MATTHEW 11 - Sümi Tiqhelimi Bible

Jisü ngò John Baptiz Kishiu

¹ Jisü no pa khopemi chighikini vilo akivishi piputove kethiu, pa ye tile no Galilee lo mishiphuqo lo kütsü eno shika niye wuve.

² Kughou John no akughuki lo akeno Messiah kümlà ghili chilu, ikehu pa no pa khopemiqo puwu

³ no ishi iniju pe, “No ye ighi niye akeu hu keo, ningu ye kütami huqhe aghílo pi kea?”

⁴ Jisü no khochile, “John lau idechile wo püzü nongu no kiu chilu eno ithulu keno pesü pa vilo pilo:

⁵ Anhethi kighichemi no ithulu ani, apukhu kinitave kemi no alachelu ani, apügha kupumiqo shikimtheve ani, akìní kughupomi no chilu ani, kithimi xüputhuve ani, eno tsakiviu pesü athokhami lau asheshu anie.

⁶ Khukhumu I ju pesü lipimo kemi kümghae.”

⁷ John khopemiqo no wuve che kelo, Jisü no aqokitikhi vilo John ghili pithu: “Nongu ye küghünamokeu-a lo kiu ju niye wu kea? Amlhü no ayeghübo fukini akeu ju niye wu keshea?

⁸ Tishimo aye nongu ye kiu ju niye wu kea? Tiphimini kivi pepu akeu timi hu ju niye wu keshea? Moe khunoqo no tiphimini kivi pepu cheni keno panongu ye kükakiqo lo acheni.

⁹ Tishiaye nongu ye kiu ju niye wu kea? Tungkupuu keshea? Iyei, I no nongu vilo piani, pa ye tungkupumi nguno akijeu ke.

¹⁰ Kuchoyesü lo pa ghili ishi yèpüani: “ ‘I no O züu no I ghinikishiu puwu nani, pa no O züu no wu no O laghi ghepe qhitsü nani,’

¹¹ Kuchou no I no nongu vilo pìní, totimi no punú kemiqo dolo khunomu John Baptiz kishiu nguno akijeu kühae; ikeghi kungugha kükaphu lo khuu no aghulou keno pa ye John nguno akijeu ke.

¹² John Baptiz kishiu ghuloki lono ishi kutólo, kungugha kükaphu pesü muqhumüzai kepi atiche tsü acheni, eno muqhumüzai kemi no anguka sǘ acheni.

¹³ Kughengu tungkupumiqo no pipüa keu eno ayeza kümtsü John kutólo ke.

¹⁴ Eno nongu no pulolu kepu shi aye, pa ye Elijah ighi nani ipi akeu ke.

¹⁵ Khunoqo no chilu nishi ani keno panoqo pelo chilu pelo.

¹⁶ “Ni ye kiu pesü hipau tiqheli kimghi tsüní kea? Panongu ye alhikishi-a lo itimiqo no iqa no kütami vilo igha ku ghi ishi piakeu toi ke:

¹⁷ “ ‘Ningu no nongu ghenguno fulili küyighatsü, ikemu nongu no ilhemoe, Ningu no akumo qho keu le phetsüe, ikemu nongu no mloqamoe.’

¹⁸ Kughengu John Baptiz kishiu ighi kelo pa ye asho chumoe momu atsaizü shomoe, ikemu nongu no, ‘pa ye tüghaküsa ani,’ ipi.

¹⁹ Timi Nu no ighino chu eno sho kelo ye panongu no, ‘Timi hipau ye minhemüzai eno shokümzümi, zame küqhami ngò axinemiqo küsàmi,’ ipi ke. Ikemu alokütsü ye akümlà lono kimichive tsü cheni.”

Amlo Xaidemo kemi Mishiphuqo Ghenguno Ahaküsapu

²⁰ Ikelo Jisü no mishiphu khipaqo lo pa no akümzapu kümlà akichiù shi keno tipaqo pipüsa thuve, kughengu panongu no amlo pebidemo ke.

²¹ “Chorazin! O ghenguno ahaküsapue, Bethsaida! O ghenguno ahaküsapue, kughengu tsalá akümzapu kümlà nongu gholo shikeu Tyre eno Sidon lo mülà ke aye, panongu ye yeqhiyephi pepu püzü ayevǜ kuchhu no khaghi no amlo pebideve aghíni cheke.

²² Ikemu I no nongu vilo pìní, küghakütha tsalà lo Tyre ngò Sidon nguno alau mishiphu tipau no aghime shi nani.

²³ Eno O Capernaum! No ye O pesü atsütsǘ kutólo süqhe iku niye keshea? Moe, no ye Hades lo iqive nanie. Kughengu tsalá akümzapu kümlà O lau shikeqo, Sodom lo mülà ke aye, Sodom ye ishi kutólo aghíni cheke.

²⁴ Ikemu I no nongu vilo pìní, küghakütha tsalà ghuloki lo Sodom nguno alau mishiphu tipau ghimeqhi nani.”

Anu lono Apù Pephe-piye

²⁵ Tipau tüqhüdo lo Jisü no pi, “Atsütsǘ eno ayeghi Mpeu, Apùo, I no O sheqhe ani, kughengu nono alokütsümi eno ithisheve kemiqo lau no thime hipaqo küsüpe qhive, eno anuli itimiqo lau tipaqo pephe-piye ke.

²⁶ Iyei, Apùo, hitoi shikeu ye O pulou kiqi lono shikeu ke.

²⁷ “I pù no thowkha kümtsü pesü I pichevetsüae. Apù nguno alau ye khumu Anu mthae, eno Anu nguno alau ye khunomu Apù mthae eno khunoqo lau Anu no Apù pephe-piye nike no tipaqo likhi no ithi cheni.

²⁸ “Nongu amakho kimishí xapu lhove kemiqo kümtsü I lau ighilo, I no nongu kulhoqhi tsü nike.

²⁹ Iw kuokhasü ikhilu no pepulo eno I lau no shikalulo, kughengu ni ye amlo kümtshami eno aqhokighemi ke, eno nongu ngulho ghenguno akulhokiqhi phulu nani.

³⁰ Kughengu iw kuokhasü ye mülalei eno I makho ye müthüthei ke.”