MATTHEW 12 - Sümi Tiqhelimi Bible

Jisü ye Sabbath Mpeu ke

¹ Tipau dolo Sabbath tsalà lakhi lo Jisü ye aghiluqo vechesü wuche. Pa khopemiqo ye müzüthive kehu aghipe lothi muxu pe au lono munu püzü chu thuve.

² Kughou Phariseemiqo no ti ithulu keno, panongu no Jisü vilo pi, “Julo! O khopemiqo ye Sabbath tsalà yeza hexa ghi shimo kepu shi anie.”

³ Pa no khochile, “Nongu ye David eno pa küsàmiqo no müzüthive kelo kiu shi keno khilemu phiju mphi keshea?

⁴ Pa no Alhou ki lo ilo, eno pa ngò pa küsàmiqo no kishekimtheve keu sho chuke. Ayeza kiqi lo panongu ye tishi küzü kumoe, kughengu kishekimtheve keu sho chu achinemiqo ghengu likhi ke.

⁵ Momu nongu ye ayeza lo philumo keshea? Tiye achinemi no sabbath tsalà lo achineki lo mülà keu ye sabbath shipixive ani, tishiaghimu akipimí tsüchemoe.

⁶ I no nongu vilo pìní keu ye achineki nguno akijeu hilehi ani.

⁷ Tsalá nongu no, ‘Ni ye kimiyekini lunishi cheni ke thono aghakishi kumoe,’ ipikeu tsa hipaqo kiqi kiu keno ithi aghí ke aye nongu ye akipimí küha kemi pipüsani chemo ke.

⁸ Kughengu timi Nu ye Sabbath tsalà shou Ampeu ke.”

⁹ Pa no a-a tile no chesü panoqow synagog lo iloe,

¹⁰ ikelo au ithamlave kemi lakhi tilehi ngo ae. Panongu no akipimí Jisü tsü niye ajeku phuju ghi pa vilo ishi iniju, “Sabbath tsalà lo shipivi nikeu ye ayeza lo achipi keshea?”

¹¹ Pa no panoqo vilo pi, “Tsalá nongu khukhumu ambe lakhi akeu Sabbath tsalà lono aqò lo ikiqi ilove aye, nongu ye tipau sünhepheluve eno khape luvemo nani keshea?

¹² Timi küxü lakhi ye ambe nguno alau amekushou ke! Tighenguno sabbath tsalà lo akivi kümlà shini keu ye ayeza lo achipi ke.”

¹³ Tisheno pa no au ithamlave keu vilo pi, “O u xachholo.” Ikelo pa no pa u xachho kelo pa u tüxau toi kupukülai athoputholuve.

¹⁴ Ikemu Phariseemiqo ye khalau ipeve eno kíshi no Jisü pìthíve nike no kuchughu thuve.

Alhou no Kishelu keu Qeu

¹⁵ Hipau vehu ithi akehu, Jisü no tile no wuve. Timi kutomo no pa pape che, eno pa no küsükinimi kümtsü shipivi tsü.

¹⁶ Pa no panoqo pelo pa ghili pesü kütamiqo vilo pipemo nike ghenguno pikichive.

¹⁷ Hipau shikeu ye Isaiah tungkupu vechewo kiu pipüa keno shikupu niye ke:

¹⁸ “Hiye khuu I no kishelu keno I qeu ke, I no kimiye chekeu, pa shou I mlokiqi acheni; I no I ghungu pa shou puku nani, eno pa no achipiu xakütha pesü shiyeqo lau asheshu nani.

¹⁹ Pa ye kiyi-muto momu ighamuku keu shimo nani; khunomu alaghilaqo lo pa sütsa chilumo nani.

²⁰ Pa ye ayeghü-küsǘ sükuho püakeu süchhemo nani, inhemimi keu kulu pinheve tsü keu shimo nani, tiye pa no achipiu xakütha süghi no tokulu shiluve moke kutólo.

²¹ Pa je lo shiyeqo no panonguw lajupu bepe anani.”

Jisü eno Beelzebul

²² Tile panongu no tüghaküsa no tsüghape akeu timi khuu anhethi iche eno atsa pimla keno pa lau saighi, eno Jisü no pa shipivive, tishikehu pa ye atsa piluve eno ithuluve.

²³ Timi kümtsü no akümzave eno pi, “Hiye David nu shi aghí nani keshea?”

²⁴ Ikemu kughou Phariseemiqo no hipau chilu keno, panongu no pi, “Timi hipau ye Beelzebul kükapuu tüghaküsaqo küká vechewo tüghaküsaqo haphe anie.”

²⁵ Jisü no panoqo kükümsü ithive no panongu vilo pi, “Akükaphu lakhi lono kijetha keu ipeghive aye akükaphu kümtsü kütsave cheni, eno mishighüna momu akibo lo kijetha keu ipeghive aye ipove nani.

²⁶ Tsalá Satan no Satan haphe aye, pa ye pa likhi pa kijethave anie. Tishiaye pa kükaphu ye kíshi püzü puthugholu nani kea?

