MATTHEW 14 - Sümi Tiqhelimi Bible

John Baptiz Kishiu Kütsü Lovetsü Keu

¹ Tipau ghuloki lo Herod ayekipeu no Jisü ghiliqo chilu,

² eno pa no pa ghinikishiu vilo pi, “Hiye John Baptiz kishiu ke; pa ye akithí lono xüithuvae! Tighenguno akümzapu kükaqo no pa lolo mülà anie.”

³ Herod no pa thiküzüu Philip nipu Herodias ghenguno John küghaluve pe eno akighí no tshüsawo akughuki lo sǘve,

⁴ kughengu John no pa vilo ishi pi ache: “O ghenguno li luni keu ye achipi kumoe.”

⁵ Ikehu Herod ye John pìthíve nishiqhiyi ache, ikemu pa ye timiqo msà ache kughengu panongu no John ye tungkupu kepi ikhilu acheke.

⁶ Herod punu tsalà lo Herodias nonga no kukusümiqo ghenguno ilhe pìye tsü kelo Herod ye ighono amlokiqi shive

⁷ kehu pa no ashoqhi shi no li no kiu-kiu khumu tsü nikeu shi piqhi.

⁸ Li pazá no kite pesü, li no ishi pi, “John Baptiz kishiu kütsü akhu hipau lo sǘ no I tsülo,” ipi khu.

⁹ Akükau ye ighono amloküsa shive, ikemu pa shoqhi eno avelau ghulhu lo kusüpüa kemiqo ghenguno, li no kiu qhüiniju ani keno shive tsü penike azah tsüve

¹⁰ eno tipau kiqi lono akughuki lono John kütsü lovetsü.

¹¹ Akhu lakhi lo John kütsü süpe ighino ilimi hu tsüve, eno li no ti pesü li pazá lau wuve.

¹² John khopemiqo no ighino John sükumo pesü shiqhove tsü. Tisheno panongu no wu no Jisü vilo pive.

Jisü no Timi 5,000 Loji

¹³ John Baptiz kishiu lau kiu shivea keno Jisü no chiluve kelo, pa ye ashuka lono lüthü shi yenguikeu-a lo wuve. Hipau chilu kelo, mishiphuqo lo aqokitikhiqo no apukhu lono pa papesü wu.

¹⁴ Kughou azü mükü toluve püzü Jisü no timi kutomo ithulu keno, pa ye panongu ju pesü kimiyeqhiyive eno panonguw küsükiniqo shipivi tsüe.

¹⁵ Avela shiuve kelo, akhopemiqo no Jisü lau ighino pa vilo pi, “Hipau-a ye timi no küghünamokeu-a lakhi ke eno atsala ghí tsüzüvae. Tighenguno timi aqokitikhi hipaqo puwovelo, tishianguno panongu pelo aphuqo lo wu no pano likhi panongu ghenguno achuqupu hami qhülu pe kepu shipelo.”

¹⁶ Jisü no khochile, “Panongu puwove kepu kumoe. Nongu no kiuala chu kepu pesü panongu tsülo.”

¹⁷ Panongu no khochile, “Hila ningu ye ashopa pungu eno akha kini likhi anie.”

¹⁸ Pa no pi, “Tipaqo I lau pesü ighilo.”

¹⁹ Eno pa no timiqo pelo atsüni shou iqave penike kichetsü. Ashopa pungu eno akha kini ikhiluve no atsütsǘ lo jupuku püzü shikimthi tsü no asho süphoe. Tisheno pa no akhopemiqo tsü eno akhopemiqo no tipaqo pesü timiqo kijé tsü.

²⁰ Panongu kümtsü no aghakiqi shi chuluve, eno akhopemiqo no chukha kumo munomughoqo ashoghi chighikini kichelu.

²¹ Totimi eno itimiqo sümo no tilehi chu kemi kihiju kelo timi qhethonhe pungu qhau ae.

Jisü no Azü Shou Alache

²² Tishive kemtsa Jisü no pa khopemiqo pelo ashuka lo ikuvepe püzü pa züu no ayizükucho tüxau küdau wuve pe, eno tisheno pa no aqokitikhi puwove.

²³ Panoqo puwove kethiu, pa ye lüthü shi naghuto küdau akighini shi niye iqhove. Tipau jì ye, pa likhi tilehi ngoa,

²⁴ eno ashuka ye ayeghi lono kitila kushuwa lo wuve, kughengu azü tukuchoqhia eno amlhü no azü fuchile ake.

²⁵ Tsütho nikeu zülo Jisü no ayizükucho lono alà chesü panoqo lau wu.

²⁶ Kughou Jisü no ayizükucho shou no alà cheche keu akhopemiqo no ithulu keno, panongu ye akichiqhive. Eno panongu no, “Hiye aghawu lakhie,” ipi püzü akümsa lau no ighae.

²⁷ Ikemu Jisü no tishikhavi panoqo vilo pi: “Amlo mutotoilo! Ni ke, msà kevilo.”

²⁸ Peter no khochile ishi pi, “Ampeu, tsalá hiye no shi aghí aye, I pelo azü shou no O lau ighi penike pitsülo.”

²⁹ Pa no pi, “Ighilo.” Ikelo Peter no ashuka lono ipeve püzü, azü lono alà chesü Jisü lau wuche.

³⁰ Ikemu kughou pa no amlhü ithulu keno, pa ye msàve, ikelo azü lo ikiqi ilocheghive, ikehu pa no, “Ampeu I xalulo!” ipi ighae.

³¹ Paikhavi Jisü no pa u chhopuwo no pa tsüqüluve. Pa no pi, “O küpülü mikhelo kena. No ye kushiye lipive kea?”

³² Eno kughou pama no ashuka lo ikughive keno amlhü ye iqünheive.

³³ Ikelo akhopemi ashuka lo akeqo no pa sheqhe ghi ishi pi, “Kuchou no no ye Alhou Nue.”

³⁴ Kughou panongu no ayizükucho kathasü ighi keno, panongu ye Gennesaret lo ighilu.

³⁵ Eno kughou tipa qhalo timiqo no Jisü jukimchiluve keno, panongu no sükümxa qha kümtsü lo asütsa shi puwuve. Timiqo no küsükinimiqo kümtsü sasü pa lau ighi

³⁶ eno küsükinimiqo pelo pa no uche keu ubephi ashe lo likhimu bulu penike qhüiniju, eno tipau bulu kemi kümtsü no viluve.