Mark 5 - Sümi Tiqhelimi Bible

Jisü no Tüghaküsa no Tsüghape Akemi Shipivi tsü

¹ Panongu no ayizükucho vechesü Gerasenes ko-aqha lo wue.

² Kughou Jisü no ashuka lono ipeghi keno, alolo mithekumo ghungu akemi lakhi no Jisü sasü kusho niye akumoki lono ipeghi.

³ Timi hipau ye akumokiqo lo ngo ache. Timi khunomu pa küghape qhimla eno ayikichhemu pesü pa tshüpe qhimla no ache.

⁴ Kughengu ayikichhe pesü ghuthu kutomo pa pukhu-au tshüpe qhi kemu pa no ayikichhe süthave eno pa pukhu müzá lo ayikhada ghí süthave tsü cheke. Akumto shi pa qhasü luni kemi khumu küha no ache.

⁵ Putho-pucho pa ye akumoki dolo eno atoghiqo lono vekipighi igha qa che eno atu pesü pa likhi pa hepungoqhi che.

⁶ Kughou pa no putou no Jisü ithulu keno, pa ye posüsü Jisü zülo ikiqi qhoqhünheluve.

⁷ Pa no asütsa kuloghi lono ishi igha ghi pi, “Shishe Akiqheu Lhou Nu Jisü, no ye I lau no kiu avehupu shi ani kea? Alhou je lono I shikighime tsü kevilo!”

⁸ Kughengu Jisü no pa vilo ishi pike, “Mithekumo ghungu, timi hipau lau no ipeghivelo!”

⁹ Tisheno Jisü no pa vilo iniju, “O je khuu kea?” Pa no ishi khochile, “I je ye Legion ke, kughengu ningu ye kutomo ke.”

¹⁰ Eno pa no Jisü vilo tipau qha lono panongu puwuve tsü pemo nike anguno-anguno qhüiniju.

¹¹ Tipau phivilo awo aloji kijè lakhi atoghi küdau nguchu ae.

¹² Tüghaküsaqo no ishi Jisü qhüiniju, “Awoqo gholo ningu puwuve tsülo; ningu pelo panongu phi lo ilove pelo.”

¹³ Jisü no azah panongu tsüve eno mithekumo ghunguqo no ipeghive püzü awoqo phi lo ilove. Awo loji kikihi qhethonhe kini qhalo ake tipaqo ye atuxu lo kohakive iqive no ayizükucho lo ilove püzü pütsüqhi khave.

¹⁴ Awo khemiqo ye pove püzü hipau ghili pesü mishiphu ngò mishiphughi hokümxaqo lo pikülhave tsü. Ikelo chikulumiqo no kiu shive keno ju niye wue.

¹⁵ Kughou panongu no Jisü lau ighi keno, tüghaküsa legion no tsüghape achekeu timi hu ye aphimini pepuve no akükümsü achipi shive püzü iqa aghí keu ithulu no msàve.

¹⁶ Ti ithulu kemiqo no tüghaküsa no tsüghape achekeu timi eno awoqo ye kiu shive keno tipau ghili pesü kütamiqo vilo pi.

¹⁷ Ikelo ache-axü lo xüküami no Jisü vilo pano ko-aqha qhive no wuve tsülo pi qhüiniju thuve.

¹⁸ Jisü no ashuka lo ilo niye che kelo, tüghaküsa no tsüghape achekeu timi hu no Jisü gholo wuni ipi qhüiniju.

¹⁹ Jisü no pa milive, ikemu ishi pi, “Aki lo now timiqo lau wolo eno Ampeu no O ghenguno khijehi mülà tsü eno kíshi O kimiye tsü keno pesü panoqo vilo pilo.”

²⁰ Ike timi hu no wuve eno Jisü no pa ghenguno khijehi mülà tsü keno pesü Decapolis lo pithuve kelo chikulumi kümtsü no akümzaqhiyive.

