MATTHEW 2 - Sümi Tiqhelimi Bible

Alokütsümi no Messiah Xuju

¹ Herod no akükau shi ake ghuloki lo, Judea ghakhu lo Bethlehem lono Jisü punúve kethiu, kipelau no alokütsümiqo Jerusalem lo ighino

² ishi iniju, “Jewmiqo kükau punú pe püakeu hu ye khile ani kea? Ningu ye pa yepu ipeghi keu ithulu kehu, pa mülá nike ighi ani.”

³ Kughou Akükau Herod no hi chilu keno pa ye amlo lo alokughuno kühave, eno Jerusalem lo xüküami kümtsü pa gholo amlosa küqhae.

⁴ Herod no achinetomi eno ayeza kükütsümiqo kümtsü ku kumqove, eno pa no panongu vilo Messiah ye khilehi no punúni cheni keno iniju.

⁵ Panongu no khochile, “Judea lo Bethlehem phu lonoe, kughengu tungkupumi no ishi yèpüani:

⁶ “ ‘Ikemu O Bethlehem, Judah ghakhu lo akeu, no ye Judah lo ayekipemiqo dolo aghulou ye kumoe; kughengu O lau no ayekipemi lakhi ipeghi nani eno pa no iw Israel timiqo saphe nani.’”

⁷ Tipathiu Herod no tuqhou no alokütsümiqo ku eno kiu dolo no ayepu ipeghi keno mütsümishei panongu lau no phupheluve.

⁸ Pa no alokütsümiqo vilo hitoi pi no Bethlehem lo puwu, “Wulo eno tsaqütsalei anu phujulo. Nongu no pa phulu kemtsa I vilo asütsa shilo, tishianguno ni ghí wu no pa mülá nike.”

⁹ Panongu no akükau tsa chiluve kethiu, panongu là lo chesü wuve, eno panongu no ayepu ipeghi keu ithulupüa keu hu no anu punú pe akeu-a tomo ke kutólo panongu zülo ipeghi.

¹⁰ Kughou panongu no ayepu hu ithulu keno, panongu ye shishe alovive.

¹¹ Panongu no aki lo iloghi kelo, angá ye pazá Mary gholo aghí keu ithulu, eno panongu no qhoqhünhe no pa müláe. Tipathiu panongu no panonguw aghò puche keu ikhiphe no ameshoyi, axokütsüngüta eno müsüghüta ishi pesü aghò pa tsüe.

¹² Eno Herod lau idewo pemo nike Ampeu no asamou no panongu pikichive kehu, panongu ye alaghi kütau lono pano ghakhu lo idewove.

Egypt lo Pokajosü wuve

¹³ Alokütsümiqo no wuve kethiu, kungumi lakhi no asamou no Joseph lau ipeghi. Kungumi hu no pi, “Ithuvelo, angá eno pazá sasü Egypt lo pokajo luvelo. I no O vilo pimo ke kutólo tilau ngo aghílo, kughengu Herod ye anu pìthíve nike ghenguno pa phuju niye shi anie.”

¹⁴ Ike pa no idaithuve, eno anu ngò anu pazá pama sasü putho lono Egypt lo wuve,

¹⁵ eno Herod no thimo ke kutólo tilau ngove. Tihu no Ampeu no tungkupumi vechewo ishi pipüa keu shikupuve: “Egypt lono I no I nu kulue.”

¹⁶ Kughou Herod no alokütsümiqo no pa pishiqhivea ipikeu ithive keno, pa ye muqhumüzaive, eno pa no Bethlehem eno sükümxa lo anu ampe kini eno tinguno aqhouqo kümtsü pìthíve penike azah tsüve, tiye pa no alokütsümiqo lau no ayepu ipeghi keu do ithive keu kiqiju püzü shike.

¹⁷ Ike tiye tungkupuu Jeremiah vechewo ishi pipüa keu shikupu ke:

¹⁸ “Mishiphu Ramah lo asütsa lakhi chilu, tiye kunotshütshü shi eno ighamuku qa keu ke, Rachel no li nuliqo ghenguno anhezü-piji qa keu ke, eno alokughuno tsü keu milive, kughengu panongu ye thikhave ke.”

Nazareth lo Ideighi keu

¹⁹ Herod no thive kethiu, Egypt lo asamou no Ampeu’w kungumi lakhi Joseph lau ipeghino

²⁰ ishi pi, “Ithuvelo, anu eno pazá pama sasü Israel yeghi lo wulo, kughengu anu küxü luve tsü niye pükapütsa akeqo kümtsü thikhavae.”

²¹ Ike pa no idaithuve, eno anu ngò anu pazá pama sasü Israel yeghi lo wuve.

²² Ikemu kughou Judea lo Archelaus no papù Herod theli lo akükau shi ani ipi Joseph no chiluve keno, pa ye tile wuni keu msàve. Ampeu no asamou no pa pikichive kehu, pa ye Galilee tokukujo küdau wuve,

²³ eno pa ye wu no mishiphu lakhi Nazareth ipikeu lo xüacheuve. Tihu no Jisü ye Nazarene ipi ku nani kepi tungkupumiqo vechewo piqhipüa keu shikupuve ke.