²⁷ Eno tsalá I no Beelzebul vechewo tüghaküsaqo haphelu cheghi aye, now timiqo ye khuu vechewo tüghaküsaqo haphelu cheni kea? Tishiaye, nongu papemiqo no nongu kimchiluve nani.

²⁸ Ikemu I no Alhou Ghungu küká vechewo tüghaküsaqo haphe aye, tiye Alhou kükaphu nongu shou ikughi anike.

²⁹ “Momu kümsüju kelo, timi lakhi ye kíshi püzü atüghishi akumtomi lakhi tsüghape qhive paghimo no pa ki lo ilo no pa no pighi akeu nhemghaqo pewuve kulupu kea? Pa tsüghape qhive paghi anguno pa ki lono lepusü wuluve nani ke.

³⁰ “Khunoqo no I gholo chemo keno I mujochile ani, eno khunoqo no I gholo hekütsümoni keno panapaghaive nani.

³¹ Ikehu I no nongu vilo pìní, axiné eno pipütha keu jeli kümtsü akipimí qhivetsü nani, ikemu Aghungu Kimthe pipütha keu kipimí ye qhitsümo nani.

³² Khukhumu Timi Nu lachile keu tsa pikeu ye akipimí qhivetsü nani, ikemu khuu no Aghungu Kimthe pipüthani keno pa ye itehi na ighi nikeu ghuloki lo namu akipimí qhitsümo nani.

³³ “Asübo kivi pighiphe lo eno tipau xathi ye alo nani, momu asübo lhoküsa pighiphe lo eno tipau xathi ye alomo nani, kughengu asübo ye tipau xathi lono kimchilu cheni.

³⁴ Nongu pighizü tiqo, kíshi püzü nongu küsaküghami no kiu akivi tsa pìní kea? Kughengu amlo lo kiu pekütsüpüani keno akichi lono piphe cheni.

³⁵ Timi kivimi no pa mlo lo akivi pekütsüpüa keu lono akivi pephe cheni, eno küsaküghami no pa mlo lo küsakügha pekütsüpüa keu lono küsakügha pephe cheni.

³⁶ Ikemu I no nongu vilo pìní keu ye kümtsü no küghakütha tsalà lo pütüta no kutokupuimo no piqhive keu tsa kihikülai tsü moayesa nani.

³⁷ Kughengu O tsa vechewo no ye achipiu ipive kepu shi nani, eno O tsa vechewo no ye kiléqhive kepu shive nani.”

Jonah Michipu

³⁸ Ikelo Phariseemiqo eno ayeza kütsüchekemi khami no pa vilo pi, “Akükütsüu, ningu ye O lau no amichipu ithulu nishi anie.”

³⁹ Jisü no khochile, “Küsakügha eno amikucho kumo tiqhelimi no amichipu lakhi khu cheni! Ikemu Alhou no tungkupu Jonah lau amichipu tsü keu nguno alau kütau ye tsümo nani.

⁴⁰ Kughengu Jonah no pucho tsalà küthü eno putho tsalà küthü akha kuloghi kive lo ngove ketoi, Timi Nu ghí pucho tsalà küthü eno putho tsalà küthü ayeghi pola lo ngo nani.

⁴¹ Küghakütha tsalà lo Nineveh lo timiqo no puthugho no tiqheli hipau kiléqhive nani; kughengu panongu ye Jonah no kütsü keu lono amlo pebideve ke, eno itehi ye kiu kela Jonah nguno akijeu hilehi anie.

⁴² Küghakütha tsalà lo apéu Kükaliu no hipau tiqheli gholo no ithughi no tiqheli hipau kiléqhive nani; kughengu li no ayeghi shekha küdau no Solomon lokütsü ini nike ighie, ikelo itehi ye kiu kela Solomon nguno akijeu hilehi anie.

⁴³ “Kughou mithekumo ghungu no timi lau no ipeghiveni keno, qhai keu-a lo akulhokiqhi phuju eno phumlave kelo,

⁴⁴ ishi pi cheni, ‘Ni ye I no qhive keu ki lo idewoni.’ Kughou pa no ighi keno, aki khukimtheve no kithikiyi shi khumu aghimo aye,

⁴⁵ pa no wu no pa nguno alau küsakügha ghungu kütami tsünì sasü pa gholo ighino panongu tile ilo ngove cheni. Tithiu timi tipau ye atüghi lo nguno alomo kitheve cheni. Küsakügha tiqheli hipau lau hikithipu shi nani.”

Jisü Pazá eno Athiküzümiqo

⁴⁶ Jisü no aqokitikhi pütsa aphi lono, pazá eno athiküzümiqo ye pa pütsa nishiqhiyi khalacheu puthugho ae.

⁴⁷ Timi khami no pa vilo pi, “O zá ngò O thiküzümiqo ye O pütsa nishiqhiyi khalau puthugho anie.”

⁴⁸ Pa no pa khochile, “Khuu no I zá eno I thiküzümiqo kea?”

⁴⁹ Pa khopemiqo lau kiche no pa no pi, “Hipaqo no I zá eno I thiküzümiqo ke.

⁵⁰ Kughengu khunoqo no I pù kungugha lo akeu pulou shi cheni keno tipaqo no I thiküzüu, I chepu eno I zá ke.”