MATTHEW 15 - Sümi Tiqhelimi Bible

Shikuchubeve Chekeu

¹ Tishi akelo Phariseemi eno ayeza kükütsümiqo khami Jerusalem lono Jisü lau ighino ishi iniju,

² “Kushiye O khopemiqo ye püzüu apù-asüqo no pimhe chekeu hexa cheni kea? Panongu ye chu-sho nike lo panoqo u mütsü chemoe!”

³ Jisü no khochile, “Eno nongu ye kushiye nonguw pimheye ghenguno Alhou zakütsü hexa cheni kea?

⁴ Kughengu Alhou no pi, ‘O pù eno O zá gihu lo’ eno ‘Khukhumu papù momu pazá ghusho aye pìthíve kepue.’

⁵ Ikemu nongu no ishi pi cheni, tsalá timi khukhumu papù momu azá kuphulu kepu shi akemu, hiye ‘Alhou mülá ani,’ ipi shupheve aye,

⁶ panongu pelo tipau pesü apù momu azá gihu pemove chenie. Ikehu nongu no nonguw pimheye ghenguno Alhou tsa pesü avehu küha keu shive tsü anie.

⁷ Nongu kühaküghaqo! Isaiah no tungkuptsa lono nongu ghili pi kelo pa ye achipi shi pie:

⁸ “ ‘Timi hipaqo ye pano kichí lo ye I gihu cheni, ikemu panongu mlo ye I lau no putosü pe anie.

⁹ Panongu ye adou lono I mülá cheni; panongu kükütsü ye timi yezaqo ghola likhi ke.’”

¹⁰ Jisü no aqokitikhi vilo pa lau ighilo pi ku no ishi pi, “Inilo eno vethalulo.

¹¹ Kiu akichi lo ilove cheni keno tino timi shikuchubeve chemoe, ikemu kiu akichi lono ipeghini keno, tipau no panongu shikuchubeve cheni.”

¹² Ikelo akhopemiqo no pa lau ighino iniju, “Phariseemiqo ye nono hipau pikeu chilu kelo panongu shikulosüve ake no ye ithi ani kema?”

¹³ Pa no khochile, “Asütsüni khijehi I pù kungugha lo küau no shosümo keno akuhu lono nhüve nani.

¹⁴ Panoqo püna kevilo; panongu ye anhethi iche kemi sakiphemiqo ke. Tsalá anhethi kighichemi no anhethi kighichemi saphe aye, kinikujo aqò lo ikiqi ilove nani.”

¹⁵ Peter no pi, “Kimghi pìye keu tsa ningu lau hepho-piye lo.”

¹⁶ Jisü no panoqo vilo iniju, “Nongu ye itehi kutólo vethamla aphi keshea?

¹⁷ Akichi lo kiu-kiumu ilo keu hu ye akive lo ilove no aphimpi lono ipeve chenie ke nongu ye mtha keshea?

¹⁸ Ikemu timi kichí lo kiu ipeghi keno tiye amlo lono ipeghi cheni, eno tino pa shikuchubeve cheni.

¹⁹ Kughengu amlo lono alhoküsa kükümsüqo—ghikiqhi, shupu keu, kipito xüküpsa, aküpüka, kichileu shepe eno pipütha keu ipeghi cheni.

²⁰ Hipaqo no timi lakhi shikuchubeve cheni ke; ikemu au mütsümo no chu keu ye pa shikuchube chemoe.”

Canaanmi Topumi Küpülü

²¹ Tipau-a qhive no, Jisü ye Tyre ngò Sidon ko-aqha lo wuve.

²² Tipau sükümxa lo Canaanmi topumi lakhi no pa lau ighino ighamuku pi, “Ampeu, David Nu, I kimiyekütü tsülo! I ngá ye tüghaküsa no tsügha pesü ani eno ighono ime anie.”

²³ Jisü ye atsa kiumu khochilemoe. Ikehu pa khopemiqo no pa lau ighino qhüiniju, “Li puwuve lo, kughengu li ye ighamuku ghi ningu pape chenie.”

²⁴ Jisü no khochile, “Ni ye Israelmi ambe toi pühave kemiqo lau likhi I puwu ke.”

²⁵ Topumi hu no ighi püzü pa zülo qhoqhünhe no ishi pi, “Ampeu I kuphu tsülo.”

²⁶ Pa no khochile, “Anuliqo sho pesü atsǜqo veqhitsü nikeu ye achipi kumoe.”

²⁷ Li no pi, “Iyei, tishi ke Ampeu. Tishimu atsǜqo ghí panongu mpeu ghulhu lipa lono phekiqhi-kighi chu chenie.”

²⁸ Tishi kelo Jisü no li vilo pi, “Totimio, no ye aküpülü kijè akemie! Nono qhüiniju keu toi shive tsüae.” Eno li ngá ye tipau tüqhüdo lono viluve.

Jisü no Timi 4,000 Loji

²⁹ Jisü no tipau-a qhive no Galilee züghi küdau wuve. Tisheno pa ye naghuto küdau iqho no iqave.

³⁰ Timi kutomo no pa lau ighino apukhu kinitave kemi, anhethi kighichemi, aphukhu kighichemi, atsa pimla kemi eno kütami kutomo sasü ighino pa pukhuphi lo qhie; eno pa no panoqo shipivi tsüe.

³¹ Kughou atsa pimlave kemi no atsa piluve, aphukhu kighichemi no viluve, apukhu kinitave kemi no alachelu eno anhethi kighichemi no ithuluve akeu timiqo no ithulu keno panongu ye akümzave. Eno panongu no Israel Lhou sheqhe.

³² Jisü no pa khopemiqo ku püzü ishi pi, “Ni ye timi hipaqo kimiyeqhiyi ani; panongu ye I gholo atsala küthü ngovea eno chu kepu kiumu kühavae. Ni ye panongu pelo müzüthiqhiyi wove penishi amoe, kughengu panongu ye lhove no alà lo ikiqive nosake.”

³³ Pa khopemiqo no khochile, “Ningu ye küghünamokeu-a hipau lo khile no aqokitikhi hijehi lojí nikeu asho lukümkha shi ithuluni kea?”

³⁴ “Nongu gholo ashopa khijehi ani kea?” ipi Jisü no iniju. Panongu no khochile, “Tsünì anie eno akha kititi ghí hami anie.”

³⁵ Pa no timi aqokitikhi vilo ayeghi lo iqavelo ipi.

³⁶ Tisheno pa no ashopa tsünì eno akha ikhilu, eno kughou pa no Alhou shikimthive keno, pa no tipaqo süpho eno akhopemiqo tsü, eno akhopemiqo no timiqo kijé tsü.

³⁷ Panongu kümtsü no aghakiqi shi chulue. Tishive kethiu akhopemiqo no chukhamove keu munomughoqo ashoghi tsünì chhitoi pekütsülue.

³⁸ Eno timi chukemiqo kihiju kelo totimi eno itimiqo sümo no, timi qhethonhe bidí kihilue.

³⁹ Timi aqokitikhi puwove kethiu, Jisü ye ashuka lo iku no Magadan qhalo wuve.