Mark 7 - Sümi Tiqhelimi Bible

Shipixive Chekeqo

¹ Jerusalem lono ighi kemi Phariseemi ngò ayeza kükütsümiqo khami no Jisü sühope kumqoluve,

² ikelo Jisü khopemiqo khami no au mithemo no akeu mütsüvemo püzü achuqupu chu aghí keu panongu no ithulue.

³ (Phariseemi eno Jewmiqo kümtsü panow kichimiqo kukhuaye pape ghi panongu u pesü chine-chini kiqi lono shikimtheve paghi mphi züu ye chu-sho chemoe.

⁴ Panongu ye kughou lhidikishi-a lono ideghini keno, au mütsü mphi züu ye chu-sho chemoe. Eno panongu ye akukhuaye kütau kutomo pepimhe che, kümsüju kelo ajikhu, alikoli eno sünizüliqo küsü-mithe keu toi keu.)

⁵ Ike Phariseemi eno ayeza kükütsümiqo no Jisü vilo ishi iniju, “O khopemiqo ye kushiye kichimiqo kukhuaye kiqi lono xü nike züqhulo panongu u shikuchubeve keu pesü achuqupu chu cheni kea?”

⁶ Jisü no khochile, “Isaiah no tungkuptsa lono nongu kühaküghaqo ghili pi kelo pa ye achipi shi pie; Tiye ishi yèpüani: “ ‘Timi hipaqo ye pano kichí lo ye I gihu cheni, ikemu panongu mlo ye I lau no putosü pe anie.

⁷ Panongu ye adou lono I mülá cheni; panongu kükütsü ye timi yezaqo ghola likhi ke.’

⁸ Nongu ye Alhou zakütsüqo pheve no timi kukhuayeqou pape achenie.”

⁹ Eno Jisü no kibe ghi pi, “Nongu ye nolikhi no kukhuayeqo pape anike ghenguno Alhou zakütsüqo ye akivishi ghakütsü pesü akou qhive anie!

¹⁰ Kughengu Moses no ishi pi, ‘O pù eno O zá gihu lo,’ eno, ‘Khukhumu papù momu pazá ghusho aye pìthíve kepue.’

¹¹ Ikemu nongu no ishi pi cheni, tsalá timi khukhumu papù momu azá kuphulu kepu shi akemu, hiye Corban shivea (tipau kiqi ye, Alhou ghenguno qhive keu) ipi shupheve aye,

¹² nongu ye panongu pelo panongu papù momu azá ghenguno kiumu shipemove chenie.

¹³ Ikehu nongu no pekishesü ighi keu pimheye no Alhou tsa pesü avehu küha keu shive tsü anie. Eno nongu ye titoi keu thime kutomo shi achenie.”

¹⁴ Itaghi Jisü no aqokitikhi vilo pa lau ighilo pi ku no ishi pi, “Kümtsü no I tsa inilo eno hi vethalulo.

¹⁵ Ashou thime kiunomu timi lakhi lolo ilo no shikuchube mülae. Ikemu timi lakhi lolo no ipeghi keu no pa shikuchubeve chenie.

¹⁶ Chilu nishi kemiqo pelo chilu pelo.”

¹⁷ Jisü no aqokitikhi qhive no aki lo iloghive kethiu, pa khopemiqo no pa vilo aholetsa hipau kiqi iniju.

¹⁸ Ikelo Jisü no ishi iniju, “Nongu ye itehi kutólo vethamla aphi keshea? Ashou no timi lolo ilo keu ye kiumu pa shikuchubeve müla ipi nongu ye mtha keshea?

¹⁹ Kughengu tiye timi mlo lo ilo chemoe ikemu akive lo ilove no aphimpi lono ipeve chenie.” (Hi pikeu vechewo, Jisü no achuqupu kümtsü akimthe kepi shupheve tsüe.)

²⁰ Pa no ishi pikibe: “Timi lakhi lolo no ipeghi keu no pa shikuchubeve chenie.

²¹ Kughengu timi lakhi mlo alou no küsakügha kükümsü hipaqo ipeghi chenie: kipito xüküpsa, aküpüka, ghikiqhi,

²² ashupu, alakimine, axeküsü, pishikiqhi, ghasü kümlà, anhekushu, piküpüsa, aqheküza eno aghüzünikha.

²³ Küsakügha hipaqo kümtsü alolo no ipeghi püzü timi lakhi shikuchubeve chenie.”

Jisü no Syrophoeniciami Totimi Lakhi Küpülü Gihu tsü

²⁴ Jisü no tipa-a qhive püzü Tyre kupunú lo wue. Pa no aki lakhi lo iloghi eno timi khuu pelomu ithi penishimo no ae; tishimu pa no ngo akeu ye tuqhou shimlave.

²⁵ Topumi lakhi ye Jisü ghili chilukhavi ighi püzü Jisü pukhuphi lo itsaqiluve. Li ngá ye mithekumo ghungu no tsüghape acheke.

²⁶ Topumi hu ye Greekmi lakhi eno li ye Syria lo Phoenicia ipikeu lono punú kemi. Li no Jisü vilo tüghaküsa hu li ngá phi lono hapheve tsülo ipi qhüinijue.

²⁷ Jisü no li vilo pi, “Atüghishi anuliqo pelo panongu no chunishi akeu thaqhü chuluve pelo, kughengu anuliqo sho pesü atsǜqo veqhitsü nikeu ye achipi kumoe.”

²⁸ Li no khochile, “Iye Ampeu, atsǜqo ghí akibepu qholo anuliqo no chu keu phekiqhi-kighiqo chu chenie.”

²⁹ Ike Jisü no li vilo pi, “Hitoi khochile keu ghenguno, no ye wolu nanie, tüghaküsa hu ye O ngá qhive no wuvae.”

³⁰ Li no aki lo idewo kelo angá ye alipa lo zü aghí keu ithulu eno tüghaküsa ye angá qhive no wuve aghí.

Jisü no Akìní kughupomi eno Amilitshü Kemi Shipivi

³¹ Tisheno Jisü ye Tyre hokümxa qhive no Sidon vechesü Galilee züghi küdau iqi no Decapolis ko-aqha lo ilo.

³² Tilehi timi khami no akìní-ipove no akushukulu atsa pilu kemi lakhi Jisü lau sasü ighi, eno panongu no Jisü vilo pa u pesü timi tipau shou be tsülo pi qhüiniju.

³³ Jisü no aqokitikhi lau no timi tipau sawuve no pa u loti pesü timi tipau kìní lo chhosü tsü. Tisheno pa no pa u loti lo amití müsü pukuve püzü timi tipau mili bu tsü.

³⁴ Pa no atsütsǘ lo jupuku no atuthu kijè shè ghi timi tipau vilo ishi pi, “Ephphatha!” (hipau kiqi ye “Khaqhivelo!”).

³⁵ Ikelo timi tipau kìní ye khaqhive eno chiluve, pa mili ye kuqhove eno pa ye mütsümishei atsa pithuve.

³⁶ Khuu vilomu pi kevilo pi Jisü no azah panongu tsüve. Ikemu pa no khijehi ghasü keno tijehi panongu no tipau ghili küghae.

³⁷ Timiqo ye shishe akümza keu no chhitoive. Panongu no ishi pi, “Pa ye thowkha kümtsü aghileshi shivae. Pa ye akìní kughupomi pelo chilu pe eno amili-kütshümi pelo ghí atsa pilu pe ke.”