Jisü no Angá Lakhi Thive keu Xüputhu eno Totimi Lakhi Sǜ akeu Shipivi

²¹ Kughou Jisü no itaghi ashuka lono ayizükucho kathasü hukuku küdau ighi keno, pa no ayizükucho phivilo aphi lono timi kutomo no pa homüxa pe kumqoluve.

²² Tishi akelo synagog lo sakiphemi lakhi Jairus ipikeu ighi, eno kughou pa no Jisü ithulu keno, pa ye Jisü pukhu phivilo iluikiqive.

²³ Eno Jisü vilo pulopiniyi qhüiniju ghi ishi pi, “I ngá itimi lakhi anike li ye thive niye shivea. Li pelo viluve no xülu penike kimiye no ighi püzü O u pesü li shou be tsülo.”

²⁴ Ike Jisü no pa gholo wu. Timi kutomo no kibikhoi pa sühope eno papesü che.

²⁵ Ikelo totimi lakhi ampe chighikini ajì poache keu tilehi ae.

²⁶ Li ye shikipivimi kutomo lau shikipivi laju ake lono shishe imeve eno li u lo akeu kümtsü puwokhave, tishimu li ye vilu ke kumo no alomokithe auve.

²⁷ Kughou li no Jisü ghili chilu keno, li no Jisü thiu no ighi püzü paw ubephi lo bue,

²⁸ kughengu li no ishi kümsüe, “I no pa phì likhimu bulu aye, ni ye viluve nani.”

²⁹ Paikhavi lono li no ajì poache keu tave eno li ye li phi lo aküsǜ achekeu lono viluve keu ithive.

³⁰ Paikhavi Jisü ye pa lau no aküka ipeve keu ithive. Pa no aqokitikhi küdau kugho ighino ishi iniju, “Khuu no I phiküzü bu kea?”

³¹ Pa khopemiqo no khochile, “Timi hijejehi no O sühope chekeu nono ithulu ani keghi no ye kíshi no, ‘khuu no I bu kea,’ ipi iniju cheni kea?”

³² Ikemu Jisü ye khuu no hi shi keno homüxa ghi jukuto ae.

³³ Ikelo atotiu hu ye li lau kiu shive keno ithi akehu li no ighi püzü Jisü pukhu phivilo ikiqi no msà khokhoshi Jisü vilo amikucho lono kümtsü lhepe pive.

³⁴ Jisü no li vilo pi, “Angá, O küpülü no O shipivivae. Aloino wolo, no ye O küsü lono viluvae.”

³⁵ Jisü no atsa piaphi lono synagog lo sakipheu Jairus ki lono timi khami no ighi püzü Jairus vilo ishi pi, “O ngá ye thiva ke kushiye akükütsüu shipüna ani kea?”

³⁶ Panongu no küptsa akeu Jisü no chilu-kümghalei ghi Jarius vilo ishi pi, “Msàkevi no pülülo.”

³⁷ Peter, James eno James thiküzüu John nguno alau ye Jisü no khumu pa pape pemoe.

³⁸ Panongu no synagog lo sakipheu ki lo ighi kelo timiqo no mubumghui igha qa eno anhezü-piji aghí keu Jisü no ithulu.

³⁹ Pa no aki alou ilo no panongu vilo ishi pi, “Kushiye ishi mubumghui eno ighamuku ani kea? Angá ye zü anike thono thimphie.”

⁴⁰ Jisü no ishi pi kelo panongu no Jisü junuqhie. Jisü no panongu kümtsü khalau pipeve kethiu, pa no angá papù ngò azá eno pa gholo chekemi akhopemiqo ishi sasü angá no akeu chebo lo ilo.

⁴¹ Pa no li u tsüqüpe no li vilo ishi pi, “Talitha koum!” (hipau kiqi ye “Angá itimio, I no O vilo piani, ithuvelo!”).

⁴² Paikhavi no angá hu ye ithuve eno homüxa alà che thuve (li ye ampe chighikini shi ake). Hi ithulu no panongu kümtsü shishe akümzave.

⁴³ Jisü no panongu vilo khuu pelomu hipau ithi pe kevilo pi tsatsái azah shive, eno panongu vilo kiuala chu kepu pesü li tsülo pive.