MATTHEW 22 - Sümi Tiqhelimi Bible

Külakupu Ghulhu Pesü Kimghi pìye

¹ Jisü no itaghi aholetsaqo vechewo panongu pütsa ghi pi:

² “Kungugha kükaphu ye akükau lakhi no panu ghenguno külakupu ghulhu kutò pe qhi keu toi ke.

³ Pa no pa qemiqo hapesü külakupu ghulhu lo kusü pepüa keqo kuwu pe, ikemu panongu no ighi nikeu milive.

⁴ “Ikelo itaghi pa no pa qemiqo alau puwu no ishi pi, ‘Kusüpüakeqo vilo ishi pilo, ni ye avelau ghulhu kutò pe qhivae, amishitsü ngò amishiti athakupu heqhi no thowkha kutoluvae. Külakupu ghulhu lo ighilo!’

⁵ “Ikemu panongu ye amlo tsümoe eno pütüta shélo wuve; lakhi no pa lu lo huve, lakhi no pa lhikishi-a lo wuve.

⁶ Eno kütamiqo no pa qemiqo tsüqüluve eno panongu kijipüsa eno heqhipithíve tsü.

⁷ Akükau ye axuideve. Ikehu pa no paw ghüshimi puwu püzü hekiqhimiqo pìthíve eno panonguw mishighüna-a pitileve tsü.

⁸ “Tishi no pa no pa qemiqo vilo pi, ‘Külakupu ghulhu ye kutovae, ikemu I no khunoqo kusüpüa keno panongu ye ighi küzüpu kumovae.

⁹ Tighenguno alaghila chekuqo lo wulo eno nongu no khuu ithuluni keno tipaqo aghulhu lo kusü lo.’

¹⁰ Ikehu aqemiqo no alaghilaqo lo wu püzü timi akivimi ghí eno alhoküsami ghí khijehi sholu keno panongu no ku kumqolu, ikelo külakupu chebo kijè akeu hu ye inamiqo no chhive.

¹¹ “Ikemu kughou akükau no inamiqo ju niye iloghi keno, tilehi timi lakhi ye külakupuw tiphiminiqo pepu aghimo keu pa no ithulu.

¹² Ike pa no iniju, ‘Aküsàu, no ye kíshi püzü külakupuw tiphimini pepumo no hilehi iloghi kea?’ Timi hu ye kiu tsamu pimlave.

¹³ “Tile akükau no aghinikishimiqo vilo ishi pi, ‘Pa pukhu eno au phedave lo, eno khalau vephe pe àküzǘ lo vesüve lo, tilehi ahu tsüghü-bubushi qa ananie.’

¹⁴ “Kughengu kutomo kukusü shike, ikemu khami likhi kishelue.”

Rommi Kükau lau Zame tsü keu Vehu

¹⁵ Ikelo Phariseemiqo ye khalau ipeve püzü Jisü no pikeu tsaqo lono pa likhi pa kitimeve niye kuchughue.

¹⁶ Phariseemiqo no panongu khopemiqo eno Herod papemiqo puwu no ishi pipe, “Akükütsüu, ningu no ithi akeu ye no ye kikhikighimi eno Alhou laghi kuchou kiqi lono kütsü achenie. No ye kütami no züluve chekemi kumo, kughengu pano ye khuu keno no ye tipau akhotoshi chemo ke.

¹⁷ Tishiaye hipau lo O kükümsü kiu ani keno ningu vilo pitsülo. Rommi kumokemiw zame pesü Caesar tsü keu ye achipi keo mokea?”

¹⁸ Ikemu Jisü ye panongu müqü lhoküsa ithi akehu ishi pi, “Nongu kühaküghaqo, nongu ye kushiye I kitime niye pükapütsa ani kea?

¹⁹ Zame tsü kelo peitha chekeu ghükayi I piyeju lo.” Panongu no Rommiw ghükayi lakhi pa lau peighi,

²⁰ ikelo pa no panongu vilo iniju, “Ghükayi lo akeu hiye khuu julho eno khuu shisü püani kea?”

