MATTHEW 16 - Sümi Tiqhelimi Bible

Amichipu Khu keu

¹ Phariseemi ngò Sadduceemiqo no Jisü lau ighino pa peju ghi pa vilo kungugha lono ighi keu amichipu pìyelo ipi khu.

² Pa no khochile, “Kughou avelau shiveni keno, nongu no ishi pi cheni, azümlhü ye aloni cheni, kughengu atsütsǘ ye huchuhuyi ani

³ eno inaqhe ye, ‘Ishí ye pasapagha tsalà shini cheni, kughengu atsütsǘ ye huchuhuyi eno züchiyi ani,’ ishi pi cheni. Nongu ye atsütsǘ lo ipeghi akeu ghili kíshi pìní keno ithi anie, ikemu nongu ye ado ghuloki michipu ghiliqo ye pilu chemoe.

⁴ Küsakügha eno amikucho kumo tiqhelimi no amichipu lakhi phu cheni, ikemu Alhou no tungkupu Jonah lau amichipu tsü keu nguno alau kütau ye tsümo nani.” Tisheno Jisü ye panoqo qhive no wuve.

Phariseemi ngò Sadduceemiqo’w Kholaqhi

⁵ Kughou panongu no ayizükucho vechesü wuve keno, akhopemiqo ye asho pe nikeu kümsümave.

⁶ Ikelo Jisü no panoqo vilo pi, “Kutokupui lo, Phariseemi ngò Sadduceemiqo’w kühakügha lichhe lono nongu likhi nongu jukuto alo.”

⁷ Panongu dolo hipau vehu küptsa kilé apüzü ishi pi, “Hiye ningu no asho lakhimu peighimove keu ghenguno ke.”

⁸ Panongu no küptsa akeu ithive no Jisü no iniju, “Nongu aküpülü kitila likhi akeqo, nongu ye kushiye nongu dolo asho küha keu ghenguno küptsa ani kea?

⁹ Nongu ye itehi kutólo vethalu mphi keshea? Nongu ye timi 5,000 ghenguno ashopa pungu, eno ashoghi kichhi khijehi kichekütsülu keno kümsümavea keshea?

¹⁰ Momu timi 4,000 ghenguno ashopa tsünì, eno ashoghi kichhi khijehi kichekütsülu keno kümsümavea keshea?

¹¹ Kíshi püzü ni ye nongu vilo asho ghili piamoke ipi nongu ye vethamla aphi kea? Ikemu Phariseemi eno Sadduceemiqo’w kholaqhi lau no O likhi O jukuto alo.”

¹² Tithiu no, pa ye panongu vilo asho lo kholaqhi peitha chekeu ghili kumo no, Phariseemi ngò Sadduceemiqo kükütsü lachile akeu ghili piani kena ipi vethalu.

Peter no Jisü ye Messiah Kepi Shuphetsü

¹³ Kughou Jisü no Caesarea Philippi ko-aqha lo ighi keno, pa no pa khopemiqo vilo iniju, “Timiqo ye ni Timi Nu pesü khuu ipi cheni kea?”

¹⁴ Panongu no khochile, “Khami no pikeu ye no ye John Baptiz kishiu, kütami no pikeu no Elijah ipi cheni; eno itaghi khami no pikeu no Jeremiah momu tungkupumiqo dolo lakhi ke ipi chenie.”

¹⁵ “Imaye nongu ye kíshi kea? Nongu ye, ni pesü khuu ipi cheni kea?” ipi pa no iniju.

¹⁶ Simon Peter no khochile, “No ye xü akeu Lhou Nu Messiah ke.”

¹⁷ Jisü no khochile, “Jonah nu Simon, no ye akümghaue, kughengu hiye timi küdau no O lau pephe ke kumoe, ikemu I pù kungugha lo akeu no ke.

¹⁸ Eno I no O vilo pìní, no ye Peter ke, eno atuqu hipau shou I no I kukuhoki mülà puku nani, eno Hades khagho ye hipau theqhi lumo nani.

¹⁹ I no kungugha kükaphu khaqhiyiqo pesü O tsü nani; nono ayeghi lo kiu-kiumu khave aye kungugha lo ghí khave nani, eno nono ayeghi lo kiu-kiumu kuqhove aye kungugha lo ghí kuqhove nani.”

²⁰ Tisheno pa no akhopemiqo vilo pa ye Messiah kepi khuu vilomu pi kevilo pi azah tsüve.

Jisü no Pa Kithí Ghili Pichho

²¹ Tile no huthu no Jisü no akhopemiqo vilo pa ye Jerusalem lo wu moayesa nani eno kichimiqo, achinetomi eno ayeza kükütsümiqo u lono aghime shi nani, eno pa pìthíve nani ikemu atsala aküthüu lo ye xüputhuve nani ipi chixechilei pitsü.

²² Peter no Jisü ku sasü ayixeu wu püzü pa lomipi ghi ishi pi, “Ampeu, tishimoe, khilemu O lau tishi pemo nani.”

²³ Jisü no tsüghǜ ighino Peter vilo pi, “I lau no chevelo, Satan! No ye I ghenguno aküpüxapu shi anie; O kükümsü lo Alhou lau no ighi keu kükümsüqo kumo püzü timi lau no ighi keu kükümsüqo likhi anie.”

²⁴ Tisheno Jisü no pa khopemiqo vilo pi, “I khopemi shinishi kemi ye pa likhi pa milive moayesa eno paw kros xapu no I pape moayesae.

²⁵ Kughengu khuno no pano likhi pano küxü süsho nishi cheni keno pühave nani, ikemu khuno no aküxü ikhiphe pe I ghenguno tsüveni keno xaluve nani.

²⁶ Timi lakhi no ayeghiqha kuchopu paw shive aghí namu, pa ngulho xamlave aye kiu alá ani kea? Momu timi lakhi ye pa ngulho theli lo kiu tsüchile kulupu kea?

²⁷ Kughengu Timi Nu ye papù juküvü lono paw kungumiqo sasü ighi nani, eno tisheno pa no timi lüthü lakhi no kiu mülà püaghini keno tipau kiqi lono qesaxu tsü nani.

²⁸ “Kuchou no I no nongu vilo pìní, I gholo akemi dolo khami ye Timi Nu kükaphu ithulu mphi züu ye akithí michemo nani.”