MATTHEW 1 - Sümi Tiqhelimi Bible

Jisü Messiah Laghaphi

¹ Hiye Jisü Messiah David nu, Abraham nu’w laghaphi ke:

² Isaac ye Abraham nu, Jacob ye Isaac nu, Judah eno pa thiküzümiqo ye Jacob nu,

³ Perez ngò Zerah pama ye Judah nu, eno pama pazá ye Tamar, Hezron ye Perez nu, Ram ye Hezron nu,

⁴ Amminadab ye Ram nu, Nahshon ye Amminadab nu, Salmon ye Nahshon nu,

⁵ Boaz ye Salmon nu eno pazá ye Rahab, Obed ye Boaz nu eno pazá ye Ruth, Jesse ye Obed nu,

⁶ eno Akükau David ye Jesse nu. Solomon ye David nu, eno pazá ye Uriah nipu (Bethsheba) ke,

⁷ Rehoboam ye Solomon nu, Abijah ye Rehoboam nu, Asa ye Abijah nu,

⁸ Jehoshaphat ye Asa nu, Jehoram ye Jehoshaphat nu, Uzziah ye Jehoram nu,

⁹ Jotham ye Uzziah nu, Ahaz ye Jotham nu, Hezekiah ye Ahaz nu,

¹⁰ Manasseh ye Hezekiah nu, Amon ye Manasseh nu, Josiah ye Amon nu,

¹¹ eno Josiah ye Jeconiah ngò pa thiküzümi khunoqo Babylon lo Israelmi kughusawu no ake ghuloki lo punu keno tipaqo papù ke.

¹² Babylon lo kughusawuve kethiu: Shealtiel ye Jeconiah nu, Zerubbabel ye Shealtiel nu,

¹³ Abihud ye Zerubbabel nu, Eliakim ye Abihud nu, Azor ye Eliakim nu,

¹⁴ Zadok ye Azor nu, Akim ye Zadok nu, Elihud ye Akim nu,

¹⁵ Eleazar ye Elihud nu, Matthan ye Eleazar nu, Jacob ye Matthan nu,

¹⁶ eno Joseph ye Jacob nu Mary kimi, eno Mary ye Jisü khuu Messiah ipi ku cheni keno pazá ke.

¹⁷ Ike Abraham lono David kutólo tiqheli chighibidi ani, eno David lono Babylon lo kughusawuve ke kutólo chighibidi ani, eno kughusawuve keu lono Messiah kutólo chighibidi ani.

Joseph no Jisü pe Pa Nu Shiluve

¹⁸ Jisü Messiah ye hitoi punúlu: Pazá Mary ye Joseph sasü külakupu shini ke tushoqhive, ikemu pama külakupu shimphi züu no Mary ye Aghungu Kimthe vechewo mishiwuve aghí.

¹⁹ Ikemu li kimi Joseph ye amikucho shi ayeza pape chekemi kehu, pa ye aqha zülo no li shikukujomo nike ghenguno tuqhou no li sasü tishetiye shimove nikeu kümsüve.

²⁰ Ikemu pa no hipau kümsüluve kethiu, Ampeu’w kungumi lakhi no asamou no pa lau ipeghino pi, “David nu Joseph, Mary pesü O nipu shini keu lo msà kevilo, kughengu li no mishí chekeu ye Aghungu Kimthe lono ke.

²¹ Li no anu lakhi punú nani, eno no ye pa je Jisü kutsü nani, kughengu pa no paw timiqo panongu xinéqo lono xalu nani.”

²² Hi kümtsü shilu keu ye Ampeu no tungkupumi vechewo kiu pipüa keno shikupu niye ke:

²³ “Ilimi hu no mishiluve nani eno anu lakhi punú nani, eno panongu no pa vilo Immanuel ipi ku nani” (tipau kiqi ye “Alhou ningu gholo ani”).

²⁴ Kughou Joseph no idaithughi keno, pa no Ampeu’w kungumi no azah pa tsü keu kiqi lono Mary pesü pa nipu shiluve.

²⁵ Ikemu li no anu punú moke kutólo pa ye li sasü ashi-aji küqhamoe. Eno Joseph no anu je pesü Jisü kuvetsüe.