Mark 9 - Sümi Tiqhelimi Bible

¹ Eno Jisü no panongu vilo pi, “Kuchou no I no nongu vilo pìní, hilehi I gholo puthugho akemi dolo khami ye Alhou kükaphu aküka kumto lono ighi keu ithulu mphi züu ye akithí michemo nani.”

Ajuhi Kilive keu

² Atsala tsügho thiu Jisü no pa gholo Peter, James eno John ishi sasü naghuto qhemghai keu lakhi lo iku. Tilehi panonguqo likhi ae. Panongu zülo no Jisü ye aju kilive.

³ Paw tiphiminiqo ye jukighilepu shi miyetsüghoive, tiye ayeghi lo khunomu tinguno miyetsüghoi ishiphe müla ke.

⁴ Eno panongu zülo Elijah ngò Moses pama ipeghive püzü Jisü sasü küptsa ae.

⁵ Peter no Jisü vilo pi, “Rabbi, ningu ye hile ngo akeu pavi anie; ningu no apushonha küthü mülà puku kepu shinie; lakhi no O ghenguno, lakhi no Moses eno lakhi no Elijah ghenguno.”

⁶ (Peter ye kiu pimo kelau no hi pike, kughengu panongu ye ighono msà-khokhoshive ke.)

⁷ Tishi kemtsa khüngküsü ipeghino panongu küzüpholuve, eno khüngküsü lono asütsa lakhi ighi: “Hiye I nu I no kimiye chekeu ke. Pa gholulo.”

⁸ Paikhavi lono pano küthü no homüxa ju kelo ye panongu ye khiumu akeu ithumlave eno Jisü likhi panongu gholo aghive.

⁹ Panongu naghuto lono iqi che kelo Jisü no panongu vilo Timi Nu no akithí lono xülethuve mphi kutólo ye, panongu no kiu ithuluvea keno khiu vilomu pi kevilo ipi azah tsüve.

¹⁰ Ikehu panongu no hipau vehu panongu dolo likhi qhive, tisheno “akithí lono xülethuve keu,” kiqi ye kiu keno küptsaju ae.

¹¹ Ike panongu no Jisü vilo ishi iniju, “Kushiye ayeza kükütsümiqo ye Elijah paghi ighi moayesa kepi pi cheni kea?”

¹² Jisü no khochile, “Kuchou no Elijah paghi ighi püzü thowkha kümtsü kutò pe qhive ke. Tishimu kushiye Timi Nu ye shishe ghimeqhi eno jukünathave moayesa keu shi yèpüani kea?

¹³ Ikemu I no nongu vilo piani, Elijah ye ighivae, eno pa ghili yèpüa keu toi, panongu no pa shou shinishi chekeu kümtsü shiluvae.”

Jisü no Anu Lakhi Phi lo Mithekumo Ghungu Tsüghape akeu Shipivi

¹⁴ Kughou Jisü eno akhopemi pano küthü no akhopemi kütamiqo lau ighi keno, timi kutomo no panongu sühope ngo no ayeza kükütsümiqo no panongu sasü kütsala aghí keu panongu no ithulu.

¹⁵ Timi kümtsü no Jisü ithulu kemtsa panongu lokivi gholo no thüghüive eno pa sasü kusho niye posü ighie.

¹⁶ Jisü no panongu vilo iniju, “Nongu ye kiu vehu ghenguno panongu sasü kütsala ani kea?”

¹⁷ Aqokitikhi dolo timi lakhi no khochile, “Akükütsüu, ni ye ni pú sasü O lau ighi anie. Pa ye mithekumo ghungu no pa tsügha pesü acheni eno tino pa ye atsa pimlavae.

¹⁸ Kugho-kughomu tipau no pa tsüqüluve aye, tino ayeghi lo pa kuluqhive acheni. Eno akichi lono amtsazü mlaghoghoive no pa hu tsüghü-bubushi no pa phimpi ye chochikaghaive chenie. I no O khopemiqo vilo mithekumo ghungu hapheve tsülo ipi iniju, ikemu panongu ye haphe mülave ke.”

¹⁹ Jisü no khochile, “Nongu pülükümla tiqhelimiqo, ni ye khitohi nongu sasü anani kea? Eno ni ye khitohi nongu gholo ache nani kea? Apú I lau sasü ighilo.”

²⁰ Ikehu panongu no pa lau apú saighi. Kughou mithekumo ghungu no Jisü ithulu keno, paikhavi pa no anu tipau phimpi süküghütha no vepuwuve. Apú hu no ayeghi lo ikiqive eno homüxa ilu auve, tisheno akichi lono amtsazü mlaghoghoi ipeghive.

²¹ Jisü no anu papù vilo iniju, “Apú ye ado khitohi ishi ighivea kea?” “Itimi shi aphi lonomu ke,” ipi pa no khochile.

²² “Mithekumo ghungu tipau no pa pìthíve niye ghuthu kutomo ami lo ngò azü lo pa tukulusüve achenie. Ike nono kiu-kiumu shikulupu shi aye, ningu kimiye no kuphu tsülo.”

²³ Jisü no pi, “ ‘I no shikulupu shi aghí aye ya?’ Khuu no pülübeni keno pa ghenguno thowkha shilu nanie.”

²⁴ Tishi kemtsa, apú papù no igha ipeghino pi, “I no pülüluvae; I küpülü küküha shou theqhilu nike I kuphu tsülo!”

