MATTHEW 21 - Sümi Tiqhelimi Bible

Jerusalem lo Jisü no Akükau Shisü Ighi

¹ Panongu no Jerusalem kupunúve no Olive Naghuto lo Bethphage lo ighi kelo, Jisü no akhopemi kini puwu

² ghi pama vilo ishi pi, “Nokujo züu aphu akeu lo wulo, eno tilehi khurha lakhi tshüpe ati sasü aghí keu nokujo no ithulu nani ke, tiküma kuqho püzü I lau saighi lo.

³ Khuala no nokujo vilo kiula pi aye, Ampeu no hiküma avehupu shi anie ipi lo, tishiaye pa no vejoi tiküma tsüpuwuve nani ke.”

⁴ Hitoi shikeu hu ye tungkupumi no kiu pipüa keno shikupu niye ke:

⁵ “Zion Ngá vilo pilo, ‘Julo, O kükau O lau chenie, akümtsha shi khurha lakhi sasü chenie, pa ye khurhati shou iqa püzü chenie.’ ”

⁶ Akhopemiqo no wu püzü Jisü no panongu vilo kichetsü keu toi shie.

⁷ Panongu no khurha eno khurhati saighi no Jisü pelo iqa penike ghenguno panonguw ubephi xapesü tiküma shou vebe tsüe.

⁸ Timi kutomo no panonguw ubephiqo pesü alaghi lo qhatsü, eno khami no asübo lono asǜ lokaqo miché pesü alaghi lo qhatsüe.

⁹ Timi kutomo no Jisü züu che eno khami pa pape chekemiqo no ishi igha che, “David Nu Hosanna!” “Khuu no Ampeu je lono cheni keno pa ye akümghau ke!” “Kungugha lo akiqheu Lhou sheqhelo!”

¹⁰ Kughou Jisü no Jerusalem lo iloghi keno, mishighüna lo akemi kümtsü no muqhumüzaive eno ishi inijue, “Hiye khuu kea?”

¹¹ Tile timi chekeqo no ishi khochile, “Hiye Galilee lo Nazareth nó ghami tungkupuu Jisü ke.”

Jisü Achineki lo

¹² Jisü no achineki khala lo ilo no küqhü-kili shi aghikemiqo kümtsü hapheve. Pa no pisa kili akemi eno miqhedu je akemiqow akibepu eno alakhüqo kümtsü tukulove tsüe.

¹³ Pa no panongu vilo pi, “Kuchoyesü lo ishi yèpüanie, ‘I ki ye akighini ki ipi ku nani,’ ikemu nongu no hipau pesü, ‘süxakuchumiqo küghütshü-a lakhi kughulhove tsüae.’”

¹⁴ Anhethi kighichemi eno apukhu kinitave kemi no achineki lo Jisü lau ighi, eno pa no panongu shipivi tsü.

¹⁵ Ikemu kughou achinetomi eno ayeza kükütsümiqo no Jisü no akümzapu kümlà shi akeu ithulu eno itimiqo no achineki khala lo, “David Nu sheqhelo,” ipi igha akeu chilu keno panongu ye aghaideve.

¹⁶ Panongu no Jisü vilo iniju, “No ye itimi hipaqo no kiu piani keno chilu ani kema?” Jisü no khochile, “Iyei, ike nongu ye khilemu hi phijumo keshea? “ ‘Itimi ngò angá kughunuqo kichí lono O sheqhe peniye Ampeu nono ku sasü ighike.’ ”

¹⁷ Tisheno pa ye panongu qhive püzü mishighüna khalau Bethany lo wu no tipa jì tilau ngove.

Jisü no Mububo Ghusho

¹⁸ Kughou Jisü no inaqhe ithe mishighüna lo ide woche keno, pa ye müzüthive.

¹⁹ Alaphe lo mububo lakhi ithulu kehu, pa no tipau lo wuju ikemu tiye anipaqo likhi thono kiumu pithí aghimoe. Tile no Jisü no mububo vilo pi, “O pelo khilemu akiniù athi pithí pemoniu!” Ikelo paikhavi mububo hu no thizümüive.

²⁰ Kughou akhopemiqo no ti ithulu keno, panongu ye akichiqhive. Eno panongu no ishi iniju, “Kíshi no mububo hu ye paikhavi no thizümüive kea?”

²¹ Jisü no khochile, “Kuchou no I no nongu vilo pìní, tsalá nongu no lipimo no aküpülü aghí aye, nongu no mububo shou kiu shive keno tilikhi kumo, ikemu nongu no naghuto hipau vilo, ‘wuvelo, O pesü azüghi lo vesüve lo,’ ipi aye tishive nani.

²² Nongu no aküpülü aghí aye, akighini lono kiu-kiumu khu keu nongu no ti ithulu nanie.”

Jisü’w Kükagha Iniju Keu

²³ Jisü no achineki khala lo iloghi, eno pa no kütsü akelo, achinetomi eno timiqo dolo kichimiqo no pa lau ighi. Panongu no pa vilo iniju, “No ye kiu kükagha pesü thime hipaqo shi ani eno khuu no kükagha hipau O tsü kea?”

²⁴ Jisü no khochile, “Ni ghí nongu vilo thime lakhi inijuni. Nongu no I khochilelu aye, ni ghí kiu kükagha pesü hipaqo shi cheni keno nongu vilo pìní.