²¹ “Rommi kükau ke,” ipi panongu no khochile. Tisheno pa no panongu vilo pi, “Imaye Caesar’w kiu keno pa tsüchilelo eno Alhou’w kiu keno Alhou tsüchilelo.”

²² Kughou panongu no ti chilu keno, panongu ye akichiqhive. Ikehu panongu ye pa qhive no chesü wuve.

Xülekuthu lo Külakupu

²³ Tipa tsalà lo xülekuthu kühae ipi chekemi Sadduceemiqo no Jisü lau ighino iniju.

²⁴ “Akükütsüu, Moses no pikeu ye tsalá timi lakhi no anuli shimo no thive aye, pa thiküzüu no pa nipu valuve no anuli-kughuko tsü püzü pa ghenguno saputhu tsü moayesae ipie.

²⁵ Ningu gholo athiazü tsünì ache, ike akichiú no anipu lu eno thive, ikemu anuli shimo kehu, pa thiküzüu no pa nipu valuve.

²⁶ Titoi athiküzüu akiniù eno aküthüu ghí eno iqi akütsüniu kutólo ghí tishive.

²⁷ Ashekha lo atotiu ghí thive.

²⁸ Imaye itehi, xülekuthu tsalà lo li ye khuu nipu shive nani kea? Kughengu panongu kümtsü no li lupe püani ke?”

²⁹ Jisü no khochile, “Nongu ye Kuchoyesü mu Alhou küká ghilimu ithi amoke ghenguno nongu ye shipimi anie.

³⁰ Xülekuthu tsalá lo timiqo ye akibo shikeu momu külakupu tsü keu shimo nani; panongu ye kungugha lo kungumiqo toive nani.

³¹ Ikemu kithimi xülekuthu tsa lo, nongu ye Alhou no nongu vilo kiu pipüani keno phimla aphi keshea?

³² ‘Ni ye Abraham Lhou, Isaac Lhou, eno Jacob Lhou,’ ipi ke eno pa ye kithimi Lhou kumoe ikemu küxümi Lhou ke.”

³³ Kughou panongu no ti chilu keno, aqokitikhi timiqo ye Jisü kükütsü ini pesü apuchopungove.

Azakütsü Akijeu

³⁴ Jisü no Sadduceemiqo ghehasüvae ipikeu Phariseemiqo no chilu kelo panongu ghí hekütsüluve.

³⁵ Panongu gholo lakhi, ayeza lo shitsau hu no Jisü peju ghi ishi iniju:

³⁶ “Akükütsüu, ayeza lo khipau no azakütsü akijeu kea?”

³⁷ Jisü no khochile: “ ‘O mlo, O ngulho eno O kükümsü kümtsü pesü O mpeu O Lhou kimiye lo.’

³⁸ Hino atüghiu eno azakütsü akijeu ke.

³⁹ Eno akiniù ye titoi: ‘O likhi O toi O kisüghümi kimiye lo.’

⁴⁰ Ayeza eno tungkupumiqo kükütsü kümtsü azakütsü hiküma shou bepe ani.”

Messiah ye Khuno Nu Kea?

⁴¹ Phariseemiqo hekütsü pesü aqoshi ngo akelo, Jisü no panongu vilo iniju,

⁴² “Messiah ye khuno nu ipi nongu ye kümsü ani kea? “David Nu ke,” ipi panongu no khochile.

⁴³ Pa no panongu vilo pi, “Imaye kushiye David ye Aghungu lono ‘Ampeu,’ ipi pa ku kea? Kughengu pa no ishi pi,

⁴⁴ “ ‘Ampeu no I mpeu vilo pi: “I no O ghümiqo pesü O pukhu qholo qhitsümo ke kutólo I u ajeu iqalo.” ’

⁴⁵ Imaye David no pa vilo ‘Ampeu,’ ipi aye kíshi no pa ye David nu shini kea?”

⁴⁶ Timi khuu nomu atsa lakhimu khochile mülave, eno tipau tsalà lono pa vilo iniju nikeu lo timi kümtsü no ighüve.