²⁵ Kughou aqokitikhi no tipau ju niye poche keu Jisü no ithulu keno, pa no mithekumo ghungu vilo alòmi pi, “No akìní ipó eno atsa piphe müla keu ghungu, I no azah O tsü anike, pa lau no ipeghivelo, eno khilemu pa phi lo ide ilo kevelo!”

²⁶ Mithekumo ghungu hu no muqhumüza igha püzü pa phimpi paküta keu shi süküghütha no ipeghive. Apú phimpi ye asükumo toi ithulu auve kehu timi kutomo no pi, “Pa ye thivea keshea?”

²⁷ Ikemu Jisü no pa u pesü anu sünhepukuve, ikelo pa ye puthugholuve.

²⁸ Jisü no aki alou ilove kethiu, pa khopemiqo no lomo shi pa vilo ishi iniju, “Ningu ye kushiye mithekumo ghungu haphe mülave kea?”

²⁹ Pa no khochile, “Hitoi keu haphelu nikeu ye akighini vechewo likhi no shilu nanie.”

Jisü no Akiniù Pa kithí Ghili Pichho

³⁰ Panongu no tipau-a qhive no Galilee vechesü wuve. Jisü ye timi khuu pelomu panongu ye khilehi ani keno ithi penishimo no ae,

³¹ kughengu pa ye pa khopemiqo kütsü ake. Panongu vilo pa no ishi pi, “Timi Nu ye ikhipe pesü timiqo u lo sǘve tsüní cheni. Panongu no pa pìthíve nani, eno atsala aküthüni lo pa ye xülethuve nani.”

³² Ikemu pa no kiu piani keno panongu ye vethamlave eno pa vilo iniju nikeu ighüve.

³³ Panongu no Capernaum lo ighi. Pa no aki lo ngo akelo panongu vilo ishi iniju, “Nongu ye alà lo che kelo kiu vehu kütsala che kea?”

³⁴ Ikemu panongu ye inaqhoi ngove, kughengu panongu ye panongu dolo khuu no akijeu keno tipau kütsala cheke.

³⁵ Jisü no iqa ghi pano Chighikini ku püzü ishi pi, “Khukhumu atüghiu shinishi aye, pa ye kümtsü shekhau shi moayesa, eno kümtsü qeu shi moayesae.”

³⁶ Pa no itimi lakhi pa lau saighi pe eno panongu mtá dolo qhie. Pa no itimi hu khapeluve no panongu vilo pi,

³⁷ “Timi khuu no I je lono itimi hitoi keu sasüni keno ni sasü anie, eno khuu no ni sasüni keno pa ye I sasǘ anike kumoe ikemu I puwu akeu sasǘ anike.”

Khukhumu Ningu Lachilemo Kemi ye Nilaumi ke

³⁸ John no ishi pi, “Akükütsüu, timi khami no O je lono tüghaküsaqo haphe aghí keu ningu no ithulu ke ikemu pa ye niqomi kumo ke ghenguno pa lakhave ke.”

³⁹ Ikemu Jisü no pi, “Pa lakha kevilo, kughengu I je lono akümzapu kümlà shikemi ye akümzapu kümlà shive kethiu I pipüsamo nanie.

⁴⁰ Kughengu khukhumu ningu lachilemo kemi ye nilaumi ke.

⁴¹ Kuchou no I no nongu vilo piani, nongu no Messiah papemi shi aghí keu vechewo timi khuu no azü ajikhu lakhi likhimu nongu piyéni keno panongu ye khilemu panow qesaxu pühamo nani.

Axiné lo Veqhive Pe Keu

⁴² “Timi khukhumu I pülü chekemi itimi kitilaqo pelo veqhive pe aye, timi tipaqo ghengu ye athì kütsüghǜ tuqu kijè keu pesü pano kuwo homüxa tshüve no azüghi lo vesüve keu no akiviu shive nanie.

⁴³ Tsalá O u no O müsü sasü axiné shive pe aye, ti ghithave lo. O u kinikujo xapusü khilemu inhemo keu miyizü lo ilove nike züqhulo O phi lo kupumovemu aküxüpu lo ilolu keu pavie.

⁴⁴ Tilehi, “ ‘apithe panongu tsaqhi achekeu ye khilemu thive chemo eno ami ye khilemu inheve chemoe.’

⁴⁵ Tsalá O pukhu no O müsü sasü axiné shive pe aye, tipau ghithave lo. Apukhu kini xapusü amiyizü lo vesüve kepu ye apukhu kighichemi shive no aküxüpu lo ilo keu pavie.

⁴⁶ Tilehi, “ ‘apithe panongu tsaqhi achekeu ye khilemu thive chemo eno ami ye khilemu ghapinhelu chemoe.’

⁴⁷ Eno tsalá O nhethi no O müsü sasü axiné shive pe aye, ti lejove no pevelo. Anhethi kini xapusü amiyizü lo vesüve nike züqhulo anhethi lakhi likhi xapusü Alhou kükaphu lo ilo keu pavie.

⁴⁸ Amiyizü tilehi, “ ‘apithe panongu tsaqhi achekeu ye khilemu thive chemo eno ami ye khilemu inheve chemoe.’

⁴⁹ Kughengu amitì no vepüqhü ketoi ami pesü timi kümtsü pitiqhi nani.

⁵⁰ “Amitì ye aloe, ikemu amitì no aküqhü kühave aye tiye kíshi no itaghi qhü kitheluve nani kea? Nongu dolo amitì küqhü toi alo, eno lakhi no lakhi sasü alokughuno shikile alo.”