiye mütsü tsalà chea ipi ithive cheni.

³³ Tihutoi, kughou nongu no hipaqo kümtsü ithuluni keno, ashekha tsalà kupunúvea eno tiye ahukikha lo ighivea kepi ithilo.

³⁴ Kuchou no I no nongu vilo pìní, hipaqo kümtsü mütsümishei shikupuve moke thaqhülo hipau tiqheli ye kühave keu shimo nani.

³⁵ Atsütsǘ eno ayeghi ye hauve nani, ikemu I tsa ye khilemu hauvemo nani.

Khunomu Atsala eno Ayì kihedo Mthae

³⁶ “Ikemu atsala momu ayì kihedo ghili ye khunomu mthae, kungugha lo kungumiqo ke kumo no Anu ghí mthae, ikemu Apù likhi no ithi anie.

³⁷ Noah tsalà ghuloki lo toi, Timi Nu ighi kelo ghí titoi shi nani.

³⁸ Azü no yimi keu tsalà ighi mphi zülo, timiqo ye chu-shoa, külakupu shia eno külakupu tsüae, eno tiye Noah no ashuka lo ilove keu tsalà kutólo tishi ake;

³⁹ atshünazü no panongu kümtsü yimive no pesü wuvemo ke kutólo, panongu ye kiu shive nani keno kiumu mtha no ae. Timi nu ighi kelo ghí hitoi shi nani.

⁴⁰ Mikini alu lo hu anani; ikelo lakhi sawuve nani eno lakhi ye qhive nani.

⁴¹ Totimi kini ao shesü anani; ikelo lakhi sawuve no lakhi ye qhive nani.

⁴² “Kiu tsalà lono nongu Mpeu ighi nani keno nongu ye mtha ke ghenguno jukuto alo.

⁴³ Ikemu hi vethalulo: Tsalá aki mpeu no putho lo kiu tüqhüdo lono küpkami ighi nani keno ithi aghí ke aye, pa ye jukuto anani eno pa ki hephosü iloghi pemo nani ke.

⁴⁴ Tighenguno nongu ghí kutokughoi pe amasa, kughengu Timi Nu ye nongu no huqhemo keu tüqhüdo lono ighi nani ke.

⁴⁵ “Imaye, khuu no pichebekulu eno alokütsü qeu kea? Tiye khuu ampeu no pa kibo lo aqemiqo shou pichempiu shipe no ado achipi lono panongu achuqu tsüpe keu ke.

⁴⁶ Ampeu no idechile ighi kelo, aqeu tipau no pa mpeu no pichetsü keu kümlà shi aghí keu phulu aye, pa ghenguno akivipu ke.

⁴⁷ Kuchou no I no nongu vilo pìní, pa no aqeu pelo paw küakini kümtsü shou ampeu shipe nike picheve nani.

⁴⁸ Ikemu tsalá aqeu no küsakügha shi no pa likhi pa pütsa ghi, ‘I mpeu ye ighi nikeu ado kushuwa lunani,’ ipi

⁴⁹ no pa küsàmi aqemiqo heqhi thuve püzü shokümzümiqo gholo chu eno sho auve aye,

⁵⁰ aqeu tipau mpeu ye aqeu no huqhemo keu tsalà eno ayì kihedo mtha keu dolo no ighi nani.

⁵¹ Ampeu no pa qeu aleqhi shi ghithave nani eno pa pesü kühaküghamiqo gholo qhive nani, eno tilehi ahu tsüghü-bubushi qa anani.”