MATTHEW 19 - Sümi Tiqhelimi Bible

Akibo Küghüxa Vehu

¹ Kughou Jisü no hipaqo kümtsü pitave keno, pa ye Galilee qhive no Jordan nguno hukukuu Judea ko-aqha lo wuve.

² Timi kutomo no pa pape che, eno pa no tilau no panongu shipivi tsüae.

³ Ikelo Phariseemiqo khami Jisü peju niye pa lau ighi. Panongu no pa vilo iniju, “Ayeza kiqi lo timi lakhi ye akiqi kui-kiumu aghí aye pa nipu sasü küghüxaluve nani keshea?”

⁴ Pa no khochile, “Nongu ye phimla aphi keshea? ‘Abothu lono Lhokipheu no panongu kipitimi eno totimi shi lhotsüe,’

⁵ eno ishi pi, ‘Hi ghenguno kipitimi lakhi ye papù eno pazá qhive no pa nipu sasü kümtsa küghünauve cheni, pama ye aphi-ashi lakhi shive cheni.’

⁶ Ikehu pama ye mikini kumovae ikemu ashi lakhi shivae. Tighenguno Alhou no kiu kime küqhavetsüa keno khiu pelomu hexavetsü pe kevilo.”

⁷ Panongu no iniju, “Tishiaye kushiye Moses ye timi lakhi ye akibo küghüxave keu shepe kaku pesü pa nipu tsüve no li puwuve lo ipi azah tsü kea?”

⁸ Jisü no khochile, “Moses no nongu nipùnoqo sasü küghüxave lupeni keu puloza tsü keu ye nongu mlo no mükamüghai keu ghenguno ke. Ike thono abothu lono hitoi shi chekeu kumoe.

⁹ I no nongu vilo pìní. Khuu no kipito xüküpsa vehu ghengu nguno alau pa nipu sasü küghüxave no totimi kütami sasü külakupu shini keno pa ye shupuvae.”

¹⁰ Akhopemiqo no pa vilo pi, “Tsalá akimi eno pa nipu dolo hitoi keu tüqhüdo shi aye, külakupu shimo keu pavie.”

¹¹ Jisü no khochile, “Timi kümtsü no atsa hipau ikhilu keu shimo nani, ikemu vethakulu tsüpüa kemiqo likhi no ikhilu nani.

¹² Kughengu shoko shi ghi punú kemi acheni, eno khami ye timi no shoko kughulhove tsü kemi acheni, eno khami ye kungugha kükaphu ghenguno shoko küxü ghola kisheluve no xü keu acheni. Khunoqo no hipau ikhikulupu keno ikhilu moayesae.”

Jisü eno Itimiqo

¹³ Tile timi khami no Jisü pelo itimiqo shou au be no kümgha tsüpe niye pa lau saighi. Ikemu akhopemiqo no panoqo lomipi.

¹⁴ Ikelo Jisü no pi, “Itimiqo pelo I lau ighi pelo, eno panongu lakha kevilo, kughengu kungugha kükaphu ye hitoi kemiqow ke.”

¹⁵ Kughou pa no panongu shou au bevetsü keno, tithiu pa ye tile no wuve.

Kiními eno Alhou Kükaphu

¹⁶ Timi lakhi Jisü lau ighino pa vilo iniju, “Akükütsüu, lhokta küxü ithulu nike ghenguno ni ye akivipu thime kiu shi moayesa kea?”

¹⁷ Jisü no khochile. “No ye kushiye I vilo akivipu vehu iniju ani kea? Akivi ipikeu ye milakhi likhi ke. Tsalá nono aküxüpu lo ilonishi aye, no ye azakütsüqo pelu moayesae.”

¹⁸ “Khipaqo kea?” ipi pa no iniju. Ikelo Jisü no khochile, “ ‘No ye timi ghiqhi kevilo, no ye shupu kevilo, no ye püka kevilo, no ye akimiki thopi shi kevilo,

¹⁹ O pù eno O zá gihu lo,’ eno ‘O likhi O toi O kisüghümi kimiye lo.’”

²⁰ Apumi hu no ishi pi, “Ni ye hipaqo kümtsü peluvae, ni ye kiu shikupu mphi kea?”

²¹ Jisü no khochile, “Nono kupukülai shinishi aye, wolo eno O mheghi kümtsü jeve no pesü kumlhomiqo tsüvelo, eno no ye kungugha lo akiní ania ke. Tisheno ighi püzü I papelo.”

²² Kughou apumi hu no hi chilu keno, pa ye amloküsa shi wove, kughengu pa ye ighono kiními ke.

²³ Tisheno Jisü no pa khopemiqo vilo pi, “Kuchou no I no nongu vilo pìní, kiními lakhi no kungugha kükaphu lo ilolu nikeu hu ye kushokütsüe.

²⁴ Itaghi I no nongu vilo pìní, kiními lakhi no Alhou kükaphu lo ilolu nikeu ye sayeshi lakhi no ayipuki lono ipu-ipeve keu no akümláue.”

²⁵ Hipau chilu kelo akhopemiqo ye shishe akichiqhive no ishi iniju, “Tishiaye khunoqo no xalu nani kea?”

²⁶ Jisü no panongu ju no ishi pi, “Timi ghenguno hiye kushokütsüpu ke, ikemu Alhou ghengu ye thowkha shikulupu anie.”

²⁷ Peter no Jisü khochile, “Ningu ye O pape nike ghenguno kümtsü qhikhavae! Imaye ningu ghenguno tilehi kiu ithulu nani kea?”

²⁸ Jisü no panongu vilo pi, “Kuchou no I no nongu vilo pìní, thowkha kümtsü akithé shikitheve kelo, eno kughou Timi Nu no pa juküvü küká lakhü lo iqani keno, nongu I pape chekemiqo ghí aküka lakhü chighikini lo iqa no Israelmi lagha chighikini shou xaküthau shi nani.

²⁹ Eno I je ghenguno aki-alu, athiküzümi momu achelimi, apù momu azá, anipu momu anuliqo qhive kemi kümtsü ghuthu aqhe no küghüsü ithulu nani eno lhokta küxü ighílu nani.

³⁰ Ikemu atüghimi kutomo no ashekhami shive nani eno ashekhami kutomo no atüghimi shive nani.”