²⁵ John no baptiz shi chekeu ye khilau no ighi kea? Kungugha lono keo, timi lau no ighi keu kea?” Panongu likhi panongu dolo küptsaju ghi ishi piae, “Tsalá ningu no, ‘kungugha lono ighi,’ ipi aye pa no ningu vilo ‘tishiaye nongu ye kushiye pa pülümo kea?’ ipi iniju nani.

²⁶ Ikemu ningu no, ‘Timi lau no ighi,’ ipi aye ningu ye timiqo msàe, kughengu panongu kümtsü no John ye tungkupumi lakhi kepi thebei ithi ani.”

²⁷ Ike panongu no ishi Jisü khochile, “Ningu ye mthae.” Tile Jisü no pi, “Ni ghí nongu vilo ni ye kiu kükagha lono hipaqo shi ani keno pimoe.

Athiazü Kini Pesü Kimghi pìye keu

²⁸ “Nongu ye kíshi kümsü ani kea? Timi lakhi no anu kini ache. Pa no atüghiu lau wu no ishi pi, ‘Anu, no ye ishí atsailu lo hu no mülà lo.’

²⁹ “ ‘Ni ye humoe,’ ipi pa no khochileve, ikemu itou ye pa kükümsü kilive no huve.

³⁰ “Tithiu apù no anu lakhiu lau wu püzü Tipau tho pi. Anu no khochile, ‘I no tishini, akijeu,’ ipi khochileve ikemu pa ye humove.

³¹ “Hi pama dolo khikhiu no apù no pulo akeu shilu kea?” “Atüghiu noe,” ipi panongu no khochile. Jisü no panongu vilo pi, “I no kuchou no nongu vilo pìní, zame küqhami eno kütüqhamiqo no nongu züu no Alhou kükaphu qholo ilo auvae.

³² Kughengu John no nongu lau ighi keu ye achipiumikucho laghi nongu pìye nike ghenguno ke, tishimu nongu no pa pülümoe; ikemu zame küqhami eno kütüqhamiqo ye pa pülüe. Eno nongu no ti ithulu kethiu ghi, nongu ye amlo pebidemoe eno pa pülümoe.

Mishichi Chekemiqo Pesü Kimghi pìye

³³ “Kimghi pìye keu tsa kütau lakhi iniju lo: Ayeghi pighimi lakhi ache ike pa no atsailu lakhi chie. Pa no ti homüxa aghutu putuve püzü atsaizü kütsüghǜ-a ghenguno aqò chhupe qhi no aqoghe lakhi mülà pukuve. Tisheno pa no atsailu pesü alukichimi khami lau mishichive pe no a-a kütau wuve.

³⁴ Kughou ghile ghuloki kupunúve keno, pa no pa qemiqo hapesü pa ghenguno axathi xapughi peniye mishichi chekemiqo lau puwue.

³⁵ “Ikemu mishichi chekemiqo no pa qemiqo tsüqüluve; panongu no lakhi kuoqhi, lakhi ye heqhipithíve eno aküthüu ye atu pesü veqhive tsü.

³⁶ Ikehu pa no atüghiu puwu keu nguno alau, aqemi kütamiqo hapesü panongu lau puwue, ikelo mishichi chekemiqo no azüu lo toi panongu lau ghí tishive tsüe.

³⁷ Ashekha lo pa no ishi pi, ‘Panongu ye I nu gihu kepu ke.’ Tisheno panu hapesü panoqo lau puwue.

³⁸ “Ikemu kughou mishichi chekemiqo no panu ithulu keno, panongu lakhi no lakhi vilo ishi pie, ‘Hino amheghi ighi nikeu ke. Ighilo, ningu pa pìthíve no pa mheghi luvetsünie.’

³⁹ Ikehu panongu no pa tsüqüluve eno atsailu lono khalau vepheve püzü pa pìthíve.

⁴⁰ “Tighenguno, kughou atsailu mpeu no ighini keno, pa ye mishichi chekemi tipaqo shou kiu shi nani kea?”

⁴¹ Panongu no ishi khochile, “Pa no ahaküsamiqo shou ahaküsapu shi pìthíve nani, eno pa no atsailu pesü mishichi chekemi kütamiqo pichíve nani, eno tipaqo no ghile hu ke ghuloki lo tüxatini pa saje tsü nani.”

⁴² Jisü no panongu vilo pi, “Nongu ye Kuchoyesü lo khilemu phimla aphi keshea? “ ‘Aki kishimi no atuqu milive keu no akhotou tuqu shivae; Ampeu no hipau shive tsüa, eno hiye ningu nhekithe lo akümzapue.’

⁴³ “Tighenguno I no nongu vilo pi anie, Alhou kükaphu ye nongu lau no ikhisüwuve no pesü khuno shiye no tipau pithikighishelu nani keno tipaqo tsüve nanie.

⁴⁴ Atuqu hipau shou veqhi iku kemi kümtsü vephopinive nani; eno atuqu hipau no khuu shou ikiqi ikughini keno tiye chishepho-pinive nani.”

⁴⁵ Kughou achinetomi eno Phariseemiqo no Jisü no kimghi pìye keu tsaqo chilu keno, pa ye panongu ghili piani kepi ithive.

⁴⁶ Panongu ye pa küghaluve niye alaghi phujua, ikemu panongu ye timi aqokitikhi msà ae, kughengu pa ye tungkupu lakhi kepi timiqo no kihi acheke.